Kuama Olonumbi Via Suku Kovina Viosi O Linga
“Suku u eye Suku yetu oloneke vi enda ño-o hũ. Eye o linga usongui wetu otembo ka yi pui.”—OSA. 48:14.
1, 2. Momo lie tu sukilila oku kuama olonumbi via Yehova okuti ka tu kolela kolondunge vietu muẽle, kuenda apulilo api a votuiwa?
OLONJANJA vimue tu pondola oku sima okuti, ovina ka vi kuete esilivilo ale vina vi koka ohele, via sunguluka kokuetu. (Olosap. 12:11) Etu Tuakristão nda tu yongola oku linga cimue ka ca sungulukile, pamue utima wetu owo u tu vetiya oku ci linga. (Yere. 17:5, 9) Pole, ukualosamo wa lekisa olondunge eci a likutilila ku Yehova hati: “Votola ocinyi cove locili cove, vi songuile.” (Osa. 43:3) Eye wa yuvula oku kolela kolondunge viaye, pole wa kolelele ku Yehova kuenda wa kuama olonumbi Viaye. Omo liaco, tu sukilavo oku kuama olonumbi via Suku ndeci ukualosamo a linga.
2 Momo lie tu sukilila oku kolela kolonumbi via Yehova kovina viosi tu linga? Otembo yipi tu sukila oku vi kuama? Ovituwa vipi tu sukila oku lekisa oco tu kuatisiwe lolonumbi viaco, kuenda Yehova o tu songuila ndati koloneke vilo? Apulilo ava, tu a konomuisa vocipama cilo.
Momo Lie tu Sukilila Oku Kolela Kolonumbi Via Yehova?
3-5. Momo lie tu sukilila oku kolela kolonumbi via Yehova?
3 Yehova eye Isietu wokilu. (1 Va Kor. 8:6) Eye wa kũlĩha cosi catiamẽla kokuetu kuenda o lete eci ci kasi vovitima vietu. (1 Sam. 16:7; Olosap. 21:2) Soma Daviti wa sapuila Suku hati: “Wa ñuliha poku tumãla lo poku votoka. Wa limbuka ovisimilo viange tunde kupãla. Ka ku li ondaka kelimi liange te ove, a Yehova, wa yi kũlĩha yosi.” (Osa. 139:2, 4) Omo okuti, Yehova o kuete ukũlĩhĩso wosi watiamẽla kekalo lietu, tu sukila oku kolela okuti, wa kũlĩha ovina viosi viwa tu sukila. Handi vali, eye ukualondunge via velapo. Olete ovina viosi kuenda ka vanji ndeci omunu a vanja, pole, wa kũlĩha ovina viosi tunde kefetikilo liavio. (Isa. 46:9-11; Va Rom. 11:33) Yehova “Eye lika Suku” ukualondunge viocili.—Va Rom. 16:27.
4 Yehova o tu sole kuenda olonjanja viosi o tu yonguila eci ciwa. (Yoa. 3:16; 1 Yoa. 4:8) Omo okuti Suku ukuacisola, wa siata oku tu ĩha ovina viosi tu sukila. Ndonge Tiago wa soneha hati: “Ocali cosi ciwa longavelo yosi ya kanguka via tunda kilu, ku Isia yovinyi.” (Tia. 1:17) Vana va ecelela oku songuiwa lolonumbi viaye, va kuatisiwa locali caye.
5 Yehova eye ukuonene wosi. Catiamẽla kocituwa eci, ukualosamo wa popia hati: “U wa tunga vociwundilo ca Fũ eye o tumala vulembo wa Tõlo. Nukula Yehova siti, Eye ocikolo cange, haeye ombonge yange. Eye Suku yange, ndu kolela.” (Osa. 91:1, 2) Eci tu kuama olonumbi via Yehova, tu kasi oku sanda ocivundilo ca koka Kokuaye. Ndaño ceci tu liyaka lelambalalo, Yehova o tu kuatisa. Eye lalimue eteke a tu yanduluka. (Osa. 71:4, 5; Tanga Olosapo 3:19-26.) Yehova wa kũlĩha ovina viwa tu sukila, kuenda o yongola okuti, tu vi kuata. Eye o kuete unene woku tu ĩha ovina viaco. Omo liaco, oku siapo oku kuama olonumbi viaye, ci lekisa uveke! Oco hẽ, otembo yipi tu sukila olonumbi viaco?
