Uhembi Kuenda Ocili Catiamẽla Ku Yesu

NYE OVE O SIMA? ANGA HẼ OVOLANDU A KUÃIMO NDETI, OCILI ALE ESANDA?

Yesu wa citiwa keteke 25 ya Cembanima.

Olonoño vitatu via nyula Yesu eci a citiwa.

Yesu ka kuatele vamanjaye.

Yesu, wa kala Suku wa lipongolola vetimba liositu.

Yesu wa kala ño ulume umue uwa.

OMANU valua, pamue va tava okuti olondaka evi, viocili. Vakuavo pamue va popia vati, ca tĩla kuenda ka ci tẽliwa oku sanga etambululo liocili liatiamẽla kondaka eyi. Pamue va sima okuti, omo ovo va tava ale ku Yesu atambululo aco ka a kuete vali esilivilo lialua.

Pole, Embimbiliya li lekisa ocisimĩlo ca litepa. Olio li tu vetiya oku kuata “ukũlĩhiso woku kũlĩha Ñala yetu Yesu Kristu.” (2 Petulu 1:8) Tu pondola lika oku kuata ukũlĩhĩso waco poku konomuisa Avanjeliu. O-o, a situlula ocili catiamẽla ku Yesu kuenda a tu kuatisa oku tepisa ocili luhembi. Omo liaco, tu konomuisi eci Avenjeliu a lombolola catiamẽla kalongiso ava.

ELONGISO: Yesu wa citiwa keteke 25 ya Cembanima.

OCILI ALE UHEMBI?

Embimbiliya ka li tukula eteke pamue osãi Yesu a citiwa. Oco hẽ pi kua tunda eteke 25 ya Cembanima? Elivulu limue li tukuiwa hati, Encyclopædia Britannica, lia lombolola okuti omanu vana va litukuile okuti Akristão, “va nõla eteke limue li likuata locipito ca enda oku lingiwa ko Roma ... poku sivaya ekumbi eci lia enda oku tumãla oku iñila.” Elivulu liaco, lia popia okuti ovituwa vialua viatiamẽla Konatale “via tunda kafendeli vosuku yunja kuenda koku sambiliya oku iñila kuekumbi.”

Anga hẽ Yesu o sanjukila oku sambiliya eteke liaye lioku citiwa keteke 25 ya Cembanima? Kũlĩhĩsa okuti: Lomue wa kũlĩha eteke Yesu a citiwa. Vovisonehua ka mu sangiwa onumbi yimue yi tu vetiya oku sambiliya oku citiwa kuaye, kuenda ka kuli uvangi u lekisa okuti Akristão vatete va enda oku ci linga. Pole, Embimbiliya li tukula lika olofa via Yesu kuenda li handeleka olondonge viaye oku ivaluka eteke liaco.a (Luka 22:19) Yesu ka handelekele oku ivaluka oku citiwa kuaye, pole wa tuma oku velisapo eteke liaye liolofa.—Mateo 20:28.

ELONGISO: Olonoño vitatu, (ale olosoma ndomo ca lomboluiwa vasapulo amue) via nyula Yesu keteke a citiwa.

OCILI, ALE UHEMBI?

Pamue ove wa siata oku mola oviluvialuvia vi lekisa eci Yesu a citiwa okuti wa pekelisua vocililo colongombe haeye wa ñualiwa lolonoño vitatu vieya oku u nenela olombanjaile. Pole, oviluviavia viaco haviociliko, viuhembi.

Ocili okuti, Kutundilo kua tundile alume veyile oku eca olombanjaile ku Yesu. Omanu vaco, vakuakutanga olombungululu. (Mateo 2:1, 2) Anga hẽ, va sangele muẽle Yesu vocililo covinyama? Sio, ovo vo sanga konjo yimue. Eci va pitĩla, pa pitile ale olosãi vimue tunde poku citiwa kua Yesu.—Mateo 2:9-11.

Anga hẽ omanu vana veyile oku u nyula va kala vavali, vatatu ale, va kala akũi atatu komanu? Embimbiliya ka li tukula etendelo liavo. Etendelo eli, citava okuti lia simiwa omo liolombanjaile viavo vitatu via litepa va eca kokuaye.b (Mateo 2:11) Vamue va siata oku popia okuti olonoño viaco vitatu, vi lomboloka apata añi añi omanu va kasi voluali. Pole, ovisimĩlo evi ka vi sangiwa Vovisonehua. Ulume umue ukuakukonomuisa Avanjeliu, wa popia hati, ovisimĩlo viaco viesanda, via fetika “kocita ecelãla noke yoku sokolola kualua.”

ELONGISO: Yesu ka kuatele vamanjaye.

OCILI, ALE UHEMBI?

Uvangi wokuti Yesu wa kuata vamanjaye valume lakãi, wa lekisiwa Vavanjeliu. Evanjeliu lia Luka poku tukula Yesu okuti “omõla uveli” wa Maria, ci lekisa okuti Maria weya oku kuata vali omãla vakuavo.c (Luka 2:7) Evanjeliu lia Marko li lekisa okuti omanu vamue vo kolupale luo Nasara, ka va tendele Yesu ndomunu umue wa velapo, momo vo sokisile la vamanjeye. Ovo va pula vati: U hẽ hayeko “huva a Tiago la Yose kuenda Yuda la Simono? Vamukãi vaye hẽ, ka va kasi letu kulo?”—Mark 6:3; Mateo 12:46; Yoano 7:5.

