Wa Siata Hẽ Oku Eca Ekuatiso Kolohongele Oco Vi Pamise Vamanji?
“Eci wongoloki, . . . cosi ci lingiwile oku kolisa ekongelo.”—1 VA KOR. 14:26.
1. Ndomo ca lekisiwa kelivulu lia 1 Va Korindo kocipama 14, cipi ocimãho ca velapo colohongele?
‘YA KALA ohongele yimue yi pamisa kuenda yi lembeleka!’ Ove hẽ, wa popele ale olondaka ndevi kesulilo liohongele? Citava okuti wa popele olondaka viaco! Olohongele, ovio ono yevetiyo kuenda elembeleko, pole, eci ka ci tu komõhisa. Momo ndeci ca pita Lakristão vatete, koloneke vilo olohongele vi kuetevo ocimãho coku pamisa konepa yespiritu vosi va enda kolohongele viaco. Kũlĩhĩsa ndomo upostolo Paulu a lombolola ocimãho colohongele vukanda waye watete a sonehela va Korindo. Kocipama 14, wa lombolola okuti, olonepa viosi vi lingiwa kolohongele vi kuete ocimãho cimuamue coku “kolisa ekongelo.”—Tanga 1 Va Korindo 14:3, 12, 26.a
2. (a) Nye ci sukiliwa oco olohongele vi tu pamise? (b) Epulilo lipi tu konomuisa vocipama cilo?
2 Tua limbuka okuti olohongele via siata oku tu pamisa omo liekuatiso liespiritu lia Suku. Tua siata oku fetika olohongele loku likutilila ku Yehova Isietu wo kilu kuenda oku pinga oco a sumũlũise olohongele vietu lekuatiso liespiritu sandu liaye. Ocili okuti, omanu vosi va kasi kohongele, va pondola oku eca atambululo avo, oco va pamise vakuavo. Olonjila vipi tu sukila oku kuama, oco olohongele vi endisiwe ciwa okuti vi linga ono yelembeleko konepa yespiritu?
3. Olohongele vietu vi kuete esilivilo lipi?
3 Oco ku eciwe etambululo liaco, tu konomuisi atosi amue vamanji va songola olohongele va sukila oku kapako. Tu konomuisavo ovina tu sukila oku linga oco vana veya kohongele va pamisiwe. Atosi aco a kuete esilivilo liavelapo, momo olohongele vietu vi kola. Omo liaco, oku endaenda kolohongele loku eca atambululo, ci kuete esilivilo kefendelo lietu ku Yehova.—Osa. 26:12; 111:1; Isa. 66:22, 23.
Ohongele Yimue ya Pongiyiwa Locimãho Coku Lilongisa Embimbiliya
4, 5. Cipi ocimãho Celilongiso Liutala Wondavululi?
4 Vosi yetu tu yongola okupa esilivilo Kelilongiso Liutala Wondavululi olosemana viosi. Oco tu kuate elomboloko liohongele yaco, tu konomuisi apongoloko amue a lingiwa Vutala Wondavululi kuenda kovipama vielilongiso.
5 Utala Wondavululi welilongiso 15 yosãi ya Susu yunyamo wo 2008, owo wa fetika lepongoloko liaco ndomo ci letiwe koñoño yo revista yaco. Ove hẽ wa limbuka epongoloko liaco? Kũlĩhĩsa lutate koñoño yo revista yi kasi peka liove. Vombuelo yutala mu sangiwa Embimbiliya lia yuluka. Eli olio esunga lieci tu kuetele Utala Wondavululi Welilongiso. Ocimãho caco, oku lilongisa Embimbiliya lekuatiso Liutala Wondavululi. Velilongiso lietu Liutala Wondavululi osemana losemana, ku ‘lomboluiwa’ Ondaka ya Suku oco omanu va kuate ‘elomboloko,’ ndeci ca kala kotembo ya Nehemiya.—Neh. 8:8; Isa. 54:13.
6. (a) Apongoloko api a lingiwa Vutala Wondavululi Welilongiso? (b) Nye tu sukila oku ivaluka eci tu sanga ocinimbu cimue Cembimbiliya kua sonehiwa hati, “tanga”?
