Ecelela Elimi Liove Oku Laviwa ‘Locisola Ka Ci Pui’

“Asama omẽla waye lolondunge; alungulo ohenda a kasi kelimi liaye.”—OLOSAP. 31:26.

1, 2. (a) Ocituwa cipi afendeli va Yehova va vetiyiwa oku kuata? (b) Nye tu ka konomuisa vocipama cilo?

VELUNGULO Soma Lemuele a tambuile ku inaye, mua kongelele ovituwa ukãi wocili a sukila oku kuata. Eye vo sapuila hati: “Asama omẽla waye lolondunge; alungulo ohenda a kasi kelimi liaye.” (Olosap. 31:1, 10, 26) Akãi vakualondunge lomanu vakuavo va yongola oku sanjuisa Yehova Suku, va vetiyiwa oku lekisa ocisola ka ci pui poku vangula. (Tanga Olosapo 19:22.) Afendeli vosi vocili lavovo va vetiyiwa oku lekisa ocisola ka ci pui poku vangula.

² Ocisola ka ci pui ci lomboloka nye? Ku velie tu sesamẽla oku lekisa ocisola caco? Nye ci tu kuatisa oku lekisa ocisola ka ci pui kupopi wetu? Ocituwa caco ci tu kuatisa ndati oku sapela ciwa la vakuepata lietu kuenda vamanji Akristão?

Ceci Ohenda yi Vetiyiwa Locisola ka ci Pui

3, 4. (a) Ocisola ka ci pui ci lomboloka nye? (b) Ocisola ka ci pui ca litepa ndati lohenda?

³ Vocisola ka ci pui, mua kongela oku lekisa ocisola kuenda ohenda. Vohenda, mua kongela oku lekisa onjongole ku vakuetu kuenda oku va kuatisa lovilinga lo kolondaka. Omo okuti ocisola ci kuetevo esilivilo, ocisola ka ci pui, ci tu vetiya oku kuatisa vakuetu oku kala ciwa. Pole, kelimi lio Helasi ondaka ocisola ka ci pui, ka yi lomboloka lika oku lekisa ohenda locisola. Ocisola ka ci pui, ci lombolokavo oku lekisa onjongole lohenda komunu umue loku kakatela kokuayo toke eci ocimãho cayo ci tẽlisiwa.

⁴ Ocisola ka ci pui, ca litepa locisola kuenda ohenda. Momo ohenda citava okuti yi lekisiwa komanu ka tua kũlĩhĩle. Eci upostolo Paulu kumue leci ci soka 275 komanu va puluka eci onaviyu va kala oku endela ya vomba, olonungi viokacifuka ko Melita via lekisa ohenda kokuavo, ndaño ka va va kũlĩhĩle. (Ovil. 27:37–28:2) Pole, ocisola ka ci pui, ci lekisiwa lika pokati komanu va li kũlĩha ale.a Eci oco ocisola va Keni ‘va lekisa ku va Isareli eci va kala oku tunda Kegito.’—1 Sam. 15:6.

Esilivilo Lioku Sokolola Lutate Kuenda Olohutililo

5. Nye ci tu kuatisa oku lava upopi wetu?

⁵ Ocili okuti, oku lekisa ocisola ka ci pui kupopi wetu ka ca lelukile. Poku tukula ndomo elimi lia tuwa, ndonge Tiago wa soneha hati: “Elimi puãi, lomue omunu o tela oku li pokuisa, lie yuka owule u koka okufa.” (Tia. 3:8) Nye ci tu kuatisa oku lava ocimatamata eci cetimba ca tatama ndeti? Olondaka Yesu a sapuila asongui vetavo kocita catete vi tu ĩha olondunge. Eye wa popia hati: “Momo eci ca siata vutima oco omẽla u popia.” (Mat. 12:34) Oco ocisola ka ci pui ci lave upopi wetu, tu sukila oku kulisa ocituwa caco vutima wetu, okuti ekalo liutima wetu. Tu kũlĩhĩsi ndomo oku sokolola lutate kuenda olohutililo vi tu kuatisa oku ci linga.

