Litumbika Koku Linga Ocipango Ca Suku
“[Kristu] wa fila vosi okuti, ava va kasi lomuenyo ka va kasilili lawo ovo muẽle.”—2 Va KORINDO 5:15.
1. Lombolola ulandu wa manji umue misionaliu.
MANJI umue o misionaliu o tukuiwa hati, Aarona wa popia hati: “Eci uyaki wa pua vofeka yimue yo Afrika, ekãlu lietu olio lia kala liatete oku iñila vimbo limue. Omo liuyaki, tua pita otembo yalua okuti, ka tua kuatele onjila yoku lisanga la vamanji va kala vekongelo liaco, oco tu va kuatise. Eci tua endele vimbo liaco, ka tuambatele lika okulia, uwalo, kuenda alivulu. Pole, tuambatelevo o Televisãu kuenda o Deck (okuti omakina mu iñila okasete ko video,) oco tu tale ovideo losapi hati, Testemunhas de Jeová—A Organização Que Leva o Nome.b Noke, omanu valua veya oku tala ovideo yaco vocingalala cimue cowangu tua tungila vimbo. Tua yi tala olonjanja vivali. Noke lioku tala ovideo yaco, omanu valua va fetika oku lilongisa Embimbiliya. Omo liaco, elikolisilo lietu lia nena onima yiwa.”
2. (a) Momo lie Akristão va nolelapo oku linga upange wa Suku? (b) Apulilo api tu kũlĩhĩsa cilo?
2 Momo lie manji Aaron lekamba liaye va lingila upange waco? Va ci lingila oku eca olopandu omo liocisembi ca Yesu Kristu kuenda oku litumbika ku Suku. Kuenje, va nolapo oku ambata omuenyo u likuata locipango ca Suku. Akristão vosi va siatavo oku kuama ongangu yavo okuti ‘ka va lingi vali ocipango cavo muẽle.’ Pole, va likolisilako ‘oku kunda olondaka viwa.’ (2 Va Korindo 5:15; 1 Va Korindo 9:23) Ovo va kũlĩhĩle okuti, eci esulilo lioluali lulo liya, olombongo lekemãlo, ka vika kuata esilivilo. Omo liaco, va yonguile oku kuata uhayele umue u va ecelela oku linga ocipango ca Suku. (Ukundi 12:1) Tu pondola oku ci linga ndati? Pi tu sanga utõi longusu yoku ci linga? Apuluvi api tu kuete oku linga upange wa Suku?
Amamako Kespiritu
3. Nye ca kongeliwa voku linga ocipango ca Suku?
3 Akristão vocili, va nolapo lika oku linga ocipango ca Suku. Oco tu linge ocipango caco, tu sukila oku kuata onepa Kosikola Yupange Wakristão, oku tanga Embimbiliya eteke leteke, oku kunda olondaka viwa, kuenda oku papatisiwa. Osimbu tuamamako oku kula kespiritu, tu sukila oku ivaluka olondaka viupostolo Paulu wa popia hati: “Kolisako oku lingainga ovina evi. Litumbika muẽle kokuavio, oco vosi va mole okuamako kuove.” (1 Timoteo 4:15) Oku amako kuaco, ka kueci esivayo kokuetu, pole, ku lekisa elitumbiko lietu koku linga ocipango ca Suku. Nda tua ci linga, Suku o tu songuila kovina viosi tu linga. Kuenje, o tu kuatisa oku linga u pange tu tẽla.—Osamo 32:8.
4. Tu pondola ndati oku yuvula usumba?
4 Atatahãi, kuenda asakalalo omuenyo, a tateka oku amamako lupange wetu ku Suku. (Ukundi 11:4) Oco tu kuate esanju koku vumba Suku kuenda oku kuatisa vakuetu, tu sukila oku yuvula usumba. Manji Erik, wa yonguile oku kuatisa ekongelo limue va vangula elimi likuavo. Pole, wa kuatele usumba, kuenje wa li pula hati: ‘Anga hẽ, vaka ndi tambula ciwa? Cika leluka hẽ, oku linga ukamba la vamanji? Ovo hẽ, vaka kuatavo ukamba lame?’ Eye wamisako hati: “Nda limbuka okuti nda sukilile oku sakalala calua la vamanji okuti ame muẽle ci sule. Kuenje, nda siapo ovisimĩlo viaco ka via sungulukile, poku nolapo ovina vi kuatisa vamanji. Nda likutilila loku pinga ekuatiso kuenda oku amamako lonjongole yange. Kuenje, nda kuata esanju lialua kupange wa [Yehova].” (Va Roma 4:20) Nda tuamamako oku vumba Suku loku kuatisa vakuetu, tu kuata esanju lia piãla.