6 Omo okuti Embimbiliya olio ono yelongiso lietu, kua lingiwa apongoloko amue Velilongiso Liutala Wondavululi. Ovinimbu vimue viovisonehua vovipama vielilongiso via kapiwa hati, “tanga.” Vosi yetu tu vetiyiwa oku kuama Vembimbiliya lietu, osimbu ovinimbu viaco vi tangiwa vokuenda kuohongele. (Ovil. 17:11) Momo lie? Momo eci tu tanga alungulo a Suku Vembimbiliya lietu muẽle, ci tu kuatisa. (Va Hev. 4:12) Osimbu ovinimbu viaco ka via tangiwile lolukandi, manji o kasi oku songola elilongiso liaco, o sukila oku eca otembo oco vamanji va sandiliye ocisonehua caco loku ci kuama osimbu ci tangiwa.
Olohongele vi tu Ĩha Epuluvi Lioku Lekisa Ekolelo Lietu
7. Epuluvi lipi tu kuete vokuenda Kuelilongiso Liutala Wondavululi?
7 Vutala Wondavululi welilongiso, mua lingiwavo epongoloko liesokiyo liotembo. Cilo ovipama viaco vi kuete ovinimbu vitito. Vokuenda Kuelilongiso liaco, ku pesiwa otembo yitito koku tangiwa kuovinimbu Viembimbiliya oco vamanji va kuate otembo yalua yoku eca atambululo. Vamanji valua, va kuete epuluvi lioku lekisa ekolelo liavo ndeci: Oku eca atambululo kapulilo elilongiso, oku lombolola ndomo ocinimbu cimue Cembimbiliya ci kapiwako, oku tukula ulandu umue u lekisa esilivilo lioku pokola kolonumbi viovisonehua, ale oku tukula ovina vikuavo. Otembo yikuavo, tu sukila oku yi pesila koku eca atambululo atiamẽla kalitalatu a sangiwa vocipama caco.—Tanga Osamo 22:22; 35:18; 40:9.
8, 9. Manji o songola Elilongiso Liutala Wondavululi o kuete ocikele cipi?
8 Citava okuti ku supa otembo yoku eca atambululo akuavo, nda vamanji va eca atambululo a teta onimbu, kuenda manji o songola o yuvula oku vangula calua vokuenda Kuelilongiso Liutala Wondavululi. Nye ci pondola oku kuatisa manji o songola elilongiso Liutala Wondavululi oku kuata ocisimĩlo ca sunguluka catiamẽla katambululo aye lava a vamanji oco ohongele yaco yi pamise omanu vosi?
9 Tu konomuisi ocindekaise ci kuãimo. Nda Elilongiso Liutala Wondavululi li endisiwa ciwa, li sokisiwa locitungu coloneleho ci vetiya omanu oku ci tala. Ndeci ocitungu colonelẽho ca sokiyiwa lolonelẽho vi kuete avala a litepa, cimuamue haico ci pita Lelilongiso Liutala Wondavululi okuti, li lingiwa latambululo a litepa. Ndeci oloneleho vi kasi pocitungu cimuamue vi kuete avala a litepa, cimuamue haico ci pita latambululo a litepa a eciwa vokuenda kuohongele. Manji o songola Elilongiso Liutala Wondavululi o kuete ocimãho cipi? Etosi liosi a sukila oku tukula, li sokisiwa lemẽla limosi litalala li vokiyiwa kocitungu coloneleho. Nda eye o yongola oku tukula etosi limue, o sukila oku yuvula oku vangula calua loku tutuiya vakuavo. Pole, o sukila oku tukula olondaka vina vi pamisa vakuavo. Handi vali, o sukilavo oku ivaluka okuti, atosi a tukula ka va sumuisa vamanji, pole a tukule olondaka vina via sunguluka vi likuata latambululo esivayo a eciwa la vakuavo. Omo liaco, nda atambululo a litepa a eciwa lomanu vosi, kuenda atosi amue a eciwa la manji o songola elilongiso liaco a kuete elomboloko liasuapo, a sokisiwa loku kongeliwa kuolondaka viwa vi soliwa la vosi va kasi kohongele.
