Ukuenje Umue Ohuasi Ka Nolele Onjila Yiwa
UKUENJE umue ohuasi, wa kũlĩhĩle ovihandeleko kuenda wa kala ukuetavo. Eci a endele ku Yesu, wa kekama kolongolo, kuenje wa pula hati: “Olongisi, vukuesunga, ndinga nye okuti ñuata omuenyo ko pui?”
Yesu wo tambulula hati, oco o kuate omuenyo ko pui, o sukila oku pokola kovihandeleko via Suku. Eci a pula ovina a sukilile oku linga, Yesu wo lomboluila hati: “Ku ka ipe. Ku ka pekelise. Ku ka ive. Ku ka popie uvangi vuhembi. Sumba so la nyoho. Sola u o lisungue love [ale omanu vosi] ndeci o lisole ove muẽle.” Olonumbi evi, ovio via velelepo Vocihandeleko ca eciwa ku Mose. Pole, ukuenje wa tambulula hati: “Ovina evi viosi ndi vi lingainga ale. Pa ñambela vali nye?”—Mateo 19:16-20.
Yesu ‘wo kuatela ohenda,’ kuenje wo sapuila hati: “Wa kamba cimue cimuamue, kuende, ka landise cosi o kuete, ci avela olosuke, kuenje o kala lipako kilu; oco wiye o ñuame.”—Marko 10:17-21.
Ocili okuti, ukuenje ka co lelukilile oku nola onjila a sukilile oku kuama. Nye a linga? Anga hẽ, wa landisa ukuasi waye oco a linge ondonge ya Yesu, ale ka tavele oku u landisa? Wa sukilile hẽ oku seleka ukuasi waye palo posi, ale kilu? Ocili okuti, wa kala locitangi cinene. Eye wa kapeleko ovina viespiritu poku pokola Kovihandeleko oco a kuate ukamba la Suku. Pole, onjila yipi a nolapo? Eye, “wa [tiukila] loku sumua momo wa kala lovipako via lua.”—Marko 10:22.
Ukuenje, ka nolele onjila yiwa. Nda wa tavele oku kala ondonge ya Yesu, nda wa kuata omuenyo ko pui, una a kala oku sanda. Embimbiliya ka li tukula eci ca pita noke lukuenje waco. Pole, tua kũlĩha okuti, noke liakũi akuãla kanyamo, va Roma va lundula o Yerusalãi kuenda onepa yinene yo Yudea. Valua va Yudea va pesela ovokuasi kuenda omuenyo wavo.
Upostolo Petulu lolondonge vikuavo, va nola onjila yiwa. Ovo va “sia ovina viosi,” kuenje va kuama Yesu. Va kuatisiwa calua omo lionjila va nola! Yesu wa va sapuila hati, va pondola oku tambula ovina vialua okuti ovokuasi va sia konyima a sule. Kuenje, va kuata elavoko lioku tambula omuenyo ko pui. Omo liaco, ka va livelele onjila va nola.—Mateo 19:27-29.