5. Momo lie tu sukilila oku liangiliya oco tuamameko oku linga ocipango ca Suku? Lombolola ulandu umue.
5 Oco tu amameko oku linga ocipango ca Suku, tu sukila oku liangiliya ciwa. Tu sukila oku yuvula olofuka vina vi tu kisika oku talavaya calua, okuti ka tu kuata otembo yoku linga upange wa Suku. Embimbiliya li tu sapuila hati: “Ohuasi yi viala olosuke; ukuakulevala o linga upika wu u levalisa.” (Olosapo 22:7) Oku kolela Yehova kuenda oku pitisa kovaso upange waye, ci tu kuatisa oku yuvula ovitangi. Manji Guoming la va manjaye vavali afeko, va kasi la ina yavo volupale lumue okuti ofeto yonjo vokuenda kuosãi ya tĩla calua, kuenda ka ca lelukile oku sanga upange. Omo liaco, va nolapo oku kuatisiwa lolombongo va selekele ndaño vamue pokati kavo ka va kuatele upange woku sanda eteku. Kuenje, manji Guoming wamisako hati: “Olonjanja vimue ka tua tambowale olombongo kupange. Pole, tuamamako lupange wakundi votembo yosi, kuenda tua tata ciwa ina yetu. Omo liaco, tu eca olopandu ku Ina yetu omo okuti ka tu kisikile oku wĩha ovina vialua. Kuenje, tua kuata epuluvi lioku amamako lupange wakundi votembo yosi kuenda oku tẽlisa ovikele vikuavo vekongelo.”—2 Va Korindo 12:14; Va Heveru 13:5.
6. Ovolandu api a lekisa esilivilo lioku ambata omuenyo u litava locipango ca Suku?
6 Citava okuti utima wove u tekela lika kupange woku sanda eteku, lonjongole yoku kuata olombongo vialua. Pole, o sukila oku pongolola ovisimĩlo viove oco o pitise kovaso ocipango ca Suku. Apongoloko aco ka a lingiwa vonjanja yimosi. Pole, nda kua a tẽlisile vonjanja yimosi, kuka sime okuti kuka tẽlisa ocimaho caco. Omo liaco, tu konomuisi ulandu wa manji Koichi okuti, wa enda oku pesila otembo yalua kovitalukilo. Eci a fetika oku lilongisa Embimbiliya wa kala umalẽhe. Pole, wa pita anyamo alua lovitalukilo vi tukuiwa hati video game. Eteke limue, wa lipula hati: ‘Nye ndi kasi oku linga? Ndi kuete eci ci pitahãla 30 kanyamo, pole toke cilo sia lingile upange u kuete esilivilo!’ Omo liaco, Koich wa fetika vali oku lilongisa Embimbiliya, kuenda wa tava ekuatiso lia vamanji vekongelo. Vokuenda kuotembo wa likolisilako oku linga apongoloko. Lekuatiso liolohutililo kuenda lia vamanji, wa tẽla oku siapo ovituwa viosi vĩvi. (Luka 11:9) Cilo, wa sanjuka calua omo lioku kala oñuatisi yakulu vekongelo.