“Tu Lumbi Lumbi ku Suku Ocilumba Cesivayo”
10. Akristão vatete va tendele ndati olohongele?
10 Olondaka Paulu a tukula kelivulu lia 1 Va Korindo 14:26-33, viatiamẽla kolohongele, vi lekisa ndomo olohongele via enda oku songuiwa kocita catete. Onoño yimue ukuakukonomuisa Embimbiliya poku lombolola ovinimbu evi, wa soneha hati: “Ocina cimue ca kuatele esilivilo kupange Wetavo kosimbu ceci okuti, omanu vosi va limbukile esumũlũho liocikele va kuata coku kuatisa kupange wosi watiamẽlele ketavo. Omanu poku enda konembele, ka va kuatele lika ocimãho coku yevelela, ale oku tambula ekuatiso, pole, va kuatelevo ocimãho coku kuatisa vakuavo.” Omo liaco, Akristão vo kocita catete, va limbukile okuti olohongele via kala epuluvi lioku lekisa ekolelo liavo.—Va Rom. 10:10.
11. (a) Nye tu sukila oku linga oco olohongele vi pamise vakuetu, kuenda momo lie? (b) Tu pondola oku mioñolola ndati a atambululo etu kolohongele? (Tala etosi pombuelo yemẽla.)
11 Oku lekisa ekolelo lietu kolohongele, ci ‘pamisa vamanji vosi vekongelo.’ Ndaño okuti pa pita ale anyamo alua tunde eci tua fetika oku endaenda kolohongele, pole, tu sukila oku amamako oku yevelela lutate atambululo a eciwa la vamanji. Tu pondola oku vetiyiwa calua eci tu yeva atambululo a siata oku eciwa la vamanji va kuka, eci tu yeva elungulo li eciwa lukulu umue wekongelo, kuenda eci tu yeva omãla vatito va lekisa ocisola cavo ku Yehova poku eca atambululo volondaka viavo muẽle. Omo liaco, oku eca atambululo, ci pamisa vamanji kolohongele.b
12. (a) Nye tu pondola oku lilongisa kulandu wa Mose la Yeremiya? (b) Ohutililo yi tu kuatisa ndati oku eca atambululo kolohongele?
12 Komanu vana va kuete osõi, ka ca lelukile kokuavo oku eca atambululo. Nda o kuete ocitangi caco, ivaluka okuti omanu valua va siatavo oku liyaka locitangi caco. Afendeli vamue va Suku kosimbu ndeci: Mose la Yeremiya, va simĩlevo okuti ka va tẽla oku vanguila kovaso yowiñi. (Etu. 4:10; Yer. 1:6) Ndeci Yehova a kuatisa afendeli vaye kosimbu oku u sivaya kovaso yowiñi, eye o pondolavo oku ku kuatisa oku eca ocilumba cesivayo. (Tanga Va Heveru 13:15.) O pondola oku tambula ndati ekuatiso lia Yehova oco o yule usumba woku eca atambululo kolohongele? Catete, o sukila oku pongiya ciwa ovipama violohongele. Noke, osimbu kua endele kohongele, likutilila ku Yehova kuenda pinga oco a ku ĩhe utõi woku eca atambululo. (Va Fil. 4:6) Omo liaco, poku likutilila pinga ovina ‘vi likuata locipango ca Yehova,’ kuenda kolela okuti eye o tambulula ohutililo yove.—1 Yoa. 5:14; Olosap. 15:29.
Olohongele vi tu ‘Kolisa, vi tu Pamisa Kuenda vi tu Lembeleka’
13. (a) Olohongele vietu vi pondola oku kuatisa ndati vana veya Vonjango Yusoma? (b) Epulilo lipi li kuete esilivilo kakulu vekongelo?
13 Paulu wa popia hati, olohongele vi kuete ocimaho coku ‘kolisa omanu, loku va pamisa, kuenda oku lembeleka’ vosi va siata oku endaenda kolohongele viaco.c (1 Va Korindo 14:3.) Koloneke vilo, akulu vekongelo va pondola oku limbuka ndati okuti olonepa va siata oku linga kolohongele vi pamisa vamanji, kuenda vi va lembeleka? Oco tu sange etambululo, tu konomuisi ohongele Yesu a linga noke liepinduko liaye.
14. (a) Ovina vipi via pita osimbu handi ohongele Yesu a linga ka ya fetikile? (b) Elembeleko lipi ovapostolo va tambula, eci ‘Yesu eya kokuavo, loku sapela lavo’?
