Endela Vespiritu Kuenda Tẽlisa Elitumbiko Liove
“Endaendi le espiritu oco ko lingi ocipango cetimba.”—VA GAL. 5:16.
1. Epapatiso lipi lia lingiwa keteke lio Pendekoste?
OLONDONGE via Yesu via vangula alimi aiñi aiñi keteke lio Pendekoste yunyamo wa 33 K.K., noke lioku papatisiwa lespiritu sandu. Kuenje, via kuata ongavelo yespiritu. (1 Va Kor. 12:4-10) Ongavelo yaco kumue lohundo Petulu a linga ya vetiya ndati omanu? Valua “va tomiwa vovitima.” Elungulo lia Petulu lia va vetiya oku likekembela, kuenje va papatisiwa. Ulandu waco u popia hati: “Ava va tava kondaka yaye va papatisiwa, kuenje eteke liaco kua vandeka ca soka ndolohũlũkãi vitatu viomanu.” (Ovil. 2:22, 36-41) Ndeci Yesu a handelekele, ovo va sesamẽlele oku papatisiwa vovava vonduko ya Tate la Mõla kuenda yespiritu sandu.—Mat. 28:19.
2, 3. (a) Lombolola oku litepa ku kasi pokati koku papatisiwa lespiritu sandu, kuenda oku papatisiwa vonduko yespiritu sandu. (b) Koloneke vilo momo lie Akristão vocili va sukilila oku papatisiwa vovava?
2 Anga oku papatisua lespiritu sandu, ca litepa loku papatisiwa vonduko yespiritu sandu? Ca litepa. Omanu va papatisiwa lespiritu sandu, va citiwa evali ndomãla va Suku konepa yespiritu. (Yoa. 3:3) Ovo va nõliwila oku kala olosoma kuenda ovitunda Vusoma wa Suku kilu, haivo va panga onepa ketimba lia Kristu konepa yespiritu. (1 Va Kor. 12:13; Va Gal. 3:27; Esit. 20:6) Omo liaco, tunde keteke lio Pendekoste toke koloneke vilo, Yehova wa sokiyila vamue oku papatisiwa lespiritu sandu oco va ka viale kumue la Kristu. (Va Rom. 8:15-17) Oco hẽ, oku papatisiwa vovava vonduko yespiritu sandu ndeci ci lingaiwa kolohongele vinene viafendeli via Yehova koloneke vilo, ci lomboloka nye?
3 Oku papatisiwa vovava, ocindekaise cokuti Ukristão wocili wa litumbika ku Yehova Suku lutima waye wosi. Haico ci popiwa komanu va kuete elavoko lioku enda kilu. Olohuluwa viomanu va kuete elavoko lioku tambula omuenyo ko pui palo posi, va sukilavo oku papatisiwa vovava. Ci kale okuti omunu o kuete elavoko lioku enda kilu ale lioku kala palo posi, oku papatisiwa vovava vonduko ya Tate la Mõla, kuenda espiritu sandu, olio enanga va sesamẽla oku eca oco va taviwe la Suku. Akristão vosi va papatisiwa, va sukila oku ‘endaenda lespiritu.’ (Tanga Va Galatia 5:16.) Ove hẽ o kasi oku endela vespiritu loku tẽlisa elitumbiko liove?
Ceci ci Lomboloka Oku ‘Endaenda Lespiritu’
4. Oku ‘endaenda lespiritu’ ci lomboloka nye?
4 Voku ‘endaenda lespiritu,’ mua kongela oku ecelela oku kuatisiwa lespiritu sandu, loku vetiyiwa lunene walio. Ci lomboloka oku songuilua lalio eteke leteke. Elivulu lia va Galatia ocipama 5 ci lekisa oku litepa ku kasi pokati koku vetiyiwa lespiritu sandu kuenda oku vetiyiwa lovilinga vietimba.—Tanga Va Galatia 5:17, 18.
5. Voku songuilua lespiritu sandu mua kongela oku yuvula ovituwa vipi?
5 Nda ove o kasi oku songuilua lespiritu sandu, o likolisilako oku yuvula ovilinga vietimba. Vovilinga viaco mua kongela “ukahonga, evĩho, ohumba, oku fendela oviteka, owanga, asuvu, ema, onya, olonyeño, ocipululu, olonamalala, olonepele, oku livela, ovoholua, ayele.” (Va Gal. 5:19-21) Eci ci lomboloka okuti o kasi oku ‘ipaya ovilinga vietimba lespiritu.’ (Va Rom. 8:5, 13) Eci ci ku kuatisa oku kapako ovina viespiritu, loku tava oku songuilua lalio okuti oku vetiyiwa lolonjongole vietimba hacoko.
