Apulilo Valingiwa Lavakuakutanga

Olondaka via Yesu viokuti ukuenje wa kolelua “wa lunguka,” vi lomboloka nye?

Yesu wa pula hati: “Helie ukuenje wa kolelua haeye wa lunguka okuti cime caye wo kundika vakuanjo yaye vosi oku va ĩha ĩha okulia kuavo kotembo ya tukuiwa?” (Mateo 24:​45) “Ukuenje” o kasi oku eca “okulia” kuespiritu, o lomboloka Akristão olombuavekua. Momo lie Yesu o tukuila hati wa lunguka?a

Citava okuti, tu kuata elomboloko liovina Yesu a longisa viatiamẽla kondaka yokuti, “wa lunguka.” Eci Yesu a kala oku vangula catiamẽla ‘kukuenje wa kolelua haeye wa lunguka,’ wa ta olusapo luafeko ekũi va kala oku lavoka okuiya kua sandombua. Afeko vaco, va tu ivaluisa Akristão olombuavekua vana okuti, osimbu ka va pitilile kunyamo wo 1914, va kala oku lavoka okuiya kua Sandombua wa velapo okuti, Yesu Kristu. Pokati kafeko ekũi, pa kala vatãlo ka va kuatele ulela eci sandombua a pitila. Omo liaco, ka va kuatele epuluvi lioku kala pocipito cuvala. Afeko vakuavo vatãlo va lungukile. Ovo, vambatele ulela walua, kuenje olondiyelo viavo viamamako loku tama toke eci sandombua a pitila, kuenje va lalekiwa oku kala pocipito.—Mateo 25:​10-​12.

Eci Yesu a vialekiwa komangu Yusoma kunyamo wo 1914, valua pokati Kakristão olombuavekua, va kala oku lavoka oku enda laye kilu vepuluvi liaco. Noke, va limbuka okuti, va sukilile oku amamako lupange palo posi. Pole, vamue ka va li pongiyilile upange waco, momo ka va pamisile ekalo liavo kespiritu. Omo liaco, va kala ndafeko va wulua, vana okuti olondiyelo viavo ka viamẽleko oku tama. Pole, vana va lekisile olondunge luloño, va pamisiwile kespiritu. Eci va limbuka okuti va sukilile oku amamako lupange, va sanjukilile oku tẽlisa ocikele cavo. Omo liaco, va eca uvangi wokuti, ovo “ukuenje wa kolelua haeye wa lunguka.”

Kũlĩhĩsavo ndomo Yesu a tukula ondaka “wa lunguka,” kelivulu lia Mateo 7:24. Eye wa popia hati: “Wosi o yeva olondaka evi viange kuenje o vi linga wa soka ndomunu wa lunguka wa tungila onjo yaye vohanda.” Ulume ukualondunge o tungila onjo yaye pocitumãlo cimue okuti, ndaño kueya ofela yalua, ka yi teka. Pole, ulume wa wulua, o tungila onjo yaye veseke okuti, eci kuiya ombela, yi teka. Omo liaco, ondonge ya lunguka ya Yesu, yi lekisa ovitangi vi tunda koku kuama ovisimĩlo violuali. Eye o lekisa okuti wa lunguka, momo o kuama olonumbi via Yesu kovina viosi a linga. Omo liaco, “ukuenje wa kolelua haeye wa lunguka,” wa kuama onjila yaco.

Kũlĩhĩsavo ndomo ondaka “wa lunguka” ya tukuiwa vovinimbu vialua Vovisonehua vio Heveru. Fareo wa nolele Yosefe oco a ece okulia ku va Egito. Eli, lia kala eliangiliyo lia Yehova lioku eca okulia komanu vaye. Momo lie Yosefe a noliwila? Fareo wo sapuila hati: “Ka kuli umue wa loñoloha [ale wa lunguka] pamue ukualondunge te ove.” (Efetikilo 41:​33-39; 45:⁠5) Embimbiliya li popiavo okuti, Avigaile wa kala ukãi umue “wa lunguka.” Eye wa ecele okulia ku Daviti ombuavekua ya Yehova, kuenda kakuenje vaye. (1 Samuele 25:​3, 11, 18) Yosefe la Avigaile, va tukuiwa hati va lunguka, momo va limbukile ocipango ca Suku, kuenje va lekisa olondunge kuenda ovituwa viwa.

Omo liaco, Yesu poku popia hati, ukuenje wa kolelua wa lunguka, wa lekisa okuti, ocisoko caco ci limbukiwila kovina vimue ndeci, oku lunguka, uloño kuenda ovituwa viwa. Momo ukuenje waco, o kuama olonumbi Viondaka ya Suku yocili, kovina viosi a linga.

[Etosi pombuelo yemẽla]