Anga hẽ Suku wa Kũlĩhĩle Okuti Adama la Eva va Laikele Oku Linga Ekandu?

Omanu valua va yongola oku kũlĩha etambululo liepulilo eli. Eci ku popiwa kesunga lieci Suku a ecelela ohali, omanu haco va ivaluka ekandu ohueli yatete ya linga vocumbo Cedene. Ocisimĩlo cokuti ‘Suku wa kũlĩha cosi,’ ci pondola oku vetiya omanu oku sima okuti Suku wa kũlĩhĩle ale okuti Adama la Eva va laikele oku u sinila.

Nye omanu nda va vangula nda okuti Suku wa kũlĩhĩle ale okuti ohueli yaco ya laikele oku linga ekandu? Ocisimĩlo caco nda ca koka oku sima okuti Suku o kuete ovituwa ka via sungulukile, ka kuete ocisola, o lekisa ekambo liesunga kuenda ohembi. Vamue nda va sima okuti, ungangala oku eca komanu vatete ocina cimue okuti ka ca laikele oku kala otembo yalua. Nda ca molẽha okuti Suku eye o kuete eko omo lievĩho kuenda ohali yosi ya pita voluali. Komanu vamue Ululiki wetu nda wa molẽha ndu okuti eveke.

Anga hẽ onjila ndomo Embimbiliya li situlula Yehova Suku, yi li kuata lovituwa viaco ka via sungulukile? Oco tu tambulule epulilo eli, tu tali eci Embimbiliya li popia catiamẽla kovina Yehova a lulika kuenda ovituwa viaye.

“Ca Posoka Calua”

Catiamẽla kovina Yehova a lulika oku kongelamo omanu vatete palo posi, ulandu u sangiwa kelivulu Liefetikilo u popia hati: “Suku wa mola okuti cosi a lulika ca posoka calua.” (Efetikilo 1:31) Adama la Eva eci va lulikiwa, va lipuile kuenda va kuatele ekalo liwa palo posi. Ovo ka va kuatele etime lalimue. Ocili okuti ovo va ponduile oku linga ovina ndomo Suku a yonguile. Momo va lulikiwile ‘lesetahãlo lia Suku.’ (Efetikilo 1:27) Omo liaco, ovo va kuatele epondolo lioku lekisa ovituwa via Suku okuti olondunge, ocisola cocili, esunga kuenda ohenda. Oku sokolola kovituwa viaco, nda via va kuatisa oku nõla olonjila vi eca onima yiwa kuenda oku sanjuisa Isiavo wo kilu.

Yehova wa eca kokuavo elianjo lioku li nõlela. Omo liaco, ovo ka va lulikiwile lekisika lioku sanjuisa Suku ndeci omakina yimue. Sokolola ndoco: Nye nda ca kuata esilivilo kokuove, ombanjaile yimue ya eciwa lekisika ale yimue ya eciwa lutima wosi? Ombanjaile ya eciwa lutima wosi. Cimuamue haico okuti, nda ca kuata esilivilo lialua ku Suku nda Adama la Eva va nõlelepo ovo muẽle oku pokola. Elianjo lioku li nõlela ovo muẽle ovina va yongola oku linga, lia eca kohueli yatete epuluvi lioku pokola ku Suku omo liocisola vo kuatelele.​—Esinumuĩlo 30:19, 20.

Cesunga Kuenda Ciwa

Embimbiliya li tu situluila ovituwa via Yehova. Ovituwa viaco ka vi koki okuti eye o panga onepa koku linga ekandu. Ke livulu Liolosamo 33:5 ku popia hati: Yehova “o sole esunga kuenda esombiso.” Kuenda kukanda wa Tiago 1:13, ku popia ndoco: “Suku ka setekiwa leci cĩvi kuenda eye ka seteka laumue.” Omo okuti Suku ukuesunga kuenda wa kapako omanu, wa sapuila Adama hati: “Citava oku lia kapako oviti viosi vio vocumbo. Pole, kuti wukũlĩhĩso weci ciwa leci cĩvi ka citava okuti ove o liako, momo eteke o liako, o fa muẽle.” (Efetikilo 2:16, 17) Ohueli yatete ya ponduile oku nõla pokati komuenyo kuenda oku fa. Anga hẽ Suku nda ka lekisile ombambe nda wa va lunguile catiamẽla kekandu limue eye a kũlĩhĩle ale okuti va ka ci linga? Yehova omo okuti omunu umue “o sole esunga kuenda esombiso,” nda ka ecele kokuavo epuluvi lioku nõla ocina cimue okuti ca sokiyiwile ale.

