Sanjukila Olohuela Viove
“Onjo yi tungiwa lolondunge, yi kolisiwa luloño.” —OLOSAP. 24:3.
1. Suku wa lekisa ndati uloño poku lulika ulume watete?
ISIETU wokilu wa kũlĩha ovina viwa tu sukila. Suku wa kũlĩhĩle okuti oco ocipango Caye ci tẽlisiwe “ulume oku kala ño lika waye [vocumbo Cedene] haciwako.” Ocimãho caye cavelapo ca kala okuti, omanu va likuela oco va kuate omãla ‘loku yukisa oluali.’—Efet. 1:28; 2:18.
2. Eliangiliyo lipi Yehova a linga oco li kuatise omanu?
2 Yehova wa popia hati, ulume “ndu lulikila oñuatisi a sesamẽla.” Noke Suku wo pekelisa otulo tuelume, kuenje wopa olumati ketimba liaye lialipua, luna a lulika laluo ukãi. Eci Yehova a nena ukãi wa lipua Heva, Adama wa popia hati: “Ukãi u ekepa liakepa ange, o tukuiwa ukãi momo wopiwa kulume.” Heva wa kala o ñuatisi ya Adama. Vosi yavo va kuata ovituwa via litepa, va lipuile kuenda va lulikiwa lesetahãlo lia Suku. Okupisa kotembo yaco, Yehova wa linga eliangiliyo liolohuela viatete. Adama la Heva ka va tavele keliangiliyo lia Suku lioku li kuatisa pokati.—Efet. 1:27; 2:21-23.
3. Vamue va siata oku tenda ndati ombanjaile yolohuela, kuenda apulilo api a votuiwa?
3 Cisumuisa calua omo okuti, koloneke vilo, voluali mueyuka lika esino. Ovitangi vi kasi voluali ka via tundile ku Suku. Omanu valua ka va kapeleko ombanjaile yolohuela Suku a va ĩha, momo va sima okuti ka vi kuete vali esilivilo, kuenda via linga ono yovitangi. Oku litepa kua livokiya calua pokati kolohueli. Vapata mua siata oku pita ovitangi vialua omo liekambo liocisola pokati komãla lolonjali. Olonjali vialua ka via siatele oku lekisa esunguluko li nena ombembua kuenda elitokeko vepata. (2 Tim. 3:3) Olohueli vi pondola ndati oku amamako lesanju kotembo yilo yovitangi? Esunguluko li kuete esilivilo lie koku pandikisa lovitangi vi nyõla olohuela? Nye tu lilongisa ku vana va kasi oku amamako lesanju volohuela viavo?
Pokola Kolonumbi Via Yehova
4. (a) Onumbi yipi Paulu a eca yatiamẽla kolohuela? (b) Akristão vakuepokolo va kuama ndati onumbi ya Paulu?
4 Upostolo Paulu wa eca onumbi kovimbumba hati, nda va yongola oku kuela, va sukila “oku kueliwa [lika] vu Ñala.” (1 Va Kor. 7:39) Ocihandeleko eci ka ca kaile cokaliye ku va Yudea. Momo Ocihandeleko Suku a ecele ku va Isareli ca lekisile okuti, va sukilile oku yuvula “oku likuela” la vakualofeka va lisunguile lavo. Yehova wa lombolola ohele yiyilila koku tomba ocihandeleko caco poku va sapuila hati: “Nda [vu likuela la vana okuti ha va Isareliko,] va tindula omãla vene koku fendela ame ha va vumbi olosuku viñi. Kuenje nda oco onyeño ya Yehova nda yo wengukili, kuenje eye nda wo nyõli lombili.” (Esin. 7:3, 4) Koloneke vilo, nye Yehova a lavoka komanu vaye va sandiliya u va yongola oku likuela laye? Omunu wa Suku poku nõla umue a yongola oku likuela laye, o sukila oku kũlĩhĩsa una o kasi “vu Ñala” okuti wa litumbika kuenda wa papatisiwa. Ca velapo oku pokola kolonumbi via Yehova poku sanda umue tu yongola oku likuela laye.
5. Yehova kuenda Akristão va likuele va tenda ndati ohuminyo yolohuela?
5 Ohuminyo yolohuela yi kola kovaso a Suku. Catiamẽla kolohuela viatete, Yesu Omõla a Suku wa popia hati: ‘Eci ca tokekisa Suku omunu kaka ci tepe.’ (Mat. 19:6) Ukualosamo o tu ivaluisa esilivilo liohuminyo yaco poku popia hati: “Lumba ku Suku ocilumba colupandu. Tiula ku Tõlo olohuminyo viove.” (Osa. 50:14) Ndaño olohueli vi lavoka esanju volohuela, pole, ohuminyo yi lingiwa keteke liuvala, yi kuete esilivilo kuenda yi nena ocikele cinene.—Esin. 23:21.
