Utala Wondavululi Wokaliye Wovipama Vielilongiso

UTALA WONDAVULULI o kasi oku tanga ndeti, owo watete u kuete ovipama vielilongiso. Tu yongola oku lombolola atosi okaliye a sangiwamo.

Ovipama vielilongiso vi sangiwamo, via sandekiwila Olombangi Via Yehova, kuenda ava va lilongisa Embimbiliya okuti, va kasi oku kula kespiritu. Utala waco Wondavululi, uka sandekiwa onjanja yimosi vosãi, kuenda uka kuata ovipama vikuãla ale vitãlo vielilongiso. Esokiyo liovipama vielilongiso, Viutala waco Wondavululi, vi sangiwa kemẽla liatete. Owo, wa litepa lowu weciwa komanu vosi. Omo okuti, ka uka eciwa kupange woku kunda, kemẽla liatete Liutala waco Wondavululi, ka kuka kala alitalatu a litepa.

Kemẽla 2, kuli ulandu wecelela oku kuata elomboloko lieci ovipama vielilongiso kuenda vikuavo via sandekiwila. Vamanji va songola elilongiso Liutala Wondavululi, poku li pongiya, vaka sanga atosi va sukila oku lombolola vokuenda kuelilongiso liaco vekongelo.

Oka limbukavo okuti, ovipama vielilongiso vi kuete ovinimbu vitito, kuenda via litepa levi via enda oku sandekiwa tete. Eliangiliyo eli, liecelela okuti, manji o songola elilongiso Liutala Wondavululi, o kuata otembo yoku tanga ovipama viovisonehua via sokiyiwa. Omo liaco, tu ku vetiya oku tanga ovinimbu viovisonehua viosi via tukuiwa vocipama celilongiso ci lingiwa osemana losemana. Kovipama vimue viovisonehua kua sonehiwa hati “tanga,” vi sukila oku tangiwa, kuenda oku vi lombolola vokuenda Kuelilongiso Liutala Wondavululi. Ovipama vikuavo viovisonehua, citava oku vi tanga nda otembo yecelela. Ovipama vikuavo vielilongiso, vi kuete ovipama vimue viovisonehua kua sonehiwa hati, “sokisa.” Omo okuti ovipama viaco viovisonehua ka vi lombolola atosi avelapo vovinimbu, citava okuti ka vi tangiwa vokuenda kuelilongiso. Pole, ovipama viovisonehua kuna kua sonehiwa hati, “sokisa,” vi kuetevo atosi a eca elomboloko liocipama celilongiso. Omo liaco, tu ku vetiya oku tanga ovipama viaco, poku pongiya Elilongiso Liutala Wondavululi. Ovipama viaco, citava oku vi kongela vatambululo.

Ulandu wunyamo ka ukeyilila vali Vutala Wondavululi, ndomo wa siata oku sandekiwa. Pole, okupisa kunyamo ulo wo 2008, uka sandekiwa vosuplemendu Yupange Wetu Wusoma, ndeci wa siata oku iyilila vo Anuário. Ndomo ca lomboluiwa kefetikilo liocipama cilo, vovipama vielilongiso mua kongela ovipama vikuavo. Ndaño ovipama viaco ka tu vi lilongisa kolohongele vekongelo, tu ku vetiya oku vi tanga lutate. Momo vi kuete okulia kuespiritu kueciwa ‘lukuenje wa kolelua haeye wa lunguka.’​—⁠Mat. 24:​45-47.

Utala Wondavululi welilongiso lowu weciwa komanu, ka via litepele. Momo viosi vi lomboloka, Utala Wondavululi Wusapula Usoma wa Yehova. Kemẽla 2 kuli ovinimbu vi lombolola ocimãho Cutala Wondavululi. Ovio, vika kongeliwa velivulu Liutala Wondavululi mu sangiwa ovipama viosi viunyamo. Ovipama Viutala Wondavululi weciwa komanu vosi, kuenda vielilongiso, vi sangiwa vocipama losapi yi popia hati: “O Civaluka?” Vutala Wondavululi welilongiso.

Tunde kunyamo wo 1879, Utala Wondavululi, wa siata oku sandeka ocili catiamẽla Kusoma wa Suku, ndaño lovoyaki, uhukũi kuenda elambalalo. Tu likutilila loku pinga ekuatiso ku Yehova oco ovipama viokaliye viamameko oku sandekiwa. Tu likutililavo okuti, Yehova oku sumũlũisa osimbu wamamako oku tanga Utala ulo Wondavululi, wovipama viokaliye vielilongiso.