Yehova o kuetevo ohenda yalua. (Olosamo 31:19) Yesu poku lombolola ohenda ya Suku, wa popia hati: “Helie pokati kene okuti nda omõlaye u pinga ombolo o ko wĩha ewe? Ale nda u pinga ombisi o ko wĩha onyõha? Nda okuti ene vulondingaĩvi vu tẽla oku eca oviali viwa komãla vene, ca piãla enene Isiene o kasi kovailu okuti, o ka eca ovina viwa kuava vo pinga!” (Mateo 7:9-11) Suku eca “ovina viwa” koviluvo viaye. Onjila ndomo Suku a lulika omanu kuenda a pongiya Ocumbo Celau, ci situlula okuti eye uwa. Anga hẽ Ukuonene wosi nda wa lekisa ungangala okuti, o pongiyila ocitumãlo caco omanu pole, wa kũlĩha okuti noke ka ci kala vali cavo? Sio. Ululiki wetu okuti uwa kuenda ukuesunga, ka kuete eko omo liesino liomanu.

“Eye Lika Ukualondunge”

Ovisonehua vi lekisavo okuti Yehova “eye lika ukualondunge.” (Va Roma 16:27) Ovangelo va Suku olombangi viovina vialua vi situlula olondunge okuti ka vi sulila. Ovo va “kalukila kumosi lonjolela” eci Yehova a lulika ovina palo posi. (Yovi 38:4-7) Ocili okuti oviluvo viaco viespiritu, via mola ovina viosi via kala oku lipita vocumbo Cedene. Omo liaco, ka ca sungulukile okuti Suku ukualondunge noke yoku lulika ilu lieve li komõhisa kuenda ovina vikuavo vi kasimo, kovaso yovangelo vosi o lulika oviluvo vivali loku kũlĩha okuti, noke vi ka linga ekandu. Ocili okuti oku linga esokiyo liaco, nda ka ca kuatele esilivilo.

Ndaño ndoco, pamue umue o pula hati: ‘Ndamupi Suku umue ukualondunge ka kũlĩhĩle ovina a laikele oku li pita?’ Ocili okuti onepa yimue yolondunge ya velapo ya Yehova, uloño waye woku kũlĩha ovina “tunde kefetikilo.” (Isaya 46:9, 10) Pole, eye ka sukila oku talavaya luloño waco ndeci ka sukila oku talavaya olonjanja viosi lunene waye. Yehova omo okuti ukualondunge, ka talavaya olonjanja viosi luloño waye woku sokiya ovina vi keya kovaso yoloneke pole, o ci linga lika nda ci sukiliwa.

Uloño woku nõla nda o talavaya lunene waco ale sio, u pondola oku sokisiwa lomakina yimue. Omunu umue wa ngalavala omapalo yimue vomakina, o pondola oku tala olonepa via sulako oco a kũlĩhe ndomo ca sulila. Pole ka sukila oku ci linga. Helie nda wa pisa omunu waco nda wa nõlele oku tala omapalo yaco tunde keketikilo? Cimuamue haco okuti, ululiki pamue wa nõlapo oku yuvula oku tala ndomo ovina via laikele oku sulila. Eye wa nõlapo oku kevelela loku mola ovituwa omãla vaye palo posi va laikele oku lekisa, osimbu ovina viaco via kala oku li pita.

Ndomo ca tukuiwa ale, Yehova omo liolondunge ka lulikile omanu vatete ndomakina yimue ya sokiyiwila oku linga ovina ndomo omakina yaco ya pangiwa. Pole, eye omo liocisola wa eca kokuavo elianjo lioku linõlela ovina va yongola oku linga. Nda va nõlele onjila ya velapo, nda va lekisa ocisola, olopandu kuenda epokolo loku vokiya esanju lia Isiavo wokilu Yehova.​—Olosapo 27:11; Isaya 48:18.