Otembo Yipi tu Sukila Olonumbi?
6, 7. Otembo yipi tu sukila olonumbi via Yehova?
6 Tu sukila olonumbi via Suku vokuenda kuomuenyo wetu wosi tunde vutila toke koku kuka. Ukualosamo wa popia hati: “Suku u eye Suku yetu oloneke vi enda ño-o hũ. Eye o linga usongui wetu [toke eci tu fa].” (Osa. 48:14) Akristão vakualondunge va kuama ongangu yukualosamo yoku pokola kolonumbi via Suku.
7 Kuli otembo yimue tu sukila ekuatiso lionjanga. Olonjanja vimue ‘tu sakalala’ omo lioku liyaka lelambalalo, loku vela, ale ceci tu tundisiwa kupange. (Osa. 69:16, 17) Eci tu liyaka lovitangi viaco, tu sukila oku pinga ekuatiso ku Yehova loku kolela okuti o tu ĩha ongusu yoku pandikisa, kuenda olonumbi vioku nõla onjila ya sunguluka. (Tanga Osamo 102:17.) Tu sukilavo ekuatiso liaye kolonepa vikuavo. Eci tu kundila olondaka viwa Viusoma ku vakuetu, tu sukila ekuatiso lia Yehova oco upange waco wende ciwa. Poku nõla ovina vimue ndeci, ovitalukilo, uwalo, oku liposuisa, akamba, upange, elilongiso kosikola, ale ovina vikuavo, tu sukila oku kuama olonumbi via Yehova oco vi tu kuatise oku nõla lolondunge. Olonumbi via Yehova vi pondola oku tu kuatisa kovina viosi tu linga.
Ohele Yoku Tomba Olonumbi Via Suku
8. Elinga lia Heva lioku lia kuti vava handelekele okuti, ka citava oku liako, lia lekisa nye?
8 Ivaluka okuti, tu sukila oku pokola kolonumbi via Yehova Suku. Pole, nda ka tua ci lingile, Eye ka tu kisika oku pokola. Heva eye omunu watete wa nõlapo oku tomba olonumbi via Yehova. Ulandu waye u lekisa ovitangi vi tunda koku nõla onjila yĩvi. Sokololavo elomboloko liovilinga viaye. Onjongole yaye yoku ‘kala nda Suku okuti o kũlĩha eci ciwa leci cĩvi,’ yo vetiya okulia kuti vava handelekele okuti, ka ci tava oku liako. (Efet. 3:5) Kuenje, wa likapa pomangu ya Suku okuti wa linõlela onjila yaye, kuenda ka pokuile vali kolonumbi via Yehova. Heva wa likala uviali wa Yehova. Momo wa yonguile oku lisonguila eye muẽle. Ulume waye Adama wa nõlavo onjila yaco yesino.—Va Rom. 5:12.
9. Nda tua likala olonumbi via Yehova tu lekisa nye, kuenda momo lie ocituwa caco ci lekisila uveke?
9 Koloneke vilo nda tu yongola oku kuama olonumbi via Yehova, tu sukila oku limbuka uviali waye. Kũlĩhĩsa ocitangi comunu o kuete ocituwa coku tala vo Televisão omanu va kasi epõlola. Nda o kasi vekongelo, wa kũlĩha olonumbi via Yehova viatiamẽla kocituwa caco. Ovina vĩvi ka citava okuti, tu vi vangula, ca piãla enene oku vi tala. (Va Efe. 5:3) Omunu waco omo lioku tomba onumbi ya Yehova, o kasi oku likala uviali waye kuenda omoko Yaye yoku songola. (1 Va Kor. 11:3) Ocituwa caco ci lekisa uveke, momo Yeremiya wa popia hati: “Omunu enda ka tẽla eye muẽle oku suñamisa okuenda kuaye.”—Yere. 10:23.