Lekisa Ovituwa Via Sunguluka
7. Momo lie tu sukilila oku lekisa ovituwa via sunguluka kupange wa Suku?
7 Oco tu tẽlise ocipango ca Suku, tu sukila oku likolisilako kovina viosi tu linga. Pole, tu sukila oku yuvula owesi poku ci linga. (Va Heveru 6:11, 12) Yehova ka sanjukila oku mola okuti tu kava ketimba kuenda kovisimilo. Oku limbuka okuti ka tu tẽla oku linga upange wa Suku longusu yetu muẽle, ceca esivayo kokuaye, kuenda ci lekisa okuti, tu kuete ovituwa via sunguluka. (1 Petulu 4:11) Yehova wa likuminya oku tu ĩha ongusu tu sukila oco tu linge ocipango caye. Pole, tu sukila oku yuvula oku li songuila etu muẽle, loku seteka oku linga ovina a kũlĩha okuti ka tu tẽla oku vi linga. (2 Va Korindo 4:7) Oco tu yuvule ekavo kupange wa Suku, tu sukila oku lavulula ndomo tu talavaya.
8. Nye ca pita lumalẽhe umue Ukristão eci a seteka oku litumbika kupange wa Yehova, lowu woku sanda eteku, kuenda onjila yipi a nolapo?
8 Manji umue o tukuiwa hati Ji Hye, o kasi Kutundilo wocifuka co Asia, vokuenda kuanyamo avali, wa talavaya kupange umue va enda oku u kisika oku talavaya olowola vialua. Otembo yaco, wa litumbikile kupange wakundi votembo yosi. Eye wa popia hati: “Vepuluvi limuamue, nda seteka oku litumbika kupange wa Yehova, kuenda kupange woku sanda eteku. Pole, kuteke nda kuata lika olowola vitãlo vioku pekela. Noke, nda kuata owesi woku kapako ovina viespiritu, kuenje, sia kuatele esanju lioku linga upange wa Yehova.” Oco manji Ji Hye a vumbe Yehova ‘lutima wosi, lomuenyo waye wosi, lolondunge viaye, kuenda ongusu yaye,’ wa sanda upange umue okuti ka pesilako otembo yalua. (Marko 12:30) Noke, wamisako lulandu waye hati: “Ndaño okuti epata liange lia ndi kisika oku talavaya kupange va feta olombongo vialua, pole, nda nolapo oku pitisa kovaso upange wa Suku. Toke cilo, ndi kuete olombongo vioku landa ovina ndi sukila kuenda uwalo wa sunguluka. Kuenje, nda sanjuka omo lioku kuata otembo yalua yoku pekela! Nda sanjukila calua upange woku kunda, kuenda nda pama kespiritu. Kuenje, cilo si kuete otembo yoku tiamisila utima kovokuasi oluali.”—Ukundi 4:6; Mateo 6:24, 28-30.
9. Elikolisilo lietu li kuatisa ndati omanu?
9 Havosiko va pondola oku litumbika kupange wakundi votembo yosi. Ndaño okuti wa kuka, kuenda o kuete uhayele utito, ale ovitangi vikuavo, ivaluka okuti, Yehova o sanjukila ekolelo liove lupange o pondola oku u lingila lutima wove wosi. (Luka 21:2, 3) Ocili okuti, vamue ka va kapeleko upange tu lingila Yehova, pole lomue o kuete omoko yoku pembula elikolisilo lietu. Kupange woku kunda, citava okuti, tu totola kapito amue vocikanjo, pole, lomue o lekisa onjongole kesapulo lietu. Noke lioku tundamo, pamue omanu vaco va vangula eci catiamẽla kotembo tua pita loku totola kapito avo ndaño lomue wa tu yikuilako! Ka tuka simi okuti vosi tu kundila olondaka viwa va tava kesapulo lietu, pole vamue vaka lekisa onjongole. (Mateo 13:19-23) Omanu vamue va tava lika kolondaka viwa eci ekalo voluali li pongoloka, ale ceci va pita lovitangi. Pole, ndaño vamue ka va lekisa onjongole, tu sukila oku amamako lupange wa Suku. Momo, ‘tulondingupange Viaye.’—1 Va Korindo 3:9.
10. Esumũlũho lipi vosi tu kuete vekongelo?
10 Vosi yetu tu pondola oku kuatisa epata lietu kuenda vamanji vekongelo. (Va Galatia 6:10) Ovituwa vietu viwa, vi eca ekuatiso liotembo ka yi pui. (Ukundi 11:1, 6) Nda akulu vekongelo kumue loloñuatisi viavo va tẽlisa ovikele viavo, ci kuatisa vamanji oku pama kespiritu, kuenje va kuata ombili yoku amisako upange wavo. Omo liaco, nda ‘tua linga vakuambili kupange wa Ñala, upange wetu ka u lingi wolivova.’—1 Va Korindo 15:58.