6. Nye tu lilongisa kongangu ya Yefita?
6 Kũlĩhĩsa ulandu wa Yefita, una wa kala onganji ko Isareli kocita 12 O.Y. Eye wa lingile ohuminyo ku Yehova loku popia hati: “Nda weca va Amoni peka liange, oco eci ndi tiuka koku yula va Amoni, wosi o tunda volombundi vionjo yange, ha ñualehela lame, o linga wa Yehova, kuenje ndulumba ndocilumba coku pia elisi.” Ulandu waco u lekisa okuti, omõlaye ufeko eye weya oku ñualehela laye eci a tiuka konjo yaye ko Misipa. Anga hẽ, Yefita ka tẽlisile ohuminyo yaye? Wa yi tẽlisa. Eye wa popia hati: “Lomela wange nda likuminya ku Yehova, kuenje si tẽla vali oku [litiukamo.]” (Olong. 11:30, 31, 35) Yefita wa tẽlisa ohuminyo yaye ku Yehova, ndaño wa kũlĩhĩle okuti, kaka kuata ocitumbulukila cambata onduko yaye. Ohuminyo Yefita a linga, ya litepa leyi yolohuela. Pole, ocituwa a lekisa poku tẽlisa ohuminyo yaco, ci kuatisa Akristão oku pokola kohuminyo yavo yolohuela.
Nye ci Kuatisa Olohuela Oku Enda Ciwa?
7. Apongoloko api vana va kuela ndopo va sukila oku linga?
7 Olohueli vialua via siata oku sokolola esanju va kuata eci va kala oku namulãla lomunu va likuela laye. Ovo va kuata esanju lialua kepuluvi lioku li kũlĩha! Otembo va enda oku kala pamosi ya pamisa ukamba wavo. Pole, ci kale okuti va kuata otembo yalua yoku namulãla ale olohuela viavo via lingiwa lepata, eci va likuela va sukilile oku linga apongoloko. Ulume umue ohueli wa popia hati: “Kefetikilo liolohuela vietu tua kuata ocitangi coku limbuka okuti, cilo tua linga olohueli. Momo ka tua kũlĩhĩle ndomo tu amamako oku kala lakamba vetu vosimbu kuenda epata lietu.” Ulume ukuavo okuti tunde eci va likuela toke cilo papita ale 30 kanyamo, kefetikilo liolohuela viavo wa limbukile okuti oco va kuate esanju, wa sukilile oku kongela ukãi waye vovina viosi a linga. Osimbu ka tavele kelaleko limue ale oku linga esokiyo limue, tete o sapela lukãi waye catiamẽla kondaka yaco kuenda oku lekisa esumbilo. Pole, oco va ci linge, va sukila oku lekisa esunguluko.—Olosap. 13:10.
8, 9. (a) Momo lie oku sapela ku kuetele esilivilo? (b) Kovina vipi olohueli vi sukila oku lekisa esunguluko kuenda momo lie?
8 Olohuela vi tokekisa omanu vavali vakuavituwa via litepa. Omo liaco, va sukila oku kuata ocituwa coku sapela. Ovituwa viomanu viatiamẽla koku sapela, via litepa. Oku lavulula ndomo omunu wa likuela laye a sapela lepata, ci ku kuatisa oku kuata elomboloko liatiamẽla kokuaye. Olonjanja vimue eci omunu a popia hacoko ci kuete esilivilo, pole, ombangulo yaye, oyo yi situlula ovisimĩlo viutima waye. Omanu va pondola oku lilongisa calua kovina ka via popiwile. (Olosap. 16:24; Va Kol. 4:6) Omo liaco, uloño woku sokolola lutete, owo u nena esanju volohuela.—Tanga Olosapo 24:3.
9 Olohueli vialua, via siata oku lekisa esunguluko poku nõla olomapalo kuenda ovitalukilo va yongola oku linga. Osimbu ka wa likueleli handi, pamue ukuene wa solele oku pesila otembo yalua koku imba ombunje, ale kovitalukilo vikuavo. Noke yolohuela o sukila hẽ oku linga apongoloko amue? (1 Tim. 4:8) Cimuamue haico catiamẽla kotembo wa enda oku pesela lepata. Olohueli vi sukila oku sokiya otembo yoku lingila kumosi ovina viespiritu, kuenda ovopange akuavo.—Mat. 6:33.