10. Momo lie tu sukilila oku lekisa olondunge poku kuama elianjo lietu lioku linõlela eci tu yongola oku linga?
10 Omanu vamue ka va tava kolondaka evi via Yeremiya. Ovo va popia hati, nda Yehova eye wa tu ĩha elianjo liaco lioku linõlela eci tu yongola oku linga, ka citava okuti o tu pisa. Pole, tu sukila oku ivaluka okuti, ombanjaile yoku linõlela eci tu yongola oku linga, yi tu ĩhavo ocikele cimue cinene. Tuka li lombolola ku Suku catiamẽla kovina tua nõla oku popia kuenda evi tua linga. (Va Rom. 14:10) Yesu wa popia hati: “Eci ca siata vutima oco omẽla u popia.” Noke wamisako hati: “Momo evi vi tunda vutima vievi, ovisimĩlo vĩvi, umondi, oku pekelisa, ukahonga, umunu, uvangi wuhembi, [kuenda] etonãi.” (Mat. 12:34; 15:19) Olondaka vietu lovilinga vietu, ovio vi situlula ekalo liutima wetu. Ovio vi lekisa ndomo tua tuwa. Eli olio esunga lieci Ukristão ukualondunge a sukilila oku sandiliya olonumbi via Yehova kovina viosi a linga. Omo liaco, Yehova o sanga kokuaye ‘utima wa sunguluka’ kuenje u lingila lika eci “ciwa.”—Osa. 125:4.
11. Ulandu wa va Isareli u tu longisa nye?
11 Ivaluka ulandu wa va Isareli. Eci va enda oku nõla onjila yiwa poku pokola kovihandeleko via Yehova, Eye wa enda oku va teyuila. (Yeh. 24:15, 21, 31) Pole, olonjanja vimue va enda oku endisa lãvi elianjo liavo lioku linõlela eci va yongola oku linga. Koloneke via Yeremiya Yehova wa va sapuila hati: “Ka va pokuile ndaño oku yevelela, va kuama olondunge viavo lumbinde wovitima viavo via vĩha. Va tiukila konyima, ka va endele kovaso.” (Yere. 7:24-26) Ovituwa viavo vi sumuisa calua! Ka tuka eceleli okuti onjongole yoku linga eci cĩvi yi tu vetiya oku tomba olonumbi via Yehova loku li songuila etu muẽle okuti ‘tu tiukila konyima loku yuvula oku enda kovaso’!
Nye tu Sukila Oku Linga Oco tu Kuame Elungulo Lia Suku?
12, 13. (a) Ocituwa cipi ci tu vetiya oku pokola kolonumbi via Yehova? (b) Momo lie ekolelo li kuetele esilivilo?
12 Ocisola tu kuetele Yehova, ci tu vetiya oku kuama olonumbi viaye. (1 Yoa. 5:3) Paulu wa tukula ocina cimue tu sukilavo oku linga eci a popia hati: “Tu enda enda lekolelo, ha loku kolelako ovaso.” (2 Va Kor. 5:6, 7) Momo lie ekolelo li kuetele esilivilo? Yehova o tu songuila “volonjila viesunga,” pole, olonjila viaco ka vi tu tuala kekalo liwa voluali lulo. (Osa. 23:3) Omo liaco, tu sukila oku tiamisila ovaso etu ekolelo konima yi tunda koku vumba Yehova. (Tanga 2 Va Korindo 4:17, 18.) Ekolelo li tu kuatisavo oku sanjukila ovina tu kuete.—1 Tim. 6:8.