Ovisonehua vi lekisa okuti, olonjanja vialua Suku ka talavaya luloño waye woku sokiya ovina vi keya kovaso yoloneke. Ndeci, eci Avirahama ukuekolelo nda a ponda omõlaye, oco lika Yehova o sapuila hati: “Kaliye nda kũlĩha okuti ove wa sumba Suku, momo kua likalele oku nyĩha omõlove, omõlove wongunga.” (Efetikilo 22:12) Handi vali, kua kala olonjanja vimue okuti, ovituwa vĩvi viomanu vamue via lingisa okuti Suku o “yeva esumuo.” Anga hẽ eye nda wa yeva esumuo nda wa kũlĩhĩle ale ovina ovo va laikele oku linga?​—Osamo 78:40, 41; 1 Olosoma 11:9, 10.

Omo liaco, ca sunguluka oku sima okuti Suku ukualondunge ka talavayele luloño waye oco a kũlĩhe okuti, olonjali vietu viatete via laikele oku linga ekandu. Eye nda ka lulikile omanu oco va pite lovolandu ka a sungulukile nda wa kũlĩhĩle ale onima yaco. Nda ca kala uveke oku talavaya lunene waco lonjila eyi.

“Suku Eye Ocisola”

Satana unyãli wa Suku eye wa fetika esino vo Edene, lina lia nena ovitangi vialua oku kongelamo ekandu kuenda olofa. Omo liaco, Satana wa linga “omondi.” Eye wa lekisavo okuti “ohembi haeye isia yuhembi.” (Yoano 8:44) Omo okuti eye o kuete ovisimĩlo ka via sungulukile, o vetiyavo omanu oku sima okuti Suku o kuetevo ovisimĩlo ka via sungulukile. Eye o sanjukila oku lundila okuti Yehova eye o kuete eko omo liekandu liomanu.

Ocisola oco ca kala esunga lia velapo Yehova a nõlelapo oku yuvula oku kũlĩha okuti, Adama la Eva va laikele oku linga ekandu. Embimbiliya kukanda wa 1 Yoano 4:8 ku popia okuti “Suku eye ocisola” kuenda oco ocituwa caye ca velapo. Ocisola ci linga ovina viwa, ka ci lingi ovina vĩvi. Oco ci sanda ovina viwa komanu. Omo liaco, omo liocisola Yehova Suku wa yoguile eci ciwa kohueli yatete.

Ndaño okuti omãla va Suku palo posi va nõla onjila ka ya sungulukile, Suku yetu ukuacisola ka simile okuti ovina via laikele oku tunda lãvi ale oku lekisa ekambo liekolelo koviluvo viaye via lipua. Eye wa ecele kokuavo ovina viosi va sukilile loku va sapuila cosi. Ca sungulukile Suku oku lavoka okuti, ovo va kala vakuepokolo kuenda ka va lekisa esino. Eye wa kũlĩhĩle okuti Adama la Eva va ponduile oku kala vakuacili, ndomo ca lekisiwa noke lalume ka va lipuile ndeci, Avirahama, Yove, Daniele kuenda vakuavo.

Yesu wa popia hati: “Ku Suku ovina viosi vi tẽliwa.” (Mateo 19:26) Olondaka evi vi lembeleka. Ocisola ca Yehova, kumue lovituwa viaye vikuavo via velapo ndeci, esunga, olondunge kuenda unene vi tu ĩha elavoko liokuti votembo ya sokiyiwa eye okamalako ovina viosi via kokiwa lekandu kuenda lolofa.​—Esituluilo 21:3-5.

Omo liaco, eci ci lekisa okuti Yehova ka kũlĩhĩle nda ohueli yatete ya laikele oku linga ekandu. Suku ndaño okuti wa yeva esumuo omo liesino lia lingiwa lomanu kuenda ohali yeyililako, eye wa kũlĩhĩle okuti ocitangi caco ka ca laikele oku u tateka oku tẽlisa ocipango caye catiamẽla kongongo kuenda komanu. Momo lie ku kũlĩhĩla vali ovina vikuavo viatiamẽla kocipango caco kuenda ndomo o pondola oku kuatisiwa loku tẽlisiwa kualio ku komõhisa?a

[Etosi pombuelo yemẽla]

[Okakasia kemẽla 14]

Yehova ka lulikile omanu vatete ndomakina yimue ya sokiyiwila oku linga ovina ndomo omakina yaco ya pangiwa.

[Okakasia kemẽla 15]

Suku wa kũlĩhĩle okuti Adama la Eva va ponduile oku kala vakuacili.