10. Esunguluko li kuatisa ndati oku kuata ukamba uwa pokati kolonjali kuenda omãla va kuela?
10 Eci ulume a kuela, o siapo isiaye la inaye. Cimuamue haico catiamẽla kukãi. (Tanga Efetikilo 2:24.) Pole, va sukila oku amamako oku pokola kocihandeleko ca Suku catiamẽla koku sumbila olonjali viavo. Noke liolohuela, va sukila oku sokiya otembo yoku sapela lolonjali viavo kuenda olondatembo viavo. Ulume umue okuti tunde eci va likuela toke cilo papita ale 25 kanyamo, wa popia hati: “Olonjanja vimue ka ca lelukile oku tẽlisa olonjongole violonjali vietu, viamalẽhe vetu, kuenda violondatembo, lovina vikuavo va sukila. Pole, elivulu Liefetikilo 2:24, lia ndi kuatisa oku sanga onjila yoku tẽlisa ocikele cange. Ndaño ndi kuete ocikele coku tata vakuepata, pole, ocinimbu eci ca ndi kuatisa oku ivaluka okuti, ocikele cange catete oku tata ukãi wange.” Omo liaco, olonjali Akristão, vina via sunguluka vi lekisa esumbilo poku ivaluka okuti, omãla vavo va kuela va kuete ocikele coku songuila epata liavo.
11, 12. Momo lie elilongiso vepata kuenda olohutililo vi kuetele esilivilo kolohueli?
11 Esokiyo liwa lielilongiso liepata li kuete esilivilo. Ovolandu alua apata Akristão a lekisa ocili colondaka evi. Pamue, ka ci leluka oku tumbika esokiyo liaco ale oku amamako lelilongiso liaco. Manji umue ulume wa popia hati: “Nda tua tiukila konyima loku ivaluka omuenyo wetu, tu pondola oku popia okuti, tunde kefetikilo liolohuela vietu, tua kuata esokiyo liwa lioku linga elilongiso liepata.” Noke wamisako hati: “Poku mola esanju liukãi wange kepuluvi lioku linga elilongiso liepata, ndi limbuka esumũlũho tu kuete lioku lilongisa ondaka ya Suku.”
12 Oku likutilila kumosi ku kuetevo esilivilo. (Va Rom. 12:12) Nda ulume lukãi va fendela kumosi Yehova Suku, va pamisa ukamba wavo laye kuenda va kuata esanju volohuela viavo. (Tia. 4:8) Ulume umue Ukristão okuti ohueli wa popia hati: “Oku pinga ongecelo loku tukula akulueya aco poku likutilila kumosi, oyo onjila yoku lekisa elikekembelo ndaño kovina vitito.”—Va Efe. 6:18.
Lekisa Esunguluko Volohuela
13. Elungulo lipi Paulu a eca liatiamẽla kolohueli?
13 Akristão olohueli va sukila oku yuvula ovituwa vi nyõla olohuela viavo, ca piãla enene koloneke vilo omo liukahonga wa livokiya voluali. Catiamẽla kondaka eyi, Paulu wa lungula hati: “Ulume a lingainge lukãi eci co sesamela, lukãi haico la veyave. Ukãi ka kuete ocipango coketimba liaye, te veyaye. Haico ulume, ka kuete ocipango coketimba liaye, te ukãi waye.” Noke Paulu wamisako hati: “Ko ka litinduki, te nda wa ci likuminyi pokati okasimbu ho pindamui loku likutilila. Noke wu litokeka vali.” Momo lie? Momo “sanga Satana u yonji mekonda lioloñeyi viene.” (1 Va Kor. 7:3-5) Paulu poku tukula olondaka evi, wa lekisa ovina Akristão va sukila oku pitisa kovaso. Pole, wa lekisavo okuti, Ukristão wosi o kuele, o sukila oku kapako ovina ukuavo a sukila kuenda evi a yongola.
14. Ovisonehua vi kuatisa ndati olohueli catiamẽla kolonjongole viavo vietimba?
14 Ulume lukãi waye, va sukila oku likolela pokati kuenda oku ivaluka okuti, nda ka va kapeleko olonjongole vietimba viomunu va likuela laye ci nena ovitangi. (Tanga Va Filipoi 2:3, 4; sokisa la Mateo 7:12.) Ocili condaka eyi ca siata oku muiwa kapata ana okuti va litepa ketavo. Olohueli vina okuti, Akristão ndaño pokati kavo pali ovitangi, va vi tetulula poku lekisa ovituwa viwa, ohenda, kuenda oku likuatisa pokati. (Tanga 1 Petulu 3:1, 2.) Oku sola Yehova, loku sola omunu tua likuela laye kuenda oku lekisa esunguluko, ci kuatisa oku tetulula ovitangi volohuela.