6. Momo lie tu sukilila oku sokolola ovilinga viocisola ka ci pui via Yehova?

⁶ Embimbiliya li lekisa okuti, Yehova Suku ‘ukuacisola ka ci pui.’ (Etu. 34:6) Ukualosamo wa imba hati: “Kilu lieve, a Yehova, kue yuka ocisola cove ka ci pui.” (Osa. 119:64) Vovisonehua mu sangiwa ovolandu alua a lombolola ndomo Yehova a lekisa ocisola ka ci pui kafendeli vaye. Oku sanda otembo yoku sokolola ‘ovilinga via Yehova’ ci tu vetiya oku kuata onjongole yoku lekisa ovituwa via Suku.—Tanga Osamo 77:12.

7, 8. (a) Yehova wa lekisa ndati ocisola ka ci pui ku Lote lepata liaye? (b) Daviti wa liyeva ndati omo liocisola ka ci pui Suku o lekisa?

⁷ Sokolola ndomo Yehova a yovola Lote ocimumba ca Avirahama kuenda epata liaye eci Eye a kundula imbo lio Sodoma, muna ovo va tungile. Omo va kala oku cilua, ovangelo va lungula Lote lepata liaye oco va siepo lonjanga imbo liaco. Embimbiliya li tu sapuila hati: “Eye haimo wa simũlapo; ovalume va kuata peka eye muẽle Lote, lukãi waye, lomãla vaye vavali vakãi, momo Yehova wo kuatela ohenda, kuenje vimbo vo wupamo, vo talamisa kofeka konẽle yimbo.” Ovitima vietu ka vi vetiyiwa hẽ poku sokolola kelinga liaco, kuenda ndomo Suku a lekisa ocisola ka ci pui vulandu owu?—Efet. 19:16, 19.

⁸ Sokololavo ulandu wa Soma Daviti wo ko Isareli, eci a imba hati: “[Yehova] ecela akandu ove osi. O sakula ovoveyi ove osi.” Daviti wa lekisa olopandu viocili eci ekandu a linga la Bate-Sieva lia ecelua. Eye wa kemãlisa Yehova poku imba hati: “Ndeci kilu kua lepa loposi haico ocisola caye ka ci pui kuava vo sumbila.” (Osa. 103:3, 11) Nda tua sokolola lutate ulandu owu lovolandu akuavo a sangiwa Vovisonehua, ovitima vietu vi vetiyiwa oku eca olopandu kocisola ka ci pui ca Yehova, kuenda oku kemãlisa onduko yaye. Onjila ya velapo yoku lekisa olopandu viocili oku setukula ongangu ya Suku yetu.—Va Efe. 5:1.

9. Momo lie afendeli va Yehova va vetiyiwila oku lekisa ocisola ka ci pui komuenyo wavo?

⁹ Ovolandu a sangiwa Vovisonehua a eca uvangi wokuti Yehova o lekisa lika ocisola caye ka ci pui komanu vana va kuete ale ukamba laye. Oco hẽ, nye ci popiwa komanu vana va liwekapo oku livala ukamba la Suku? Anga hẽ Yehova ka lekisa vali ocikembe kokuavo? Hacoko. Kelivulu lia Luka 6:35, tu tangako hati: “[Suku] ombokela vakualutukãi la vakuakandu.” Momo “o tundasaila ekumbi liaye kolondingaiwa lo kolondingaĩvi; kuenje o lokasaila ombela vakuesunga la vakuevĩho.” (Mat. 5:45) Eci handi ka tua fetikile oku lilongisa ocili loku ci kapako vomuenyo wetu, Suku wa lekisa ohenda kokuetu. Omo tuafendeli vaye, tua siata oku tambula ocisola caye ka ci pui kuenda ohenda. (Tanga Isaya 54:10.) Tu eca olopandu vialua kokuaye! Handi vali, tu vetiyiwavo oku lekisa ocisola ka ci pui ku vakuetu poku vangula kuenda kolonepa viosi viomuenyo wetu!

10. Oku likutilila ci tu kuatisa ndati oku lekisa ocisola ka ci pui?

¹⁰ Ocina cimue ci tu kuatisa oku lekisa ocisola ka ci pui, esumũlũho lioku linga olohutililo. Momo ocisola kuenda ohenda vi panga onepa kocisola ka ci pui, kuenda viosi yavio via kongeliwa kepako liespiritu sandu lia Yehova. (Va Gal. 5:22) Tu pondola oku yukisa utima wetu locisola ka ci pui poku tava oku vetiyiwa lespiritu liaco. Onjila yimue yoku tambula espiritu sandu lia Yehova, oku li pinga volohutililo. (Luka 11:13) Omo liaco, ciwa okuti tu likutilila ku Suku olonjanja viosi oku pinga espiritu liaye loku tava oku songuiwa lalio. Ocili okuti, nda tu yongola oku lekisa ocisola ka ci pui poku vangula tu sukila oku sokolola lutate loku likutilila.

