Nda Litumbika Koku Linga Upange Vocisoko Ca Yehova

ulandu wa Lomboluiwa la Vernon Zubko

NDA kulila vimbo lio Stenen volupale luo Saskatchewan vofeka yo Kanada. Olonjali viange Fred la Adella, va enda oku likolisilako calua oco ame la kota liange Aurellia, kumue lamalẽhe vange ndeci: Alvin, Allegra, kuenda Daryl, tu kuate okulia kuespiritu kuenda ovina vikuavo tu sukila ketimba. Cilo, tu eca olopandu kolonjali vietu omo lioku tu longisa ocili.

Isia yange okuti Ukristão ombuavekua, wa kala ukuotõi koku kunda. Eye wa talavaya calua kupange woku sanda eteku, kuenda wa kũlĩhĩwile lomanu valua okuti, Ombangi ya Yehova. Otembo yosi wa enda oku longisa ocili colondaka viwa. Kuenje ndi ivaluka ombili kuenda utõi a enda oku lekisa. Eye wa enda oku ndi sapuila hati: “Nda wa pesila otembo yove koku linga ovina viatiamẽla kocisoko ca Yehova, o ka yuvula ovitangi vialua.”

Tua enda oku kundila olondaka viwa volokololo vimbo lio Stenen kuenda kovaimbo a kasi ocipepi. Pole, kokuange ka ca lelukile oku linga upange waco. Vovaimbo aco, mua kala amalẽhe vamue ka va kuete esumbilo, okuti va enda oku tu yola epembe. Eci nda kuata anyamo ecelãla, eteke limue, eci nda kala panyaha Lutala Wondavululi kuenda o Despertai! peka, nda limbuka okuti, nda ñualiwa locimunga camalẽhe vamue. Vopa osapeu yange yokaliye kutue, kuenje va yi pateka kuti wa kala ponele yange. Pole, manji ukulu wa kala oku enda lame, wa mola ovina viosi nda pita lavio. Eye wa amela kokuange, kuenje wa pula hati: “A Vern o kuete ocitangi cimue?” Noke, amalẽhe vaco va tila. Ulandu waco wa ndi longisa okuti, nda ndi kasi oku kundila volokololo, ndi sukila oku yuvula oku talama pamosi vokuenda kuotembo yalua. Ovina nda lilongisa otembo nda kala oku kula, via ndi kuatisa oku limbuka okuti, ndi sukila oku lekisa utõi, poku kundila olondaka viwa konjo lanjo.

Ame kumue la manjange Alvin tua papatisiwa kosãi ya Kupemba yunyamo wo 1951. Otembo yaco nda kuata 13 kanyamo. Ndi ivaluka okuti, manji Jack Nathan, wa linga ohundo yepapatiso, wa tu vetiya oco ka tu ka pite osãi okuti ka tu endi kupange woku kunda olondaka viwa Viusoma.a Vepata lietu, tua tendele upange wakundi wotembo yosi ndocina cimue ci kuete esilivilo lia velapo. Kunyamo wo 1958, noke lioku mala elilongiso lio kosikola, nda ilukila vimbo lio Winnipeg, volupale luo Manitoba, muna nda kala ukundi wotembo yosi. Ndaño Isiange wa solele calua oku talavaya kumue lame kupange woku songa avaya, pole, eye kumue la Ina yange, va ndi vetiya oco ndi iñile kupange wakundi votembo yosi, kuenda va ndi kuatisa calua kupange waco.

Onjo Yokaliye Kuenda Ekamba Liokaliye

Kunyamo wo 1959, o filiale ya laleka vamanji va yongola oku vokiya upange wavo woku kunda oco va ilukile volupale luo Quebec, muna mua kala ekambo liakundi vusoma. Nda kala ukundi wotembo yosi volupale luo Montreal. Lia kala epongoloko linene komuenyo wange! Sia la pita lulandu waco, momo nda sukilile oku lilongisa elimi lio Francês, kuenda oku kũlĩha ovituwa vikuavo viomanu vaco. Manji o nyula akongelo wa ndi sapuila hati: “Lalimue eteke ku ka sime okuti: ‘Eli olio epuluvi lioku tiukila konjo.’” Elungulo liaco, lia ndi kuatisa calua.—1 Va Kor. 9:22, 23.

Eci nda ilukila ko Quebec, nda talavaya likaliange. Pole, kosãi ya Kayovo yunyamo wo 1961, nda kuela manji Shirley Turcotte, una nda kũlĩha osimbu volupale luo Winnipeg, kuenje wa linga ekamba liange liupange. Epata liaye, lia kalavo Olombangi Via Yehova. Ndaño sia kũlĩhĩle okuti eye o ka ndi pamisa loku ndi vetiya vokuenda kuanyamo alua.

