Ovina Vipi Omãla va Sukila Oku Lilongisa?

“Ovisonehua vi kola viosi ovitumasuku, kuenje vi silivila oku longisa, loku lungula, loku pindisa, loku ikisa esunga.”​—2 TIMOTEO 3:16.

OMÃLA va sukila oku lilongisa ovina viatiamẽla ku Suku. Pi va pondola oku lilongisa ocili caco? Ovo va ci lilongisila velivulu limue lia sumbiwa calua latavo osi oluali okuti, Embimbiliya.

Embimbiliya li kasi ndukanda wa tunda ku Suku. Vukanda waco, Suku wa sitululamo ovituwa viaye kuenda olonumbi vi kuatisa omãla vaye vosi, oku kongelamo amalẽhe kuenda akulu. Kũlĩhĩsa alongiso amue a sangiwa Vembimbiliya kuenda eci omãla va pondola oku lilongisamo.

Nye Suku a yongola okuti oco tu kũlĩha catiamẽla kokuaye?

◼ Ceci Embimbiliya li longisa: “Ove, onduko yove Yehova, ove, lika wove, Tõlo koluali luosi.”​—Osamo 83:18.

Ceci tu lilongisilako: Suku hangusu yimueko ka yi letiwe, pole Omunu umue o kuete onduko yilikasi.

◼ Ceci Embimbiliya li longisa: “Yehova o pendusola ovitima viosi, kuenje o limbuka ovipangelo viosi viovisimĩlo. Nda ove u sanda, eye o tava oku sangiwa love.”​—1 Asapulo 28:9.

Ceci tu lilongisilako: Yehova Suku vosi yetu wa tu kapako oku kongelamo omãla. (Osamo 10:14; 146:9) Eye o yongola okuti tu lilongisa ovina viatiamẽla kokuaye.

◼ Ceci Embimbiliya li longisa: “Ka ci tava oku fukĩlĩsa . . . osiwe. Nda wu va fũkĩlisa kuenje va mbilikiya, ame njeva muẽle evilikiyo liavo.”​—Etundilo 22:22-24.

Ceci tu lilongisilako: Yehova o yevelela olohutililo viosi ndaño muẽle viomãla. Tu pondola oku vangula la Suku olonjanja viosi loku u sapuilako cosi ci kasi vutima wetu kuenda olonjongole vietu.

◼ Ceci Embimbiliya li longisa: “Vo nyika nyika olonjanja, kuenje va valula U o kola wa Isareli.”​—Osamo 78:41.

Ceci tu lilongisilako: Olondaka kuenda ovilinga vietu, vi pondola oku sanjuisa Yehova ale oku u sumuisa. Omo liaco, osimbu ka tua vanguile ondaka yimue, ale oku linga cimue, tu sukila oku sokolola lutate.

Tu tata ndati omanu va litepa letu?

◼ Ceci Embimbiliya li longisa: “Suku ka kuete ocame, puãi, volofeka viosi, wosi u sumbila loku linga esunga, u sungulukila.”​—Ovilinga 10:34, 35.

Ceci tu lilongisilako: Nda Suku o tava omanu vakuavisoko viosi, ka tu ka kuati olonepele la vakuetu omo liekova liavo ale oku litepa kuekalo liavo.

◼ Ceci Embimbiliya li longisa: “Olonjanja viosi lipongiyi okuti vu tela oku kumbulula komunu wosi o pula oku kũlĩhisa elavoko vu kasi lalio. Ci lingi puãi lumbombe kuenda lesumbilo.”​—1 Petulu 3:15.

Ceci tu lilongisilako: Poku sapela catiamẽla ketavo, tu sukila oku lombolola alongiso etu lekolelo, pole tu ci linga lonjila yimue ya sunguluka. Tu sukilavo oku lekisa esumbilo ku vana ka va tiamẽlele ketavo lietu.

Tu tata ndati vakuepata lietu?

◼ Ceci Embimbiliya li longisa: “Ene amãla, pokoli kolonjali viene kovina viosi, momo oco ci sanjuisa Ñala.”​—Va Kolosai 3:20.

Ceci tu lilongisilako: Omãla vana vakuepokolo va lekisa okuti va sole olonjali viavo haivo va yongola oku vumba Suku.

◼ Ceci Embimbiliya li longisa: “Kuati utima woku kuamelela loku lisola pokati. Kuenda, nda vu likuetele olondaka, lieceli pokati. Ndeci [Yehova] o weceli ene, haico ene eceli.”​—Va Kolosai 3:13.

Ceci tu lilongisilako: Omanu vakuavo oku kongelamo vakuepata lietu, olonjanja vimue va ka tu sumuisa. Pole, nda tu yongola okuti Suku ecela akandu etu, tu sukila oku lilongisa oku ecelavo vakuetu.​—Mateo 6:14, 15.

Momo lie tu sukilila oku kala vakuacili kuenda vakuahenda?

◼ Ceci Embimbiliya li longisa: “Oku popia uhembi ku imuhe. Omunu omunu a popie ocili lukuavo, momo tuvimatamata vietimba limuamue.”​—Va Efeso 4:25.

Ceci tu lilongisilako: Eci tu popia ocili, tu kasi oku setukula Suku kuenda oku u sanjuisa. Nda tua kuata ocituwa coku kemba, tu kala Ndeliapu unyali wa Suku, “haeye isia yuhembi.”—Yoano 8:44; Tito 1:2.

◼ Ceci Embimbiliya li longisa: “Ovina viosi vu yongola okuti omanu vo linga haivio vu va linga.”​—Mateo 7:12.

Ceci tu lilongisilako: Tu sukila oku kapako ovisimĩlo, olonjongole, kuenda ovina vikuavo epata lietu li sukila, oku kongelamo vana tu lisungue lavo. Nda tua ‘kala vakuahenda,’ vakuetu va ka vetiyiwavo oku tu tata lohenda.​—1 Petulu 3:8; Luka 6:38.

Ndomo ca lekisiwa vovolandu ava, olonumbi Viembimbiliya vi pondola oku kuatisa omãla okuti eci va kula va kala vakualopandu, vakuesumbilo, kuenda vakuahenda. Pole, helie o sukila oku longisa ovina evi komãla?