Ndomo Olohueli vi Lekisa Ocisola Poku Vangula

11. (a) Tua kũlĩha ndati okuti Yehova o yongola okuti alume va lekisa ocisola ka ci pui kakãi vavo? (b) Ocisola ka ci pui ci kuatisa ndati ulume oku lava elimi liaye?

¹¹ Upostolo Paulu wa lungula alume hati: “Ene alume, soli akãi vene ndeci Kristu a sola ekongelo, kuenje wa li liecela.” (Va Efe. 5:25) Paulu wa va ivaluisa eci Yehova a sapuila Adama la Heva. Upostolo wa soneha ndoco: “Ulume o sia isiaye la inaye ha likakatela lukãi waye, kuenje kavali [kavo] va linga umosi.” (Va Efe. 5:31) Ocili, Yehova o yongola okuti alume va amamako oku kala lakãi vavo, loku va lekisa ocisola ka ci pui otembo yosi. Ulume ecelela okuti upopi waye u songuiwa locisola, ka situlula akulueya ukãi waye loku u penya powiñi. Eye o sanjukila oku sivaya ukãi waye. (Olosap. 31:28) Eci va kuata ovitangi vimue, ocisola ka ci pui ci vetiya ulume oku yuvula oku penya ukãi waye.

12. Ukãi o lekisa ndati okuti upopi waye u kasi oku songuiwa locisola ka ci pui?

¹² Ukãi o sukilavo oku lekisa ocisola ka ci pui poku vangula. Upopi waye ka u vetiyiwa lespiritu lioluali. Eye o lekisa ‘esumbilo ku veyaye’ poku vangula ovina viwa via tiamẽla kulume waye, kuenje poku ci linga eci ci vetiya omanu oku sumbilavo ulume waye. (Va Efe. 5:33) Eye ka pembula ovisimĩlo loku liyenja lulume waye kovaso omãla, momo elinga liaco li tepulula esumbilo omãla va kuetele isiavo. Ukãi o nõlapo oku potolola ovitangi eci va kasi pokolika. Embimbiliya li popia okuti, ‘ukãi ukualondunge o tunga onjo yaye.’ (Olosap. 14:1) Onjo yaye yi linga ocitumãlo cesanju kepata liosi.

13. Ocisola ka ci pui ci lekisiwa pi, kuenda ci lingiwa ndati?

¹³ Ndaño muẽle eci va kasi pokolika, olohueli vi sukila oku amamako oku lava elimi liavo poku lekisa esumbilo komunu lukuavo. Paulu wa soneha hati: “Imbipo . . . onyeño, lekaka, lukuse, kuenda oku lundila, lolombangulo vi linga osõi.” Eye wamisako hati: “Wali ohenda kuenda ocikembe lumbombe loku unjuka kuenda epandi. . . . wali ocisola, momo ocisola oco ci kutila cosi pamosi vomunga ya kanguka.” (Va Kol. 3:8, 12-14) Eci omãla va li yikisa oku yevelela upopi u vetiyiwa locisola kuenda ohenda konjo, va likolisilako oku setukula upopi wolonjali viavo.

14. Asongui vepata va pamisa ndati vakuanjo yavo lupopi wavo?

¹⁴ Poku tukula ocisola ca Yehova, ukualosamo wa soneha hati: “Ocisola cove ka ci pui ci ndembeleke.” (Osa. 119:76) Onjila Yehova a kuama yoku lembeleka layo afendeli vaye, oku va ĩha alungulo kuenda olonumbi. (Osa. 119:105) Asongui vepata va kuatisiwa ndati longangu ya Isietu wo kilu yoku vangula lonjila yimue yi lembeleka? Ovo va pondola oku ci linga poku eca alungulo kuenda olonumbi. Efendelo Liepata lieca epuluvi lioku pamisa epata liavo konepa yespiritu!—Olosap. 24:4.

