Ndomo Osungu Yolombangi Via Yehova ya Sokiyiwa

OSUNGU Yolombangi Via Yehova, ocimunga Cakristão olombuavekua vana va nõliwa la Suku. Osungu yaco, oyo ocindekaise cukuenje wa kolelua haeye wa lunguka, o kuete ocikele coku eca okulia kuespiritu, loku songuila upange woku kunda Usoma wa Suku palo posi.​—⁠Mat. 24:​14, 45-47.

Osungu Yolombangi Via Yehova ya siata oku linga ohongele yavo olosemana viosi, Votatu. Ohongele yaco yi kuatisa vamanji oku likuata omunga kupange wavo. (Osa. 133:⁠1) Osungu Yolombangi Via Yehova, ya sokiyiwa vovisoko via litepa. Ndomo tu ci konomuisa vovinimbu vi kuãimo, ocisoko locisoko, ci kuete ocikele coku songuila onepa yimue yatiamẽla kupange Wusoma.

◼ OCISOKO CA MITAVASO: Ocisoko caco ca sokiyiwa lolomitavaso viosi viovisoko Viosungu Yolombangi Via Yehova, kuenda usonehi okuti o pangavo onepa Kosungu Yolombangi Via Yehova. Ocisoko caco ci kũlĩhĩsa ndomo ovisoko viosi vi talavaya kuenda ci tambulula ovitangi viosi vi sukila ekuatiso lionjanga ndeci: Elambalalo, ovilemawe, kuenda ovitangi vikuavo Olombangi Via Yehova via siata oku liyaka lavio voluali luosi.

◼ OCISOKO COKU TATA AKUNDI VOTEMBO YOSI: Vamanji va talavaya vocisoko caco, va kuete ocikele coku eca ekuatiso ketimba kuenda konepa yespiritu ku vamanji va talavaya ko Betele voluali luosi. Ci kuetevo ocikele coku nõla vamanji va pondola oku talavaya ko Betele kuenda oku potolola ovitangi viatiamẽla kupange wo Betele.

◼ OCISOKO COKU SANDEKA: Ocisoko eci, ci kuete ocikele coku songuila upange woku panga alivulu a lombolola ovina vi sangiwa Vembimbiliya, loku a sandeka kuenda oku a tuma kolonepa viosi violuali. Ci songuilavo upange woku tata olomakina viñi viñi vioku panga alivulu vi sangiwa kolofiliale vialua Violombangi Via Yehova. Ocisoko caco, ci kuetevo ocikele coku linga esokiyo lioku talavaya ciwa lolombongo via siata oku eciwa oco vi kuatise kupange woku kunda Usoma voluali luosi.

◼ OCISOKO CUPANGE: Vamanji va talavaya vocisoko caco, va kuete ocikele coku songuila upange woku kunda, oku tetulula ovitangi vikuavo viakongelo, viakundi votembo yosi, viakulu vekongelo, kuenda violomitavaso vi nyula akongelo. Ocisoko caco ci kuetevo ocikele coku songuila vamanji va pongiya Upange Wetu Wusoma, oku laleka vamanji va yongola oku enda Kosikola yo Gileada loku va tuma kolofeka vikuavo kuna vaka talavaya, kuenda oku songuila Osikola Yoku Pindisa Olondingupange.

◼ OCISOKO CELONGISO: Ci kuete ocikele coku pongiya ovina viosi vi longisiwa kolohongele vimbo, viofeka, kuenda vakongelo. Ocisoko caco ci sokiya ovina viespiritu vi longisiwa ku vamanji ko Betele, Kosikola yo Gileada, Yakundi Vavelapo, oku pongiya olovideo kuenda olokasete vikuavo.

◼ OCISOKO CASONEHI: Ci kuete ocikele coku songuila oku sonehiwa kuokulia kuespiritu okuti ku kapiwa valivulu kuenda oku ku tumisa ku vamanji kuenda komanu vakuavo. Ocisoko caco ci tambulula apulilo atiamẽla Kembimbiliya loku pongiya ovipama viondalama kuenda olohundo. Ci songuilavo upange woku pongolola alivulu valimi akuavo voluali luosi.

Upostolo Paulu wa sokisa Akristão olombuavekua lovimatamata vietimba. Noke wa lombolola esilivilo liovimatamata viaco viosi, kuenda wa lekisa ndomo vi likuatisa pokati locisola koku linga upange wa Suku. (Va Rom. 12:​4, 5; 1 Va  Kor. 12:​12-​31) Yesu Kristu, Utue wetimba liaco, wa siata oku eca ekuatiso li sukiliwa oco ovimatamata viaco vi talavayele kumuamue loku likuatisa pokati kuenda oku litekula ciwa konepa yespiritu. (Va Efe. 4:​15, 16; Va Kol. 2:​19) Omo liaco, Osungu Yolombangi Via Yehova ya sokiyiwa ciwa koku songuila upange wa Yehova osimbu va kuatisiwa lespiritu sandu liaye.