13 Yesu wa lekisa okuti, vefendelo liocili mua kongela oku lieca lutima wosi, pole ekolelo olio li tu kuatisa oku ci linga. (Luka 9:23, 24) Afendeli vamue vakuekolelo va siata oku likolisilako calua oku pandikisa kovitangi viuhukũi, koku talisiwa ohali, kolonepele, kuenda kelambalalo. (2 Va Kor. 11:23-27; Esit. 3:8-10) Pole, omo liekolelo va siata oku pandikisa lesanju. (Tia. 1:2, 3) Ekolelo li tu kuatisavo oku ivaluka okuti oku pokola kolonumbi via Yehova oco lika ca sunguluka kuenda ci nena ekalo liwa. Omo liaco, omanu vana va pandikisa, vaka tambula onima yotembo ka yi pui okuti ka yi sokisiwa lohali va kasi oku tala vokatembo kamue.—Va Hev. 11:6.
14. Momo lie Hagare a sukilile oku lekisa eliketiso?
14 Kũlĩhĩsa esilivilo lieliketiso koku pokola kolonumbi via Yehova. Hagare upika wa Sara wa lekisile ocituwa caco. Eci Sara a kala osisu, wa eca Hagare ku Avirahama, kuenje wa mina laye. Noke, Hagare wa fetika oku lekisa epela ku Sara. Omo liaco, Sara “wo talisa ohali,” kuenje Hagare wa tila. Noke, ungelo wa Yehova wa li sanga la Hagare kuenje wo sapuila hati: “Tiukila vali ku cime cove; ka litumbike peka liaye.” (Efet. 16:2, 6, 8, 9) Citava okuti Hagare wa yonguile oku kuama olonumbi vikuavo. Pole, oco a pokole konumbi yungelo, wa sukilile oku siapo ocituwa caye cepela. Noke, omo lieliketiso, wa pokola kondaka yungelo, kuenje omõlaye Isameli wa citiwila pocitumãlo ca koka vocilombo ca isiaye.
15. Lombolola ovitangi vimue via siata koloneke vilo okuti, oco tu kuame olonumbi via Yehova tu sukila oku lekisa eliketiso.
15 Oco tu kuame olonumbi via Yehova, tu sukila oku liketisa. Vamue va siata oku pokola konumbi yi lekisa oku yuvula ovitalukilo vina va sole okuti ka vi sanjuisa Yehova. Nda Ukristão wa lueyela ukuavo, o sukila oku pinga ongecelo. Nda wa linga cimue cĩvi, o sukila oku limbuka ekandu liaye. Nye ci lingiwa nda wa linga ekandu linene? O sukila oku liketisa kuenda oku sapula ekandu liaco kakulu vekongelo. Citava okuti umue o tundisiwa vekongelo. Pole, oco a tiuke vali, o sukila oku likekembela kuenda oku tinduka konjila yaye yĩvi. Eci tu liyaka lovitangi ndevi, tu sukila oku pokola kolondaka vi sangiwa kelivulu Liolosapo 29:23 vi popia hati: “Epela liomunu liu sepula, puãi u wonjuka o sumbiwa.”
Yehova wa Siata Oku tu Songuila Ndati?
16, 17. Tu kuatisiwa ndati Lembimbiliya mu sangiwa olonumbi via Suku?
16 Embimbiliya olio ono yolonumbi Viondaka ya Suku. (Tanga 2 Timoteo 3:16, 17.) Oco tu kuatisiwe Londaka ya Suku, ka tu sukila oku talamẽla toke eci tu liyaka lovitangi osimbu ka tua sandele ekuatiso Liovisonehua. Pole, tu sukila oku kuata ocituwa coku tanga Embimbiliya eteke leteke. (Osa. 1:1-3) Nda tua ci linga, tu kũlĩha ciwa ovisonehua. Tu kuata ovisimĩlo via Suku, kuenda uloño woku liyaka lovitangi vina viya ocipikipiki.