6. Tukula ocindekaise ci lekisa eci ci sukiliwa oco espiritu liece epako vomuenyo wetu.
6 Osimbu o kuatisiwa lespiritu sandu, o ka lekisa ovituwa viwa okuti, “epako lie espiritu.” (Va Gal. 5:22, 23) Oco o lekise ovituwa viaco, te wa likolisilako. Ocindekaise: Eci ongunja yi lima epia liaye, oco ovikũla vi kule ciwa te vi tambula ovava kuenda owuya wutanya. Espiritu sandu li sokisiwa lutanya. Tu sukila espiritu sandu oco tu lekise epako liespiritu. Nda ongunja ka yi likolisilako yi ko ungula hẽ? (Olosap. 10:4) Oco o tẽle oku ungula epako liespiritu sandu vomuenyo wove, te wa likosilako oku lima osi yutima wove. Lipula ndoco: ‘Ñasi hẽ oku ecelela espiritu sandu oku eca epako vomuenyo wange loku tava oku songuilua lalio?’
7. Momo lie oku lilongisa loku sokokola ovina wa tanga, ci kuetele esilivilo koku kuata epako liespiritu sandu?
7 Ongunja ka yungula ciwa, nda ka yi tapela ovikũla viaye. Oco o kuate epako liespiritu, o sukila ovava ocili a sangiwa Vembimbiliya kuenda vekongelo Liakristão. (Isa. 55:1) Poku kundila omanu, va sapuila okuti Ovisonehua vi Kola, via sonehiwa lekuatiso liespiritu sandu. (2 Tim. 3:16) Va sapuilavo okuti, ocisoko cukuenje wa kolelua haeye wa lunguka, ci kuataisa omanu oku kuata elomboloko liocili ci sangiwa Vembimbiliya. (Mat. 24:45-47) Ondaka eyi ya tu lomboloka ciwa. Oco tu kuatisiwe lespiritu sandu, te tua tanga loku sokolola eci tua konomuisa Vondaka ya Suku. Nda wa ci linga, o setuluka ongangu yovaprofeto “va sandiliya loku puliliya” esapulo va tambuile. Ndaño muẽle ovangelo, va lekisa onjongole yoku kũlĩha ovina viespiritu viatiamẽla Kombuto ya likuminyilue kuenda kekongelo Liakristão olombuavekua.—Tanga 1 Petulu 1:10-12.
Ndamupi tu Kuatisiwa Lespiritu?
8. Momo lie ci kuetele esilivilo oku pinga ku Yehova espiritu liaye?
8 Voku kuatisiwa lespiritu ka mua kongelele lika oku lilongisa Ovisonehua loku sokolola eci tua tanga. O sukila oku amamako oku pinga ekuatiso ku Yehova oco a ku songuile. Eye o tẽla oku “linga eci ca piãla, okuti eci tu pinga, pamue eci tu sima, ci sule.” (Va Efe. 3:20; Luka 11:13) Nda umue wa ku pulisa hoti: “Momo lie ndi likutililila ku Suku nda eye ‘wa kũlĩha ale ovina ndi sesamẽla osimbu sia vi pingile,’” nda wo tambulula ndati? (Mat. 6:8) Esunga liaco lieli okuti, poku pinga espiritu sandu, ove o kasi oku lekisa okuti wa kolela Yehova. Nda umue o ku pinga ekuatiso, o likolisila oku linga eci o tẽla oco u kuatise momo eye wa ku kolela. (Ci sokisa Lolosapo 3:27.) Cimuamue haico, Yehova o sanjuka calua eci o pinga espiritu liaye, kuenje o tambulula epingilo liove.—Olosap. 15:8.