Avanjeliu ndaño a lombolola okuti Yesu wa kuata vamanjaye, pole, alongisi vamue va kasi oku amamako lovisimĩlo viokuti ka kuatele vamanjaye. Vamue va popia hati vamanji va Yesu va tukuiwa ndeti vepulilo, va lomboloka apalume vaye.d Vakuavo, va popia okuti omãla vaco va kala olongenda la isia ku Maria. Sokolola ndoco: Nda Yesu eye wa kaile lika omõla a Maria, anga hẽ olonungi vio ko Nasara nda via popia olondaka evi? Sio, momo vamue va mola eci Maria a cita omãla vaco. Ovo va kũlĩhĩle okuti Yesu, wa kala umue pokati komãla valua va Maria.

ELONGISO: Yesu, Suku wa lipongoluile vetimba liositu.

OCILI, ALE UHEMBI?

Ocisimĩlo cokuti Suku eye weyile kilu lieve kuenje wa linga omunu loku tukuiwa hati Yesu ndomo ca siata oku popiwa kelongiso lia Suku Umosi Muvatatu, ca tunda kosimbu. Pole, elongiso liaco ka lia fetikile kotembo Yesu a kala palo posi. O Encyclopædia Britannica, yi lekisa okuti: “Elongiso lia Suku Umosi Muvatatu, ka li sangiwa Votestamentu yo Kaliye ... Elongiso liaco, lia fetika oku sandekiwa vokuenda kuanyamo kuenda lia siata oku patãliwa lomanu valua.”

Koloneke vilo, atavo a siata oku sepula Yesu omo lielongiso liokuti, wa kala Suku wa lipongolola vetimba liositu.e Ndamupi? Kũlĩhĩsa ocindekaise eci: Olonalavayi vimue vi enda kusongui wavo, kuenje viu pinga ovina va sukila, pole usongui waco o va sapuila okuti ka kuete omoko yoku va ĩha eci ovo va pinga. Nda olondaka viusongui waco viocili, ci lekisa okuti wa kũlĩha okuti ka kuete omoko ya velapo. Pole, nda olondaka viusongui waco haviociliko kuenje o likuminya oku va ĩha eci va pinga osimbu ka kuete epondolo liaco, o linga ohembi.

Nye Yesu a linga eci ovapostolo vamue vavali vo pingile oco a va kape komangu yekemãlo? Eye wa va sapuila hati: “Oku tumala kondio yange lo kepĩli liange hacangeko oku ceca, puãi, cava ca va angiliyiwila la Tate.” (Mateo 20:23) Nda Yesu wa kaile Suku, olondaka evi hẽ, ka vi lekisa okuti viuhembi? Yesu poku tukula U o kuete unene, wa eca ongangu yiwa yeliketiso, kuenda wa lekisa okuti ka lisokele la Suku.

ELONGISO: Yesu wa kala ño ulume umue uwa.

OCILI, ALE UHEMBI?

Yesu wa lombolola okuti ka kaile lika omunu umue uwa. Eye wa popia hati: “Ndimõla a Suku.” (Yoano 10:36) Omunu umue citava okuti o popiavo hati Ndimõla a Suku. Pole, nda ondaka ya Yesu ya kaile yuhembi, nda wa tendiwa ndati? Eye nda ka tendiwile okuti omunu uwa. Nda wa tendiwa okuti, ohembi yimue yinene!

Uvangi wa velapo watiamẽla ku Yesu, wa tunda ku Suku. Eye volonjanja vivali, wa tukula Yesu hati: “U, Eye Omõlange.” (Mateo 3:17; 17:5) Sokolola ndoco: Ovisonehua vi lekisa lika olonjanja viñamiñami eci ondaka ya Suku ya yeviwa lomanu palo posi. Vimue pokati kolonjanja viaco, ceci eye a popia hati, Yesu Omõlange! Olondaka viaco, vieca uvangi wa velapo watiamẽla ku Yesu.

Anga hẽ ocipama cilo ca situlula ovina vimue viocili viatiamẽla ku Yesu okuti tete kua vi kũlĩhĩle? Nda oco, momo lie ku konomuisila lutate ovolandu a sangiwa Vavanjeliu? Oku lilongisa ovolandu aco, ci ku nenela esanju kuenda asumũlũho alua. Handi vali, Yesu wa popia hati, oku lilongisa ocili catiamẽla kokuaye kuenda ku Isiaye, ci tuala ‘komuenyo ko pui.’—Yoano 17:3.

[Atosi pombuelo yamẽla]

[Okakasia Lelitalatu kemẽla 14]

Ovina Vikuavo Viocili Okuti Pamue vi ku Komõhisa

Yesu wa tuwile hẽ ndati? Anga wa kala omunu umue ka kuete ohenda, wa tema, haeye ka kapeleko omanu vaño? Vamue va sima hati, oco a tuwile. Pamue, eli olio esunga lieci va komõhela poku lilongisa okuti Yesu ...

• wa endaele kovipito.—Yoano 2:1-11.

• wa enda oku pandiya vakuavo.—Marko 14:6-9.

• wa solaile oku kala kumue lomãla.—Marko 10:13, 14.

• wa lila.—Yoano 11:35.

• wa lekisa ohenda komanu.—Marko 1:40, 41.