Tua Linga Ungende Woku Kundila ko Gaspé

Noke lianyamo avali tunde eci tua kuela, tua lalekiwa oku iñila kupange wakundi valikasi vimbo lio Rimouski, volupale luo Quebec. Kesulilo liotembo yokuenye, o filiale ya tu laleka oco tu ka kundile olondaka viwa vovikanjo vimue vi kasi ocipepi lokalunga Kutundilo wofeka yo Kanada. Tua kuata ocimãho coku kundila olondaka viwa komanu vosi tua sanga. (Uku. 11:6) Vekãlu lietu tua longekamo ci pitahãla 1.000 yolorevista, 400 kalivulu, okulia, luwalo, kuenje ovina viaco via tu kuatisa oku kundila vovikanjo viaco vokuenda kuosãi. Tua kundila vovaimbo osi o volupale luo Gaspé. Ovingungu viasapulo via lungula omanu hati, Olombangi Via Yehova vi kasi oku iya. Omo liaco, ka u ka tambuli alivulu avo. Pole, omo okuti omanu ka va kuatele elomboloko liesapulo liaco, va sima okuti, va vetiyiwa oku tambula alivulu etu, kuenje va tambula alivulu alua.

Vokuenda kuanyamo aco, omo okuti upange woku kunda wa kala ndocina cimue cokaliye kovambo amue vo ko Quebec, ka tua kuatele ocitangi coku talamisiwa lolosipayu. Pole, onjanja yimue eci tua kundila volupale lumue, tua sia alivulu volonjo vialua. Kuenje, umue pokati kolosipayu wa pinga kokuetu oco tu ende laye kombonge yolosipayu, kuenje tua pokola kokuaye. Pole, tua limbuka okuti, ulume umue onganji yo volupale, eye wa tuma oku imula upange woku kunda. Omo okuti kesongo kolosipayu ka tuo sangeleko, nda eca konganji ukanda wa tunda kofiliale yo Toronto, u lombolola elianjo lietu lioku kunda olondaka viwa. Onganji noke yoku tanga ukanda waco lonjanga, ya popia hati: “Si yongola oku kuata ovitangi. Patele eye wa ndi tuma oco u liwekipo oku kunda.” Omo okuti tua yonguile oku lekisa komanu vo vocikanjo okuti tua kuatele omoko yoku linga upange waco, tua tiukila vocikanjo muna olosipayu via tu talamisa, kuenda tu amamako lupange woku kunda.

Eteke likuavo komẽle, eci tua tiukila kombonge yolosipayu oco tu sapele la kesongo kaco, tuo sanga okuti wa sumua calua omo lioku yeva okuti tua tatekiwa oku kunda. Tua yeva eci a vilikiya onganji vo telefone yaye! Noke, eci a kala oku sapela votelefone longanji yo volupale, tua limbuka okuti, wo temẽla calua omo lionjila a nõlapo. Noke, wa tu sapuila hati, nda va ku tateki vali, ndi sapuiliko oco ndi tetulule lonjanga ocitangi caco. Ndaño tua kala ovingendeleyi vofeka kuenda ka tua tẽlele oku vangula ciwa elimi lio Francês, pole, tua sanga omanu valua vakuahenda haivo va kuete ocituwa coku yekisa akombe. Pole, tua komõha calua kuenda tua lipula ndoco: ‘Anga hẽ, omanu vaco va ka tava muẽle oku lilongisa Embimbiliya’? Tua limbuka etambululo liepulilo lietu eci tua tiukila kolupale luo Gaspé oku tunga Olonjango Viusoma. Tua limbukavo okuti, valua pokati komanu tua kundila olondaka viwa, va linga Olombangi Via Yehova. Ocili okuti, Yehova eye o kulisa ovina.—1 Va Kor. 3:6, 7.