17 Tu sukilavo oku sokolola ovina tua tanga Vovisonehua, kuenda oku likutilila oco tu tambule ekuatiso lioku vi kapako. Nda tua kũlĩha ciwa ovinimbu Viembimbiliya, tu limbuka ndomo vi tu kuatisa poku liyaka lovitangi. (1 Tim. 4:15) Eci tu liyaka lovitangi, tu likutilila ku Yehova oku pinga ekuatiso oco tu sange olonumbi tu sukila. Espiritu Liaye li tu kuatisa oku ivaluka olonumbi Viovisonehua tua tanga Vembimbiliya kuenda valivulu a sandekiwa lukuenje wa lunguka.—Tanga Osamo 25:4, 5.
18. Yehova wa nõla ndati ocisoko cetu ca vamanji oco va tu ĩhe olonumbi vioku tu songuila?
18 Ocisoko cetu ca vamanji voluali luosi, oco ono yikuavo yoku pokola kolonumbi via Yehova. “Ukuenje wa kolelua haeye wa lunguka” kumosi Losungu yavo Yakulu, ovo onepa yavelapo yocisoko cetu ca vamanji. Ovo va siata oku tu ĩha okulia kuespiritu ku sandekiwa valivulu, kolohongele vitito kuenda evi vinene. (Mat. 24:45-47; sokisa Lovilinga 15:6, 22-31) Tu kuetevo vamanji va loñoloha kespiritu, capiãla enene akulu vekongelo va loñoloha koku eca ekuatiso kuenda elungulo li tunda Vovisonehua. (Isa. 32:1) Amalẽhe vana va kasi oku tekuiwa lolonjali Akristão, va kuete ekuatiso likuavo. Olonjali viavo, vi vetiyiwa oku longisa omãla oco va pokole kolonumbi via Suku.—Va Efe. 6:1-3.
19. Asumũlũho api tu lavoka nda tu amamako oku pokola kolonumbi via Yehova?
19 Olonjanja vialua Yehova wa siata oku tu ĩha olonumbi vioku tu songuila, okuti tu sukila oku vi kapako. Soma Daviti poku lombolola catiamẽla kotembo va Isareli va kuatele ekolelo ku Suku, wa popia hati: “Ove puãi o kola, o tumãla kasivayo a va Isareli. Votate va ku kolela, va ku kolela kuenje wa va popela. Va ku vilikiya kuenje va popeliwa. Va ku kolela kuenje ka va kutiwile osõi.” (Osa. 22:3-5) Nda tua kolela kolonumbi via Yehova, ‘ka tu kutiwavo osõi.’ Ka tu sumua lelavoko lietu. Nda tua ‘kundika ku Yehova onjila yetu,’ okuti ka tu kolela kolondunge vietu muẽle, tu tambula asumũlũho alua. (Osa. 37:5) Nda tua pandikisa locituwa caco, tuka tambula asumũlũho ka a pui. Soma Daviti wa soneha hati: “Yehova o sole esunga, ka yanduluka olosandu viaye. Vakuesunga va tatiwa oloneke viosi. . . . Olondingesunga vi piñala ofeka, vi tungamo oloneke ka vi pui.”—Osa. 37:28, 29.
O Tẽla Oku Lombolola?
• Momo lie tu sukilila oku pokola ku Yehova?
• Ovitangi vipi tu pondola oku liyaka lavio nda ka tua tavele oku songuiwa la Yehova?
• Kovina vipi Ukristão a sukila oku lekisa umbombe?
• Yehova o tu songuila ndati koloneke vilo?
[Elitalatu kemẽla 8]
Wa siata hẽ oku pokola ku Yehova kovina viosi o linga?
[Elitalatu kemẽla 9]
Heva ka pokuile kuviali wa Yehova
[Elitalatu kemẽla 10]
Ocituwa cipi Hagare a sukilile oku lekisa oco a pokole kolonumbi viungelo?