Lilongisila Kondaka Ya Suku

Cipi Ocipango ca Suku Catiamẽla Koluali?

Ocipama cilo, ceca atambulula kapulilo amue okuti, pamue wa va lingile ale, kuenda ci lekisa ovinimbu vi ku kuatisa oku tanga atambululo Vembimbiliya liove. Olombangi Via Yehova vi sanjukila oku kũlĩhĩsa kumue love oku sanga atambulo kapulilo a lingiwa ndeti.

1. Cipi ocipango ca Suku catiamẽla koluali?

Oluali, ocitumãlo comanu. Suku noke yoku lulika ovangelo oco va kale kilu, wa lulikavo omunu oco a kale lesanju palo posi. (Yovi 38:4, 7) Omo liaco, Yehova wa kapa omunu watete vocumbo celau ci tukuiwa hati, ocumbo Cedene, oco eye kumue lovitumbulukila viaye va kuate omuenyo ko pui palo posi.​—Efetikilo 2:15-17; tanga Osamo 115:16.

Ocumbo Cedene ca kala lika pocitumãlo cimue citito mulo voluali. Suku wa sokiya okuti, Adama la Heva va cita omãla. Eye wa yonguile okuti, osimbu ovitumbulukila viomanu vi livokiya, via amamako oku talavaya vongongo oco yi linge oluali lumue lueposo. (Efetikilo 1:28) Oluali ka lu ka kunduiwa.—Tanga Osamo 104:5.

2. Momo lie cilo oluali ka lua lingilile ocitumãlo cimue celau?

Adama la Heva va lueyela Suku, kuenje va tundisiwa vocumbo Cedene. Ocumbu Cedene ca nyoleha, kuenda lomue o tẽla oku ci tumbulula. Embimbiliya li popia hati: “Oluali lua eciwa peka lia vakuevĩho.”—Yovi 9:24; tanga Efetikilo 3:23, 24.

Pole, Yehova ka ivaleleko ocipango caye catete catiamẽla komanu, kuenda o ka ci tẽlisa. (Isaya 45:18) Eye o ka tẽlisa ocipango caye okuti, omanu va ka kala ndomo a yonguile kefetikilo.—Tanga Osamo 37:11.

3. Suku o ka tumbulula ndati ombembua palo posi?

Oco omanu va kuate ombembua, Suku tete o ka mãlako olondingaĩvi viosi. Vuyaki wo Harmagedo, ovangelo vokilu va ka nyõla ovanyali vosi va Suku. Kuenje, Satana o ka kutiwa vokuenda kuohulukãi yanyamo. Pole, omanu vana va sole Suku, va ka puluka kenyõleho liaco, oco va kale voluali luokaliye.​—Tanga Esituluilo 16:14, 16; 20:1-3; 21:3, 4.

4. Otembo yipi ohali yi ka pua?

Vokuenda kuohulukãi yanyamo,Yesu o ka viala oluali luosi toke eci lu pongoluiwa vofeka yelau. Eye o ka malako akandu vomanu vosi va sole Suku. Noke Yesu o ka malakovo uveyi, oku kuka kuenda olofa.—Tanga Isaya 11:9; 25:8; 33:24; 35:1.

Otembo yipi Suku a ka malako evĩho palo posi? Yesu wa lombolola “ondimbukiso” yi lekisa okuti, esulilo li kasi ocipepi. Ekalo lioluali koloneke vilo, li kapa kohele omuenyo womanu, kuenda li lekisa okuti, ‘tu kasi koloneke via sulako.’—Tanga Mateo 24:3, 7-14, 21, 22; 2 Timoteo 3:1-5.

5. Helie o ka kala voluali luokaliye palo posi?

Yesu wa tuma olondonge viaye oku longisa omanu oco va linge olondonge, kuenda oku va longisa onjila ya Suku yatiamẽla kocisola. (Mateo 28:19, 20) Voluali luosi Yehova o kasi oku pongiya olohuluwa viomanu oco va kale voluali luokaliye palo posi. (Sofoniya 2:3) Volonjango Viusoma Violombangi Via Yehova, omanu va kasi oku lilongisa ndomo alume va kuele va pondola oku kala olohueli viwa. Akãi va kuele, va kasi oku lilongisavo oku kala olonjali viwa. Handi vali, omãla kuenda olonjali vialume va kasi oku lilongisila kumosi catiamẽla kovina tu lavoka kovaso yoloneke.​—Tanga Mika 4:1-4.

Vonjango Yusoma, o ka kũlĩha omanu valua va sole Suku, haivo va yongola oku u sanjuisa.​—Tanga Va Heveru 10:24, 25.

Oco o kuate elomboloko lia suapo liatiamẽla kondaka eyi, tala kocipama 3, velivulu lia sandekiwa Lolombangi Via Yehova losapi hati:

EMBIMBILIYA LI Longisa NYE?