Lekisa Ocisola ka ci Pui ku Vamanji

15. Akulu vekongelo lomanu vakuavo va kula kespiritu upopi upi va sukila oku vangula oco va pamise vamanji vekongelo?

¹⁵ Soma Daviti wa likutilila hati: “Ocisola cove ka ci pui, locili cove, vi silamele oloneke viosi.” (Osa. 40:11) Vañami akulu vekongelo Lakristão vakuavo va siata oku setukula ocituwa eci ca Yehova? Eci tu tukula alomboluilo Ovisonehua poku vangula, tu kasi oku lekisa ocisola ka ci pui.—Olosap. 17:17.

16, 17. Kovina vipi tu lekisa okuti upopi wetu u kasi oku laviwa locisola ka ci pui?

¹⁶ Nye tu sukila oku linga nda tua limbuka okuti manji umue onjila a kasi oku kuama yi pisiwa lolonumbi Viembimbiliya? Anga hẽ ocisola ka ci pui ci ka tu vetiya oku vangula laye oco tu u kuatise? (Osa. 141:5) Nda tua limbuka okuti manji umue wa linga ekandu limue, ocisola ci ka tu kuatisa oku vetiya manji yaco oku ‘sanda akulu vekongelo’ oco ovo “vo likutilile loku u sieketa lulela vonduko ya [Yehova].” (Tia. 5:14) Nda u wa lueya ka vilikiya akulu vekongelo, kuenje letuvo ka tu sapuilako akulu vekongelo, ka tu kasi oku lekisa ohenda kokuaye. Pokati ketu vamue va sumua, vakuavo va kasi ulika, ale va sima okuti ka va kuete esilivilo. Onjila yimue yoku lekisa ocisola ka ci pui poku vangula, oku ‘kolisa ava va leñela.’—1 Va Tes. 5:14.

¹⁷ Nye tu sukila oku linga eci ovanyali va Suku va lundila vamanjetu? Ka tu tatãla ekolelo lia vamanji, puãi tu imula alundi aco poku yuvula oku tambulula, ndaño okuti pamue kuli esunga lioku linga alundi aco. Nda ovanyali vomanu va Suku va sandiliya ovitumãlo pa sangiwa vamanjetu oco va va linge eci cĩvi, tu likala oku eca olonumbi viaco oco tu lekise ocisola cetu ka ci pui.—Olosap. 18:24.

‘Ukuacisola ka ci Pui o Sanga Omuenyo’

18, 19. Momo lie tu sukilila oku lekisa ocisola ka ci pui poku vangula la vamanjetu kespiritu?

¹⁸ Ocisola cetu ka ci pui te ci limbukiwila kovituwa tu lekisa poku tata afendeli vakuavo va Yehova. Ndaño lovitangi, lopo tu amamako oku lekisa ocisola ka ci pui kupopi wetu. Eci ocisola ka ci pui comãla va Isareli ca linga “ndowume u loluka lonjanga,” Yehova wa sumuile calua. (Hos. 6:4, 6) Puãi, Yehova o sanjukila vana ka va liwekapo oku lekisa ocisola cavo ka ci pui. Konomuisa ndomo eye a sumũlũĩsa ava va amamako oku lekisa ocituwa caco.

¹⁹ Elivulu Liolosapo 21:21, li popia hati: “U o kuama esunga lohenda, eye o sanga omuenyo lesumbilo.” Pokati kasumũlũho omunu waco a lavoka oku kuata, oku kala komuenyo otembo yanda ño hũ. Yehova u kuatisa oku kuata “omuenyo wocili.” (1 Tim. 6:12, 19) Omo liaco, tu ‘likuateli ocisola ka ci pui omunu lukuavo.’—Sak. 7:9.

[Atosi pombuelo yamẽla]

O Tẽla Oku Lombolola?

• Ocisola ka ci pui ci lomboloka nye?

• Nye ci tu kuatisa oku lekisa ocisola ka ci pui poku vangula?

• Olohueli vi lekisa ndati ocisola ka ci pui poku sapela?

• Tu lekisa ndati ocisola ka ci pui poku vangula la vamanjetu kespiritu?

[Elitalatu kemẽla 23]

Daviti wa sivaya ocisola ka ci pui ca Yehova

[Elitalatu kemẽla 24]

Ove wa siata hẽ oku linga Efendelo Liepata?