Amamako Oku Linga Ocipango ca Suku
11. Esumũlũho lipi vamanji va kuete koku amisako upange woku kunda?
11 Etu Tuakristão, tu sanjukila omuenyo wetu, kuenda tu eca esivayo ku Suku kovina viosi tu linga. (1 Va Korindo 10:31) Pole, tu sukila oku sanjukila upange woku kunda olondaka viwa Viusoma, kuenda oku longisa vakuetu oku kapako ovina viosi Yesu a tuma. Nda tua ci linga, tu kuata esanju kupange wa Suku. (Mateo 24:14; 28:19, 20) Ndaño tu sukila oku talavaya vekongelo lietu, pole kuli epuluvi lioku talavaya vocikanjo celimi likuavo, ale oku ilukila kofeka yikuavo kuli ekambo liakundi vusoma. Akulu vekongelo loloñuatisi viavo okuti va loñoloha, haivo ka va kuelele, citava okuti va lalekiwa oco va pindisiwe Kosikola Yoku Angiliya Olondingupange. Noke, va tumiwa kovikanjo vikuavo ale kolofeka vina kuli ekambo lia vamanji va loñoloha kespiritu. Vamanji vana va kuele okuti va litumbika kupange wakundi votembo yosi, citava okuti va pindisiwa Kosikola yo Gileada, oco va tumiwe kolofeka vikuavo ku sukila ekuatiso. Kulivo vamanji vamue va siata oku litumbika kovopange akuavo ndeci, oku talavaya Kombetele, oku tunga olonjango viusoma loku vi semulula, kuenda oku tunga olombetele vikuavo.
12, 13. (a) O pondola ndati oku nola upange o yongola oku kuama? (b) Lombolola ndomo uloño u tunda kocikele cimue cupange u pondola oku kuatisa kovopange akuavo.
12 Upange upi o sukila oku nola? Omo okuti tumanu va Yehova, tu sukila oku kolela kokuaye, kuenda oku endisiwa locisoko caye. ‘Espiritu liaye liwa,’ li ku kuatisa oku nola onjila ya sunguluka. (Nehemiya 9:20) Ocikele tua tambula, ci tu ĩha uloño woku tẽlisa ciwa ovikele tuka tambula noke.
13 Manji Dennis lukãi waye Jenny, va siata oku kuatisa kupange woku tunga Olonjango Viusoma. Noke Liehunguhungu Liofela li tukuiwa hati Katrina, lia pita kombuelo yo Estados Unidos, ovo, va lieca kupange woku kuatisa vana va pita locilunga caco. Manji Dennis wa popia hati: “Uloño wetu, wa tu kuatisa koku tunga Olonjango Viusoma, kuenda olonjo via vamanji. Kuenje, ekuatiso liaco, lia tu nenela esanju lialua. Olopandu via lekisiwa la vana tua kuatisa, via vokiya esanju lietu. Ndaño okuti kua kalavo ovimunga vikuavo vioku eca ekuatiso, ka va tẽlele oku tunga olonjo vialua. Pole, Olombangi Via Yehova, via tunga kuenda via semulula eci ci pitahãla 5.300 kolonjo, oku kongelamo Olonjango Viusoma. Omo liaco, omanu vana va mola ekuatiso liaco, noke va lekisa onjongole kesapulo Liusoma.”
14. Nye o sukila oku linga nda o yongola oku iñila kupange wakundi votembo yosi?
14 Ove hẽ, o pondola oku linga ocipango ca Suku poku nola oku iñila kupange wakundi votembo yosi? Nda wa ci linga, oka tambula asumũlũho alua. Nda ekalo liove ka liecelela oku ci linga, o sukila oku linga apongoloko amue. Likutilila ndeci Nehemiya a linga poku tambula ocikele cimue cavelapo. Eye wa popia hati: “A Yehova, . . . sumũlũisa ukuenje wove.” (Nehemiya 1:11) Kolela ‘kukuakuyeva olohutililo,’ kuenda linga ovina vi likuata leci wa pinga vohutililo. (Osamo 65:2) Pole, o sukila oku pokola ku Yehova, oco a sumũlũise alikolisilo ove. Noke lioku fetika upange wakundi votembo yosi, amamako lonjila wa nola. Vokuenda kuotembo, oka loñoloha kupange waco, kuenda oka kuata esanju lialua.