9. Oku endaenda kolohongele ci ku kuatisa ndati oku songuilua lespiritu lia Suku?
9 Onjila yikuavo yoku kuatisiwa lespiritu lia Suku, oku endaenda kolohongele viekongelo, vio vimbo levi vi likasi, kuenda kolohongele viofeka. Oku likolisila oku endaenda kolohongele viaco loku yevelela lutate ovipama, ci kuete esilivilo. Nda wa ci linga, o ka kuata elomboloko ‘liovina via longa via Suku.’ (1 Va Kor. 2:10) O pondolavo oku kuatisiwa poku kuata ocituwa coku eca atambululo kolohongele. Sokolola olohongele wa endele kolosemana vikuãla via pita. Olonjanja viñami wa votola eka loku eca atambululo, oco o lekise ekolelo liove? Kuli hẽ ovina vimue o sesamẽla oku lemulula? Nda oco, likolisilako oku ci linga volosemana viya. Yehova o ka limbuka onjongole o kuete yoku linga onepa kolohongele, kuenje o ka ku ĩha espiritu sandu liaye, lina li ku kuatisa eteke leteke.
10. Voku endela vespiritu, mua kongela oku eca elaleko lipi komanu?
10 Voku endela vespiritu mua kongela oku tava kelaleko li sangiwa kelivulu Liesituluilo 22:17: “Espiritu la ndombua va linga vati, Enju. U o yeva a linge hati, Enju. U o kuete enyona eye, lu wa yongola ovava omuenyo a a tambule ocali.” Espiritu li vetiya ocisoko ca ndombua oku laleka omanu ha va nyui kovava omuenyo. Nda wa tava ale kelaleko liokuti “Enju,” o kasi hẽ oku sapuilako vakuene hati, “enju”? Oku panga onepa kupange waco, esumũlũho linene!
11, 12. Espiritu sandu li tu kuatisa ndati kupange woku kunda?
11 Upange waco u kasi oku songuilua lespiritu sandu. Tua kũlĩha ndomo espiritu sandu lia kuatisa olomisionaliu oku talavaya vovikanjo viokaliye kocita catete. Upostolo Paulu kumue lakamba vaye, “va tatekiwa le espiritu sandu oku kundila ondaka va Asia,” kuenda va Bitunia. Ka tua kũlĩhile ndomo espiritu lia va tateka oku enda kovikanjo viaco, puãi espiritu lia vetiya Paulu oku enda kovikanjo vio ko Europa. Vocinjonde caye wa mola ulume u Makedonia wa kala oku pinga ekuatiso.—Ovil. 16:6-10.
12 Koloneke vilo, espiritu lia Yehova li kasi oku songuila upange woku kunda voluali luosi. Yehova ka tu kuatisa lovinjonde, pole o tu songuila lespiritu sandu. Espiritu li vetiya vamanji alume lakãi oku tẽlisa upange woku kunda loku longisa. Ocili okuti ove o lingaingavo upange waco. Anga hẽ o pondola oku vokiya esanju liove kupange waco?
13. Ndamupi o pokola kolonumbi vi eciwa lekuatiso liespiritu sandu? Tukula ulandu umue.
13 Ove o lekisa okuti o kasi oku songuilua lespiritu sandu, poku kapako olonumbi Suku a ecaeca kafendeli vaye. Konomuisa ulandu wumalẽhe Mihoko kofeka yo Japãu. Eci a litumbika kupange wotembo yosi, wa simile okuti ka tẽla oku linga epasu momo co tĩlile calua oku vetiya ovitima viomanu vocikanjo. Kotembo yaco, Upange Wetu Wusoma wa ecele olonumbi vimue vioku linga epasu. Noke kua sandekiwa ombrochura yi tukuiwa hati, Como Ter uma Vida Satisfatória. Oyo, ya kuatisa calua omanu vocikanjo kofeka yo Japãu. Mihoko wa kapako olonumbi viaco, capiãla enene vina vi lekisa ndomo epasu li lingiwa. Eye wa fetika oku longisa Embimbiliya komanu valua a lingile epasu. Eye wa popia hati: “Nda kuatele eci ci pitahãla 12 kolondonge, pole vakuavo nda va tuma oku kevelila toke eci ndi sanga evelo!” Nda wa endela vespiritu poku kuama olonumbi vi eciwa kafendeli va Yehova, o ka kuata asumũlũho alua.
Kolela Kespiritu Lia Suku
14, 15. (a) Omanu ka va lipuile, va pondola ndati oku tẽlisa elitumbiko liavo? (b) Ndamupi o kuata akamba vawa?
14 Omo ove wundingupange, o sesamẽla oku tẽlisa upange wove. (Va Rom. 10:14) Pamue o sima okuti ku tẽla oku linga upange waco. Pole, Suku eye o ku kuatisa ndeci a lingainga lolombuavekua. (Tanga 2 Va Korindo 3:5.) Ove o pondola oku tẽlisa elitumbiko liove poku amamako oku kolela kespiritu lia Suku.
