Ocivaluka?

Ove hẽ wa sola oku tanga ovipama Viutala Wondavululi via sandekiwa volosãi via pita? Nda wa vi sola, seteka oku tambulula apulilo a kuãimo:

• Otembo yipi olonoño via nyula Yesu?

Embimbiliya limue li popia hati: “Olonoño ka via nyulile Yesu eci a kala vocililo colongombe kuteke a citiwa, ndeci angombo va linga. Ovo vo nyula lika eci papita olosãi vimue.” Otembo yaco Yesu wa kala omõla kuenda wa kala vonjo. (Mat. 2:​7-​11) Nda Yesu vo wĩhile ulu kuenda olombanjaile vikuavo vi kuete esilivilo kuteke a citiwa, anga hẽ Maria nda wa lumba vali olopomba vivali vonembele eci papita 40 koloneke?​—⁠Susu toke Elombo, kemẽla 31.

• Nye omanu valua va pondola oku linga oco va kuate esanju komuenyo?

O pondola oku li pula ndoco: ‘Anga hẽ, ndi sukila oku kũlĩhĩsa ekalo liange oco ndi leluise omuenyo wange?’ Manji Amy oco a linga. Eye wa kuata ukuasi walua, pole, ka kuatele esanju. Noke wa limbuka okuti, omo lioku tiamisila lika utima kupange woku sanda eteku voluali lulo, wa nyola ekolelo liaye. Omo liaco, wa nõlapo oku pitisa kovaso Usoma, kuenda wa litumbikile kupange wakundi votembo yosi vokuenda kuotembo yimue. Amy wa popia hati: “Cilo ndi kuete esanju lialua” okuti, eli nda kuata otembo nda kala oku talavayela oluali li sule.​—⁠15/1, kemẽla 19.

• Nye ci kuatisa olonjali vimue akãi oco va sanjukile ovopange avo komuenyo?

Olonjali vialua akãi, va talavaya kupange woku sanda eteku. Vamue va ci lingila oku tekula epata liavo, vakuavo va ci lingila oku kuata elianjo, ale oku kuata ovokuasi. Kulivo vamue va cilingila omo lioku sola upange waco. Pole, ndomo ca lekisiwa volonumbi Viembimbiliya, akãi Akristão va kuete ocikele ca velapo konjo, ca piãla enene vepuluvi lina okuti omãla vavo vatito. Vamue va siata oku nõlapo oku talavaya olowola vimue kupange woku sanda eteku ndeci kepuluvi liomẽle ale kekumbi, ale oku siapo upange waco oco va kuatise ciwa epata liavo. Kuenje va siata oku kuata esanju lialua.​—⁠Kupupu toke Evambi, kemẽla 26-28.

• “Ocitumbulukila” cipi Yesu a tukula volondaka vi sangiwa kelivulu lia Mateo 24:⁠34?

Yesu olonjanja vimue wa tukula ondaka “ocitumbulukila” loku yi tiamisila kovina vĩvi, poku vangula catiamẽla kolondingaĩvi via kala kotembo yaye. Pole, hacoko a linga eci a vangula lolondonge viaye vina via kala oku lavoka oku wavekiwa lespiritu sandu. Ovo va kuata elomboloko lia suapo liolondaka via tukuiwa kelivulu lia Mateo 24:​32, 33. Omo liaco, citava okuti, Yesu wa kala oku vangula lolondonge viaye olombuavekua via kala kocita catete, kuenda olondaka viaco vi tiamisiwilavo kolombuavekua vio koloneke vilo.​—⁠15/2, kemẽla 23-4.

• Ocihandeleko ca kala ndati ongamba, ndomo ca lekisiwa kelivulu lia va Galatia 3:⁠24?

Kosimbu, ongamba ya kala upika umue wa koleliwa haeye ukuakutata omãla kuenda oku kũlĩhĩsa ndomo a tẽlisa onjongole yolonjali. Cimuamue haico catiamẽla Kocihandeleko. Oco ca teyuila va Yudea kovituwa vĩvi ndeci koku fendela olosuku viesanda. Ocihandeleko caco, ca kala ndongamba omo okuti, ca tumbikiwile lika oku va kuatisa toke poku iya kua Kristu.​—⁠Kupupu toke Evambi, kemẽla 18-21.

• Ovituwa vipi tu sukila oku lekisa ndomo ca lekisiwa kelivulu lia Tiago 3:⁠17?

Tu sukila oku yuvula ovina viosi vĩvi oco tu liyelise. (Efet. 39:​7-9) Tu sukilavo oku kala vakuambembua loku yuvula ungangala, ale ovituwa vikuavo vi nyola ombembua. Omunu lomunu pokati ketu o sukila oku li pula ndoco: ‘Anga hẽ nda kũlĩhĩwa okuti, nda siata oku sanda ombembua, ale ndukuakunyõla ombembua? Nda siata lika oku litatamisa la vakuetu? Nda siata hẽ oku tema lonjanga ale oku temisa vakuetu? Anga hẽ, nda siata oku ecela vakuetu, loku yuvula ocituwa coku va kisika oku tava lika kovisimĩlo viange?’​—⁠15/3, kemẽla 24-5.

• Momo lie Yesu a sakuila levando ulume una omeke? (Mar. 8:​22-26)

Embimbiliya ka lieci elomboluilo liasuapo liatiamẽla kondaka yaco. Pole, citava okuti Yesu wa kayisa omeke yaco levando oco olosongo viekumbi ka viko linge lãvi. Kuenje co kuatisa oku vanja ciwa ocinyi. Ulandu owu u lekisa ohenda Yesu a kuatela ulume waco.​—⁠1/4, kemẽla 30, kelimi Lioputu.