Kolela Yehova Suku ‘Yotembo Lovovo’

‘Yehova o pongolola otembo lovovo, kuenda upa olosoma.’—DAN. 2:21.

O TAMBULULA NDATI?

Ovina via lulikiwa kuenda oku tẽlisiwa kuovitumasuku vi lekisa ndati okuti Yehova eye Usokiyi wa Velapo Wotembo?

Oku kũlĩha okuti Yehova eye Suku ‘yotembo lovovo,’ ci tu vetiya oku linga nye?

Momo lie otembo Yehova a sokiya ka yi tatekiwila lovina vi pita voluali kuenda ovisimĩlo viomanu?

1, 2. Nye ci lekisa okuti Yehova wa kũlĩha ciwa otembo?

OSIMBU Yehova Suku ka lulikile omanu, wa sokiya otembo. Kuenje, keteke liakuãla lioku lulika ovina, wa popia hati: “Ku kale ovinyi kepuluvi liokilu, oku tepisa utanya luteke; vi linge olondimbukiso violotembo loloneke lanyamo.” (Efet. 1:14, 19, 26) Ovina viaco, via tẽlisiwa ndomo Yehova a yonguile.

² Koloneke vilo, olonoño via siata oku linga akonomuiso loku kũlĩhĩsa ndomo otembo ya fetika. Velivulu limue mua sonehiwa ndoco: “Otembo yi kasi ndelumbu. Lomue o pondola oku popia hati, o tẽla oku tenda ciwa otembo.” Pole, Yehova wa kũlĩha ciwa otembo. ‘Eye, wa siata oku sapula ovina ka via lingiwile handi. Momo, Yehova eye Ululiki wilu, longongo, kuenda ovina viosi vi kasimo. Eye, wa siatavo oku sapula ovina ka via lingiwile handi.’ (Isa. 45:18; 46:10) Oco tu pamise ekolelo lietu Kondaka ya Suku, tu konomuisi ovitumasuku Viembimbiliya via tẽlisiwa vi lekisa okuti, Yehova eye Usokiyi wa Velapo Wotembo.

OVINA VIA LULIKIWA VI TU VETIYA OKU KOLELA KUSOKIYI WA VELAPO WOTEMBO

3. Nye ci lekisa okuti ovina via lulikiwa vi tenda ciwa otembo?

³ Kuli ovina vimue vitito via lulikiwa okuti, vi tẽla oku tenda ciwa otembo. Eli olio esunga lieci esokiyo liolowola, lia lingiwila lekuatiso liotembo ya siata oku tendiwa lovina viaco okuti, ndaño pa pita ci soka 80 kolohuluwa vianyamo, ka ku kambi osengundu yimosi. Kuli oviluvo vikuavo vi ñuala kekumbi okuti, vi endisiwa lesokiyo liotembo. Olombungululu vimue losãi, ndomo via kapiwa vocivanja cilu, vi pondola oku tepisa ovovo, kuenda via siata oku songuila omanu va linga ovongende. Yehova, Ululiki ‘wotembo o kuete, unene wa velapo,’ kuenda o sesamẽla esivayo lietu.—Tanga Isaya 40:26.

4. Ovinyama lovikũla vimue vi situlula ndati olondunge via Suku?

⁴ Tua siata oku limbukila esokiyo liotembo kovikũla, kuenda kovinyama vimue. Ovikũla vimue lovinyama, vi li pongolola lotembo, ndu okuti, vi kuete ololosio. Olonjila vimue via kũlĩha otembo yoku ilukila kolonepa vikuavo violuali. (Yer. 8:7) Omanu va siatavo oku songuiwa lesokiyo liotembo kutanya kuenda kuteke. Nda tu enda lombalãu konepa yimue yoluali, omo okuti olowola viofeka yaco via litepa, etimba lietu li sukila oku puyuka oloneke vimue, oco li kuame esokiyo liolowola viofeka yaco. Oku limbuka ndomo ovina via lulikiwa vi li pongolola lesokiyo liotembo, ci situlula unene lolondunge via Suku okuti, eye ‘usokiyi wotembo lovovo.’ (Tanga Osamo 104:24.) Yehova o kuete olondunge vialua lunene wa piãla, momo eye Usokiyi wa Velapo Wotembo. Omo liaco, tu sukila oku kolela okuti, o ka tẽlisa ocipango caye!

OVITUMASUKU VIA TẼLISIWA VI PAMISA EKOLELO

5. (a) Tu pondola oku kũlĩha ndati ovina vi keya kovaso yoloneke? (b) Momo lie Yehova a tukuila ovina vi keya kovaso yoloneke, kuenda otembo yipi vi ka tẽlisiwa?

⁵ Oviluvo via Yehova, vi tu longisa ovina vialua viatiamẽla ‘kovituwa viaye ka vi muiwa lovaso.’ Pole, ovina viaco ka vi tambulula epulilo eli: Nye ci ka pita lomanu kovaso yoloneke? (Va Rom. 1:20) Oco tu sange etambululo liaco, tu sukila oku kũlĩha ovina Suku a situlula okuti, vi sangiwa Vembimbiliya. Poku tanga Embimbiliya, tu limbuka okuti, ovitumasuku vialua via tẽlisiwa votembo ya sokiyiwa! Yehova o pondola oku situlula ovina vi keya kovaso yoloneke, kuenda wa kũlĩha ndomo vi ka tẽlisiwa. Ovina via tukuiwa Vovisonehua vi tẽlisiwa, momo Yehova Suku o kuete unene woku tẽlisa ovina viaco votembo a sokiya, ndomo ci litava locipango caye.

