Kuata Ukamba la Suku
Eye wa Kũlĩha Evalo Lietu Yoano 11:33-35
UKULU umue wendamba haeye omisionaliu Yolombangi Via Yehova wa popia hati: “Ocikembe ci lomboloka oku yeva evalo liove vutima wange.” Yehova Suku eye wa velapo koku lekisa ocikembe. Eci omanu vaye va talisiwa ohali, eye o yeva evalo. Ndamupi tu pondola oku ci limbuka? Ocikembe ca Yehova ca lekisiwila kolondaka kuenda kovilinga via Yesu eci a kala palo posi. (Yoano 5:19) Kũlĩhĩsa ulandu u sangiwa kelivulu lia Yoano 11:33-35.
Eci Lasaru, ekamba lia Yesu a fa, Yesu wa endele kimbo lia Lasaru. Maria la Marta, vamukãi va Lasaru, va yeva evalo lialua. Yesu wa va solele calua. (Yoano 11:5) Nye eye a linga? Ulandu waco u tu sapuila hati: “Eci Yesu a mola okuti [Maria] o kasi loku lila, kuenda va Yudea veya laye va lilavo, oco vutima ocikembe co kuata, kuenje wa tokotelua. Yu wa [va] pula hati, Wo langeki pi? Vo kumbumbulula vati, A Ñala, enju, ndo tale. Yesu wa lila.” (Yoano 11:33-35) Momo lie Yesu a lilila? Ocili okuti ndaño Yesu wa kuata unene woku pindula Lasaru, eye wa lila momo wo solele calua. (Yoano 11:41-44) Anga hẽ kua kala ocina cikuavo ca sumuisa Yesu?
Ivaluka olondaka tua tanga konyima. Limbuka okuti eci Yesu a mola Maria lomanu vakuavo va kala oku lila, eye wa “tokotelua” kuenda “wa lila.” Ondaka yaco yi lomboloka oku yeva vutima wetu evalo liomunu umue o tala ohali.a Yesu wa sumuile calua omo liovina a mola. Eci ci limbukiwila koku tokotelua kuenda kasuelẽla a lolula. Ocili okuti Yesu wa yeva evalo lia vakuavo. Anga hẽ ove wa vetiyiwile ale oku lolula asuelẽla poku mola omunu umue o kasi loku lila omo lievalo?—Va Roma 12:15.
Ocikembe ca Yesu ci tu kuatisa oku kũlĩha ovituwa kuenda olonjila via Isiaye, Yehova. Omo lioku lekisa ciwa ovituwa via Isiaye, Yesu wa kuata esunga lioku popia hati: “U wa mola ame haeye wa mola Isia.” (Yoano 14:9) Omo liaco, eci tu tanga hati, “Yesu wa lila,” ci tu ĩha ekolelo liokuti nda afendeli va Yehova va talisiwa ohali eye o yeva esumuo. Asonehi vakuavo Vembimbiliya, va lekisavo ocili caco. (Isaya 63:9; Sakariya 2:8) Yehova Suku o kuete ohenda ya piãla!
Omanu va vetiyiwa oku amẽla komunu ukuacikembe. Eci tu sumua omo liovitangi, tu vetiyiwa oku sapela lomunu o tu yevelela haeye o lekisa ohenda. Omo liaco, tu kuati ukamba wa piãla la Yehova, Suku una wa velapo koku lekisa ocikembe haeye wa kũlĩha evalo lietu.—Osamo 56:8.
[Etosi pombuelo yemẽla]
a Kelimi lio Helasi ondaka “wa lila,” ale oku lolula asuelẽla, yi lomboloka oku lilila vutima. Eci ca litepele loku lila kua Maria kuenda omanu vakuavo momo va kala “oku kaloloka.”