Omuenyo Umue wa Velapo
15. (a) Ekuatiso lipi tu tambula poku sapela lomanu va vumba Suku vokuenda kuanyamo alua, kuenda oku tanga ovolandu avo? (b) Tukula ulandu wa manji umue okuti wa pamisa ekolelo liove.
15 Nye o pondola oku lavoka poku linga ocipango ca Suku? Vangula la vamanji vana va kasi oku vumba Yehova vokuenda kuanyamo alua, ca piãla enene vana va litumbika kupange wakundi votembo yosi. Ovo va siata oku tambula asumũlũho alua! (Olosapo 10:22) Kuenje, va pondola oku ku sapuila okuti, Yehova lalimue eteke a va yandulukile eci va pita lovitangi. Momo wa siata oku va ĩha ovina viosi va sukila. (Va Filipoi 4:11-13) Tunde kunyamo wo 1955 toke wo 1961, Utala Wondavululi, wa sandeka ovolandu omuenyo wa vamanji vakuekolelo vocipama losapi hati: “Oku Sanda Esilivilo Liomuenyo Wange.” Tunde kotembo yaco, kua sandekiwa ovolandu alua a vamanji vamue. Ovolandu aco, a lekisa ombili kuenda esanju li tunda kupange woku kunda, okuti, a tu ivaluisa ovolandu Embimbiliya a sangiwa kelivulu Liovilinga. Oku tanga ovolandu aco, ci ku vetiya oku popia hati: ‘Ndi yongolavo oku ambata omuenyo waco!’
16. Nye ci nena esanju Kakristão?
16 Manji Aaron wa tukuiwa kefetikilo liocipama cilo, wa popia hati: “Vocifuka co Afrika, olonjanja vimue nda enda oku sanga amalẽhe va linga ovongende oku sandiliya esilivilo liomuenyo. Valua pokati kavo ka va sangele elomboloko liaco. Pole, kulo, tua litumbika koku linga ocipango ca Suku, poku kunda olondaka viwa Viusoma. Ndaño lovitangi, tua sanjuka omo tua limbuka esilivilo liomuenyo. Omo liaco, tua limbuka okuti, esanju li tunda koku eca lialua, li tunda koku tambula li sule.”—Ovilinga 20:35.
17. Momo lie tu sukilila oku linga ocipango ca Suku cilo?
17 Nye ci popiwa catiamẽla kokuove? Ocimaho cipi o kasi oku sanda? Nda ku kuete ovimaho viespiritu, otembo yove o yi pesila lika kovina ka vi kuete esilivilo. Momo lie o pesilila otembo yove kovina violuali lua Satana? Eci “ohali ya lua” yi keya, ovokuasi oluali kuenda ekemãlo, ka vika kuata esilivilo. Ukamba wetu la Yehova owo lika uka kuata esilivilo. Tuka sanjuka calua poku limbuka okuti, tua vumba Suku kuenda tua kuatisa vakuetu oku kũlĩha ocipango Caye!—Mateo 24:21; Esituluilo 7:14, 15.
[Atosi pombuelo yamẽla]
a Olonduko vimue via pongoluiwa.
b Ya sandekiwa Lolombangi Via Yehova.
O Tẽla Oku Lombolola?
• Yehova o tenda ndati upange tu kasi oku u lingila?
• Esunguluko li tu kuatisa ndati koku vumba Suku kuenda oku kuatisa vakuetu?
• Apuluvi api tu kuete koku vumba Suku?
• Tu pondola ndati oku kuata omuenyo wocili koloneke vilo?
[Elitalatu kemẽla 25]
Oku kuata ocituwa ca sunguluka, ci tu kuatisa oku vumba Yehova lutima wosi
[Elitalatu kemẽla 26]
Kuli olonjila vialua vioku li tumbika kupange u Kola