15. Esumbilo li kuete esilivilo lie volohuela?
15 Ulume una okuti, wa sunguluka o tata ukãi waye lesumbilo kuenda o kapako ovisimĩlo viaye ndaño kovina vitito. Ulume umue ohueli o kuete 47 kanyamo wa popia hati: “Catiamẽla kondaka eyi, toke cilo, ndi kasi oku amamako oku lilongisa oku ci linga.” Akãi Akristão vana okuti olohueli, va vetiyiwa oku sumbila alume vavo. (Va Efe. 5:33) Oku popia ovina vĩvi viatiamẽla kalume, loku tukula akulueya avo pokati komanu, ka ci lekisa esumbilo. Elivulu Liolosapo 14:1, li tu ivaluisa hati: “Ndunge o litungila onjo, Eveke puãi o yi tungulula lovaka aye.”
Kuka Ece Evelo Keliapu
16. Olohueli vi kapako ndati olondaka vielivulu lia Va Efeso 4:26, 27?
16 Embimbiliya li popia hati: “Temi, puãi ko ka lingi ekandu. Ekumbi ka li ka iñile lokutema kuene. Ko ka eci evelo Keliapu.” (Va Efe. 4:26, 27) Oku kapako olondaka evi, ci tu kuatisa oku tetulula ovitangi ale oku yuvula olonamãlala volohuela. Manji umue ukãi wa popia hati: “Sivaluka eteke limue tua kuatele ovitangi lulume wange okuti, ka tua vi tetuluile ndaño tu pita olowola vialua loku sapela ondaka yaco.” Eci va likuela, va nõlelepo okuti eye lulume waye ka va ecelela ekumbi oku iñila loku tema kuavo okuti ka va tetulula ovitangi viavo. Manji wamisako hati: “Tua nõlelepo okuti, eci tu liyaka lovitangi ci kale vinene ale vitito, tu sukila oku liecele pokati kuenda oku ivala ovitangi viaco okuti ka tu vi sokolola vali keteke likuavo.” Omo liaco, va yuvula ‘oku eca evelo Keliapu.’
17. Nye ci pondola oku kuatisa olohueli ndaño va kuete ovimãho via litepa?
17 Nye o sukila oku linga nda wa likuela lomunu umue kakuete ovimãho ndevi viove? O pondola oku limbuka okuti, wa linga olohuela vimue ka vi kuete esanju ndeli lia vakuene. Pole, oku ivaluka ndomo Ululiki a tenda olohuela, ci ku kuatisa. Paulu wa lungula Akristão hati: “ Olohuela vi sumbiwe lomanu vosi, lula waco ka u ka kale levĩho, momo Suku o tetuluila vakahonga la vakahokolo.” (Va Hev. 13:4) Tu sukilavo oku kapako olondaka vi popia hati: “Ukolo wa ketikiwa lutatu ko tepa lombili.” (Uku. 4:12) Nda ulume lukãi waye va pitisa kovaso oku sumbila onduko ya Yehova, ci lekisa okuti pokati kavo pali elitokeko, kuenda va kutiwila ku Suku. Ovo va lekisa ovituwa vi pamisa olohuela viavo, momo va kũlĩha okuti, ci nena esanju ku Yehova Usovoli wolohuela.—1 Pet. 3:11.
18. Catiamẽla kolohuela, ekolelo lie o sukila oku kuata?
18 Akristão va pondola oku kuata esanju volohuela. Pole, o sukila oku likolisilako oku lekisa ovituwa vi kisikiwa Kakristão okuti, cimue pokati kavio, esunguluko. Koloneke vilo, vakongelo Olombangi Via Yehova voluali luosi, muli olohueli vialua vi eca uvangi wokuti, ci tava oku lekisa ocituwa caco.
O Tambulula Ndati?
• Momo lie tu popela okuti, ci tẽliwa oku kuata esanju volohuela?
• Nye ci kuatisa ulume lukãi oku kuata olohuela viwa?
• Ovituwa vipi ulume lukãi va sukila oku lekisa?
[Elitalatu kemẽla 9]
Akristão olohueli osimbu ka va tavele kelaleko limue ale oku linga esokiyo limue tete va sapela eci catiamẽla kondaka yaco
[Elitalatu kemẽla 10]
Likolisiliko oku tetulula ovitangi veteke liaco, oco ka uka ‘eci evelo Keliapu’