Tua Tambula Ocipiñalo Cimue

Omõla wetu Lisa wa citiwa kunyamo wo 1970. Ocipiñalo eci ca tunda ku Yehova, ca vokiya esanju lietu komuenyo. Ukãi wange lomõla wetu Lisa, va talavaya kumue lame kupange woku tunga Olonjango Viusoma. Eci Lisa a mala oku lilongisa kosikola, wa popia hati: “Omo okuti ene ulonjali viange wa liwekipo upange wakundi valikasi eci nda citiwa, cilo ndi yongola oku litumbika kupange wakundi votembo yosi.” Tunde eci Lisa a litumbika kupange waco pa pita ale 20 kanyamo, pole toke cilo o kasi oku amamako kupange waco kumue lulume waye Sylvain. Ovo va kuete esanju lialua omo lioku talavaya kolofeka vialua kupange woku tunga Olonjango Viusoma kuenda ovitumãlo vikuavo. Ocimãho cetu, oku leluisa omuenyo wetu kuenda oku amamako oku lieca olumue kupange wa Yehova. Tua siata oku ivaluka olondaka Lisa a tu sapuilile eci a fetika upange wakundi votembo yosi. Eye wa ndi vetiya oku litumbika vali kupange wakundi votembo yosi. Kuenje, kunyamo wo 2001 nda fetika vali upange waco, una ndi kasi oku linga toke cilo. Upange waco, u kasi oku ndi kuatisa oku kolela ku Yehova, loku ambata omuenyo umue wa leluka, okuti wa siata oku ndi nenela esanju lialua.

Kupange Woku Tunga tu Sukila Oku Lekisa Ocisola, Esunguluko Kuenda Ekolelo

Yehova wa ndi longisa okuti, nda tua tava ovikele viosi eye a tu ĩha kuenda oku lekisa epokolo kokuaye, tu tambula asumũlũho alua. Nda tambula asumũlũho alua poku talavaya Kocisoko ca Vamanji Vakuakutunga Olonjango Viusoma kuenda kovopange akuavo volupale luo Quebec.

Ndaño vamanji vamue va kala kupange woku tunga Olonjango Viusoma ka va loñolohele koku linga olohundo viowiñi vekongelo, pole, va enda oku tẽlisa ciwa ovikele viupange wavo woku tunga. Ovo va enda oku linga upange waco lutima wosi, poku lekisa uloño wavo. Omo liaco, va enda oku tunga olonjango Viusoma via posoka vioku fendela Yehova.

Onjanja yimue va ndi pulisile ndoco: “Ovituwa vipi via velapo una watiamẽla kocisoko ca vamanji vakuakutunga Olonjango Viusoma a sukila oku lekisa?” Catete, o sukila oku sola Yehova, Lomõlaye, kuenda vamanji vosi. (1 Va Kor. 16:14) Cavali, o sukila oku lekisa esunguluko kuenda ekolelo. Nda ovina ka vi kasi oku lingiwa ndomo tu yongola, omunu wa sunguluka o pokola kolonumbi viocisoko ca Yehova. Ekolelo omunu a kuete, li pondola oku u vetiya oku lieca kovopange akuavo.

Ndeca Olopandu ku Yehova

Ndaño isia yange wa fa kunyamo wo 1985, pole toke cilo ndi ivaluka elungulo liaye lioku ndi vetiya oku pesila otembo yange vocisoko ca Yehova. Ndeci vamue va tambula elaleko lioku panga onepa vocisoko ca Yehova kilu, eye wa tambulavo elaleko liaco, kuenda o kasi ale kilu. (Esit. 14:13) Cilo, Ina yange o kuete 97 kanyamo. Ndaño ka tẽla vali oku vangula ciwa omo lioku vela kuenda oku kuka, pole wa kũlĩha ciwa Embimbiliya liaye. Vovikanda viaye wa siata oku soneha ovinimbu Viembimbiliya kuenda o tu vetiya oku amamako lekolelo kupange wa Yehova. Tu kuete esanju lialua omo liolonjali vietu vi tu kuetele ocisola!

Ndecavo olopandu ku Yehova omo liekolelo ukãi wange Shirley a siata oku lekisa. Eye wa siata oku ivaluka evetiyo a tambuile ku inaye wo sapuila hati: “A Vern amamako loku pokola kovina wa lilongisa Vondaka ya Suku, kuenda vi longisavo komanu vosi.” Tunde eci tua likuela papita ale 49 kanyamo. Otembo yaco tua linga ohuminyo yokuti, tu yongola oku kukila kumosi, kuenda oku vumbila kumosi Yehova. Nda tua pulukila kumosi kenyolẽho lioluali lulo, tu ka lingila kumosi amalẽhe voluali luokaliye, kuenda tu ka vumbila kumosi Yehova otembo ka yi pui. Ocili okuti, tua ‘kuata ovina vialua vioku linga kupange wa Ñala.’ (1 Va Kor. 15:58) Omo liaco, tua limbuka okuti, Yehova wa siata oku tu tata ciwa loku tu ĩha ovina viosi tu sukila.

[Atosi pombuelo yamẽla]

[Elitalatu kemẽla 31]

“Ocimãho cepata lietu, oku leluisa omuenyo wetu kuenda oku amamako oku lieca olumue kupange wa Yehova