15 Ocili okuti, ka ca lelukile oku kapako elitumbiko tua linga ku Yehova Suku yetu, momo ka tua lipuile. Omo okuti omanu vamue ka va kuete elomboloko liomuenyo o kasi oku ambata, pamue va ku ‘fũkĩlisa’ lolondaka vi sumuisa. (1 Pet. 4:4) Pole, limbuka okuti ukamba wokaliye o kuete la Yehova kuenda Yesu Kristu, owo wa velapo. (Tanga Tiago 2:21-23.) O sesamẽlavo oku kũlĩha vamanji alume lakãi vekongelo liove, omo va panga onepa komanu tua vetiyiwa oku ‘sola’ voluali luosi. (1 Pet. 2:17; Olosap. 17:17) Yehova oku kuatisa lespiritu liaye oco o kuate akamba va ku vetiya konepa yespiritu.
16. O pondola ndati oku “sanjukila oku pekengua” ndeci ca pita la Paulu?
16 Ndaño okuti o kuete akamba valua vekongelo, ka ca lelukile oku liyaka lovitangi vieteke leteke. Ovitangi viaco vi ku sumuisa, kuenda o sima okuti ovio ka vi imuha vali. Omo liaco, ci kuete esilivilo oku pinga ekuatiso ku Yehova oco a ku ĩhe espiritu liaye. Upostolo Paulu wa soneha hati: “Eci nda pekengua, oco ñuete ongusu.” (Tanga 2 Va Korindo 4:7-10; 12:10.) Paulu wa kũlĩhile okuti espiritu lia Suku lieca unene komanu va pekengua. Kuenje ongusu ya pama ya Suku, yi ku kuatisa oku liyaka lovitangi viosi, capiãla enene nda wa hongua. Paulu wa soneha hati, “sanjukila oku pekengua.” Eye wa limbukile okuti espiritu sandu, lia enda oku u kuatisa eci a honguele. Eci ci pondolavo oku pita love!—Va Rom. 15:13.
17. Espiritu sandu li ku kuatisa ndati oku endela vonjila ya sunguluka?
17 Tu sukila espiritu lia Suku oco tu tẽlise elitumbiko tuo lingila. Sokolola okuti ove usongui wocimbaluku. Ocimãho cove oku vumba Yehova otembo yosi. Espiritu sandu li sokisiwa lofela yi koka ocimbaluku toke oku wa loña. Ove ku yongola okuti ocimbaluku cove ci kokiwa lofela yĩvi—espiritu lioluali lua Satana. (1 Va Kor. 2:12) O sukila oku limbuka oku ku tunda ofela yiwa oco yi ku songuile. Ofela yaco, espiritu sandu. Lekuatiso Liondaka ya Suku locisoko caye, espiritu sandu li ku songuila vonjila ya sunguluka.
18. Ocimãho cipi o kuete cilo, kuenda momo lie?
18 Nda o kasi oku lilongisa Lolombangi via Yehova kuenda o kuete ukamba lavo, pole, kua litumbikile handi loku papatisiwa, lipula ndoco: ‘Momo lie ndi susõhãila?’ Nda wa limbuka kuenda wa sanjukila ocikele cespiritu sandu koku tẽlisa ocipango ca Yehova, eca ananga a lekisa okuti wa kapako ovina o kasi oku lilongisa. Yehova o ka ku sumũlũisa poku ku ĩha espiritu sandu. Nda wa papatisiwa ale osimbu, ocili okuti wa siata oku kuatisiwa lespiritu sandu, kuenje wa limbuka ndomo Suku a ku pamisa lespiritu liaye. Eye o ka amamako oku ci linga nda wa kuata ocimãho coku endela vespiritu sandu otembo yenda ño hũ.
Ivaluka Eci Tua Lilongisa?
• Oku ‘endaenda lespiritu’ ci lomboloka nye?
• Nye ci ku kuatisa oku ‘endaenda lespiritu’?
• O pondola oku tẽlisa ndati elitumbiko liove?
[Elitalatu kemẽla 15]
O sukila oku likolisilako oku lima osi yutima wove
[Elitalatu kemẽla 17]
O kasi hẽ oku kuatisiwa lespiritu lia Suku?