14 Catete kũlĩhĩsa ovina via pita osimbu ohongele yaco ka ya lingiwile. Osimbu Yesu ka file, ovapostolo vaye ‘vo yanduluka, kuenje vo tila.’ Ndomo ovitumasuku via ci popele, ovo va li ‘sandola, omunu lomunu wa enda konjoyaye.’ (Mar. 14:50; Yoa. 16:32) Yesu noke liepinduko liaye, wa laleka ovapostolo vaye va sumuile, oco a linge lavo ohongele yimue yilikasi.d Noke, ‘olondonge ekũi la yimosi via endele ko Galilela toke komunda yina Yesu a va tukuila.’ Eci va pitilako, ‘Yesu weya kokuavo, kuenje wa sapela lavo.’ (Mat. 28:10, 16, 18) Helembelekokuolio ovapostolo va tambula noke yelaleko lia Yesu! Nye Yesu a va sapuila vohongele yaco?
15. (a) Ovina vipi Yesu a tukula, pole, ovina vipi ka tukuile? (b) Ohongele yaco ya kuatisa ndati ovapostolo?
15 Yesu wa fetika loku linga esapulo limue li popia hati: “Uviali wosi . . . wa nyihiwa.” Eye, wa va ĩha ocikele hati: ‘Kuendi, ka tavisi omanu oco va linge olondonge.’ Noke, wa va sapuila vali hati: “Ame ñasi lene kumue oloneke viosi.” (Mat. 28:18-20) Ove hẽ wa limbuka ovina Yesu ka lingile? Eye ka temelele ovapostolo vaye, kuenda ka lingile ohongele yaco locimãho coku kapa voseteko ovisimĩlo viavo, ale oku va vetela evelo okuti, ekolelo liavo ka lia pamele. Pole, Yesu wa va vetiya loku va sapuila hati, eye o va sole kuenda Isiaye o va solevo, poku va ĩha ocikele ci kuete esilivilo. Ukamba Yesu a lekisa kovapostolo vaye, wa va kuatisa ndati? Ovo va kolisiwa, loku pamisiwa, kuenda va lembelekiwa, kuenje noke liohongele yaco, va amamako oku ‘kunda olondaka viwa, loku longisa omanu.’—Ovil. 5:42.
16. Koloneke vilo, akulu vekongelo va pondola oku kuama ndati ongangu ya Yesu yoku songola olohongele vi pamisa vamanji vosi?
16 Koloneke vilo, akulu vekongelo va siata oku kuama ongangu ya Yesu poku limbuka okuti, kolohongele va kuete epuluvi lioku pamisa vamanji kuenda oku va ivaluisa ocisola Yehova a kuetele omanu vaye. (Va Rom. 8:38, 39) Volonepa akulu vaco va linga kolohongele, va siata oku lombolola ovina vi pamisa vosi, loku yuvula oku tukula ahonguo a vamanji. Ovo va siata oku yuvula oku kuatela vamanji ovisimĩlo ka via sungulukile. Ovina va popia, vi eca uvangi wokuti, vamanji va sole Yehova, kuenda va yongola oku linga eci ca sunguluka. (1 Va Tes. 4:1, 9-12) Olonjanja vimue akulu vekongelo va sukila oku eca elungulo ku vamanji vosi, pole, nda manji umue o sukila oku lunguiwa, va sapela laye pokolika. (Va Gal. 6:1; 2 Tim. 2:24-26) Olonjanja vimue, akulu vekongelo va sukila oku eca alungulo ku vamanji vosi nda ci sukiliwa. (Isa. 32:2) Pole, va ci linga lonjila yimue okuti, kesulilo liohongele omanu vosi va lembelekiwa kuenda va pamisiwa.—Mat. 11:28; Ovil. 15:32.
Olohongele vi tu Lembeleka
17. (a) Momo lie ci kuetele esilivilo oku limbuka okuti olohongele vietu vi lembeleka omanu vosi? (b)Nye o sukila oku linga oco olohongele vietu vi pamise vakuetu? (Tanga pokakasia losapi hati: “Olonumbi Ekũi vi Ecelela Okuti Olohongele vi ku Pamisa Ove Kuenda Vakuene.”)
17 Omo okuti oluali lua Satana lue yuka ungangala, tu sukila oku ivaluka okuti, olohongele vietu, vi lembeleka omanu vosi. (1 Va Tes. 5:11) Manji umue ukãi okuti kumue lulume waye va liyaka lovitangi vialua vokuenda kuanyamo a pita wa popia hati: “Oku enda kolohongele, ci sokisiwa loku tatiwa la Yehova. Vokuenda kuolohongele, omo lioku kala pamosi la vamanji valua, tu limbuka okuti, tu pondola oku eca ovitangi vietu ku Yehova, kuenda tu kuata ombembua yovutima.” (Osa. 55:22) Omanu va siata oku enda kolohongele vietu, va sukilavo oku pamisiwa kuenda oku tambula elembeleko. Omo liaco, tu likolisiliko oku eca ekuatiso lietu oco omanu vosi va tambule elembeleko kolohongele.
