Vakuakutanga va Pula

Usoma wa Suku u Kasi hẽ Vutima Wove?

Omanu valua va siata oku tambulula epulilo liaco hati, oco. Elivulu The Catholic Encyclopedia li popia hati: “Usoma wa Suku, u lomboloka okuti Suku o viala vovitima vietu.” Eci oco asongui vatavo va siata oku longisa. Anga Embimbiliya li longisa muẽle okuti, Usoma wa Suku u kasi vovitima viomanu?

Vamue va siata oku sima okuti Yesu eye wa nena elongiso liaco. Momo eye wa popia hati: “Usoma wa Suku u kasi pokati kene.” (Luka 17:​21) Asonehi vamue va pongolola ocinimbu eci ndoco: “Usoma wa Suku u kasi vokuene,” ale “vokati kene.” Anga hẽ va pitiya muẽle ciwa ocisimĩlo ca Yesu? Anga Yesu wa yonguile muẽle oku popia okuti Usoma wa Suku u kasi vovitima viomanu?

Catete, konomuisa ndomo utima womanu wa tuwa. Ondaka utima, Vembimbiliya yi lomboloka ovisimĩlo, ekalo, ovituwa kuenda olonjongole viomunu. Anga hẽ tu kuete esunga lioku tava kocisimĩlo cokuti, ocina cimue cinene​—⁠ndeci Usoma wa Suku​—⁠ci kala vutima womunu?

Embimbiliya li tu sapuila hati: “Utima wa piãla kelimbi haiwo wa hongua enene.” (Yeremiya 17:⁠9) Yesu wa popia hati: “Eci ci tunda [vutima womunu] oco cu vĩhisa. Momo vokati okuti vovitima viomanu, omo mu tunda ovipango vivĩ, ukahonga, umunu, umondi, oku pekelisa, alivelo ãvi.” (Marko 7:​20-​22) Sokolola ño handi: Efũki kuenda olofa tua siata oku mola voluali ka via siatele hẽ oku tunda vovitima viomanu? Citava hẽ ndati ocina ca lipua ndeci Usoma wa Suku oku kala vutima wa womunu? Ndeci uti wa vĩha ka wimi epako liwa, Usoma wa Suku ka citava okuti u kala vovitima viomanu ka va lipuile.​—⁠Mateo 7:⁠16.

Cavali, kũlĩhĩsa olondaka vi sangiwa kelivulu lia Luka 17:​21, Yesu a sapuila olondonge viaye. Olondaka via tetekela ocinimbu eci vi popia ndoco: “Eci va Fariseo vo pula vati, Usoma wa Suku wiya eteke lipi? eye wa va kumbulula.” (Luka 17:​20) Va Fariseo va kala ovanyãli va Yesu. Omo liaco, Yesu wa va sapuila hati ka va ka iñila Vusoma wa Suku, momo va kala vakuambambe. (Mateo 23:​13) Nda va Fariseo ka va iñilile Vusoma wa Suku, citava ndati Usoma wa Suku oku kala vovitima viavo? Ocili okuti, ka citava! Oco hẽ nye Yesu a yonguile oku popia?

Asonehi amue vakuakupongolola Embimbiliya, va pitiya ondaka eyi ya Yesu ndomo yi kasi vo Tradução do Novo Mundo. Vamue va yi pongolola hati, “Usoma u sangiwa pokati kene” ale “kumue lene.” Kotembo yaco Usoma wa Suku wa kala ndati pokati komanu oku kongelamo va Fariseo? Yesu, Osoma ya nõliwa la Yehova Suku, wa kala pokati kavo. Eye wa longisa eci catiamẽla Kusoma wa Suku, wa linga ovikomo, kuenda wa lekisa ovina Usoma wa Suku uka linga. Eli olio esunga lieci tu popela okuti Usoma wa kala pokati kavo.

Ka kuli Ocisonehua lacimue ci lekisa okuti Usoma wa Suku u kasi vovitima viomanu. Pole, usoma waco uviali umue wocili uka linga apongoloko kilu lieve ndomo ovitumasuku vi lekisa.​—⁠Isaya 9:​6, 7; Daniele 2:44.