Ulandu wa Noha Kuenda Wetande Wocili
ANGA hẽ o yongola oku kala voluali lumue okuti ka muli uyaki, ungangala kuenda efuki? Nda oco, o pondola oku sanga elembeleko kulandu umue wa kũlĩhĩwa ciwa. Ulandu waco, wa Noha, ulumue umue wa tungile ocimbaluku, kuenje eye kumue lepata liaye va popeliwa ketande lia kundula olondingaĩvi viosi.
Kuli ovolandu alua ka a kũlĩhĩwile ciwa. Pole, ulandu wa Noha u sangiwa kelivulu Liefetikilo kocipama 6 toke 9. Ulandu waco u sangiwavo vo Alkorão kuenda wa siata oku tukuiwa lapata a tunga kilu lieve ndolusapo. Anga hẽ ulandu Wetande wocili muẽle, ale olusapo luaño luoku vetiya omanu oku linga eci ca sunguluka? Alongisi vatavo kumue lolonoño, va siata oku konomuisa ulandu waco vokuenda kuanyamo alua. Embimbiliya, okuti Ondaka ya Suku, li lekisa okuti ulandu waco wocili. Tu konomuisi esunga liaco:
Ulandu u sangiwa kelivulu Liefetikilo u tu sapuila unyamo, losãi kuenda eteke Etande lia fetika, otembo lopocitumãlo ocimbaluku ca saka, leci ovava a takata. Ulandu waco u lekisavo ndomo ocimbaluku ca tungiwa, oku tanda kuaco kuenda ovina va ci tunga lavio. Pole, asapulo lalusapo oluali, poku lombolola ulandu waco a siata oku lipatãla.
Vembimbiliya mu sangiwa ovolandu avali a lekisa okuti Noha ka kaile omunu woku luvikiya. (1 Asapulo 1:4; Luka 3:36) Esera la Luka, va konomuisa ciwa ulandu waco oco va sonehe ocikoti cepata liaco. Luka wa lekisa okuti Yesu Kristu wa citiwila kocikoti ca Noha.
Uprofeto Isaya la Esekiele kuenda ovapostolo Paulu la Petulu va tukulavo ulandu wa Noha kuenda Etande.—Isaya 54:9; Esekiele 14:14, 20; Va Heveru 11:7; 1 Petulu 3:19, 20; 2 Petulu 2:5.
Yesu Kristu wa tukula ulandu Wetande poku popia hati: “Ndeci ca kaile koloneke via Noha haico ci kala koloneke via Mõlomanu. Va lia lia, va nyua nyua, va likuela kuela, va kuelaisa, toke keteke Noha a wila vocimbaluku, kuenje etande lieya, lia va nyõla vosi.” (Luka 17:26, 27) Nda ulandu Wetande ka wa kaile wocili, olondaka evi via Yesu viatiamẽla “koloneke via Mõlomanu” nda ka via kuatele esilivilo.
Upostolo Petulu wa popele okuti ku keya “vakuetombo” va pengisa eci Embimbiliya li longisa. Petulu wa soneha hati, “Va ivalako okuti . . . loluali lua kaile koloneke [via Noha] lua nyõliwa lovava kuenje lua taka.” Anga hẽ tua siata oku “ivalako” ovolandu aco? Sio, ka tua siatele! Petulu wamisako hati: “Ilu li kasi ndeti longongo ya angiliyiwila ondalu, yi tãilili eteke liekanga hailio lioku nyõleha kuomanu va tomba Suku.”—2 Petulu 3:3-7.
Suku oka nyõla olondingaĩvi, pole kuka kala ava vaka popeliwa. Nda tua kuama ongangu ya Noha, tuka kala pokati komanu vana vaka popeliwa haivo vaka kala voluali lumue lua posoka.