[Atosi pombuelo yamẽla]
a Ovitumasuku via lekisile okuti, ovina vimue Akristão vo kocita catete va enda oku linga kolohongele viavo, vi ka imuha. Vovina viaco mua kongela oku “popia alimi” alitepa, ale “ovitumasuku.” (1 Va Kor. 13:8; 14:5) Olonumbi Paulu a eca, vi tu kuatisa oku kuata elomboloko ndomo olohongele vi sukila oku lingiwa koloneke vilo.
b Oco o sange olonumbi vikuavo vi ku kuatisa oku mioñolola atambululo kolohongele, tala Utala Wondavululi 1 yosãi Yenyenye Linene wo 2003 kemẽla 19-22, kelimi Lioputu.
c Elivulu limue li tukuiwa hati, Dicionário Expositivo do Antigo e do Novo Testamento de Vine, poku tukula oku litepa ku kasi pokati kondaka oku “kolisa” kuenda “elembeleko,” li lombolola okuti, kelimi lio Helasi ondaka ya pongoluiwa hati, “elembeleko,” yi lomboloka oku “omboka,” pole, ka yi lomboloka oku [“kolisa].”—Sokisa lelivulu lia Yoano 11:19.
d Citava okuti, lia kala epuluvi lina upostolo Paulu a tukula poku popia hati, ‘onjanja yimue, Yesu wa molẽha kueci ci pitahãla ovita vitãlo komanu.’—1 Va Kor. 15:6.
O Tambulula Ndati?
• Olohongele vi kuete esilivilo lie?
• Momo lie atambululo a eciwa kolohongele a kuatisila koku ‘pamisa vamanji’?
• Nye tu pondola oku lilongisa kohongele Yesu a linga lolondonge viaye?
[Okakasia Lelitalatu kemẽla 22, 23]
OLONUMBI EKŨI VI ECELELA OKUTI OLOHONGELE VI KU PAMISA OVE KUENDA VAKUENE
Lipongiya selo. Nda tua pongiya selo ovipama tu ka kuama kohongele, ci vokiya onjongole yetu, kuenda ci sanjuisa omanu vosi.
Kuata ocituwa coku endaenda kolohongele. Omo okuti oku endaenda kolohongele ci vetiya vakuene, emoleho liove li kuete esilivilo.
Pitila selo. Nda wa tumala pomangu yove osimbu ohongele ka ya fetikile, o pondola oku imbila kumosi ocisungo la vamanji, loku yevelela ohutililo yatete. Momo ovina viaco vi panga onepa kefendelo lietu ku Yehova.
Ambata alivulu osi a sukiliwa. Nda wa ambata Embimbiliya liove, lalivulu akuavo, o pondola oku kuama ciwa ovipama vi lingiwa kohongele. Nda wa ci linga, o kuata elomboloko liwa.
Yuvula ovina vi ku tateka oku yevelela lutate. Vokuenda kuohongele yuvula oku tanga ovikanda via tumiwa votelefone yove yo peka. Nda wa ci linga, o lekisa okuti, ovina viosi o vi linga vepuluvi vi sesamẽla.
Panga onepa. Nda omanu valua va eca atambululo kolohongele, ci pamisa vamanji kuenda ci va lembeleka.
Eca atambululo a teta onimbu. Nda tua ci linga ci kuatisa omanu vosi oku kuata epuluvi lioku ecavo atambululo avo.
Tẽlisa ovikele wa tambula. Nda wa tambula onepa yimue Kosikola Yupange Wakristão ale Kohongele Yupange, pongiya ciwa ocipama caco, ci pitolola olonjanja vialua, kuenda likolisilako oku ci tẽlisa.
Pandiya vana va linga onepa. Pandiya vana va panga onepa kovipama viohongele, ale vana va eca atambululo, loku va sapuila okuti, wa sola calua alikolisilo avo o kuiya kohongele.
Kuata ukamba la vosi. Oku li lama ciwa la vamanji loku sapela lavo osimbu ohongele ka ya fetikile, kuenda noke liohongele, ci vokiya esanju lietu, kuenda ci nena asumuluho alua.