6. Nye ci lekisa okuti Yehova o yongola oku tu kuatisa oco tu kuate elomboloko lioku tẽlisiwa kuovitumasuku Viembimbiliya?

⁶ Yehova o yongola okuti, afendeli vaye va kuata elomboloko liovitumasuku vi sangiwa Vembimbiliya, oco va kuatisiwe lelomboloko liaco. Ndaño okuti Suku ka tendi otembo ndeci tua siata oku yi tenda, pole, poku tu sapuila ovina vi laika oku iya, o ci linga lupopi umue okuti, tu kuata elomboloko liolondaka viaye. (Tanga Osamo 90:4.) Elivulu Liesituluilo, li tukula ‘ovangelo vakuãla, va talamẽla owola leteke, losãi, kuenda ulima,’ toke eci tu kuata elomboloko liotembo yaco. (Esit. 9:14, 15) Oku limbuka ndomo ovitumasuku vi kasi oku tẽlisiwa votembo ya sokiyiwa, ci tu kuatisa oku kolela ku Suku ‘yotembo lovovo,’ kuenda Kondaka yaye. Omo liaco, tu konomuisi ovolandu amue.

7. Oku tẽlisiwa kuocitumasuku Yeremiya a tukula, coku nyõla o Yerusalãi lo Yuda, ca lekisa nye?

⁷ Tete, tu konomuisi ovina via pita kocita cepanduvali O.Y., ‘kunyamo wa kuãla wa Yehoyakimi, omõla wa Yosiya, Soma yo ko Yuda.’ Kunyamo waco, oco Yehova Usokiyi wa Velapo Wotembo, ‘a tẽlisa ondaka yaye yoku pisa omanu va kala vo Yuda, yina Yeremiya a tukula.’ (Yer. 25:1) Yehova wa tukuile oku nyõliwa kuo Yerusalãi loku ambatiwa kua va Yudea kumandekua, toke kofeka yo Bavulono. “Omanu vaco va vumba Soma [yo ko] Bavulono akũi epanduvali kanyamo.” Olohoka vio ko Bavulono, via nyõla o Yerusalãi kunyamo wo 607, O.Y., kuenje, va Yudea va tualiwa kumandekua ko Bavulono. Nye ceya oku pita kesulilo lianyamo akũi epanduvali? Yeremiya wa popia hati: “Ca popia Yehova ceci, hati: ‘Eci pa pita akũi epanduvali kanyamo ko Bavulono oco ndu wivaluki, [Ndi tẽlisa] ohuminyo yange . . . kokuene. Ndu tiuli kocitumãlo cilo.’” (Yer. 25:11, 12; 29:10) Ocitumasuku eci ca tẽlisiwa votembo ya sokiyiwa, kunyamo wa 537, O.Y., eci va Media la va Persia va yovola va Yudea ko Bavulono.

8, 9. Ocitumasuku ca Daniele catiamẽla koku iya kua Mesiya loku tumbikiwa Kusoma waye, ci lekisa ndati okuti Yehova eye Suku ‘yotembo lovovo?’

⁸ Kũlĩhĩsa ocitumasuku cikuavo ca tẽlisiwila afendeli va Yehova kosimbu. Eci kua kambele anyamo avali oco va Yudea va tunde ko Bavulono, Suku vonduko yuprofeto Daniele wa popele hati, Mesiya o ka molẽha eci pa pita 483 kanyamo noke yocihandeleko coku tumbulula ovimbaka vio Yerusalãi. Soma ya va Media la va Persia, wa ecele ocihandeleko caco kunyamo wo 455 O.Y. Kunyamo wa 29, K.K., Yesu u Nasara, wa wavekiwa lespiritu sandu poku papatisiwa, kuenje, wa linga Mesiya.a Kunyamo waco, oco anyamo 483 a tẽlisiwa.—Neh. 2:1, 5-8; Dan. 9:24, 25; Luka 3:1, 2, 21, 22.

⁹ Konomuisavo ndomo ocitumasuku cikuavo catiamẽla Kusoma wa Suku ca tẽlisiwa. Ocitumasuku caco ca lekisile okuti, Usoma wa Mesiya u tumbikiwa kilu kunyamo wo 1914. Kuenje, “ondimbukiso” yetukuluko lia Yesu ya tukuiwa Vembimbiliya, ya tẽlisiwa eci Satana a tundisiwa kilu, kuenda ca nena ohali yalua kilu lieve. (Mat. 24:3-14; Esit. 12:9, 12) Embimbiliya li lekisa okuti, kunyamo wo 1914, eci ocitumasuku caco ca tẽlisiwa, oco ‘oloneke via vakualofeka via pitĩla kesulilo,’ kuenje, Usoma wa Suku wa fetika oku viala kilu.—Luka 21:24; Dan. 4:10-17.b

10. Ovina vipi vi ka tẽlisiwa kovaso yoloneke?

¹⁰ Ndopo “ohali ya piãla” yina Yesu a tukula yi fetika. Eci ohali yaco yi pua, oco Usoma Wohulukãi Yanyamo u ka fetika oku viala. Ovina viaco, vi ka tẽlisiwa votembo ya sokiyiwa la Yehova. Eci Yesu a kala palo posi, Yehova wa sokiyile ale ‘eteke lowola’ ovolandu aco a ka tẽlisiwa.—Mat. 24:21, 36; Esit. 20:6.

‘TU LANDI OTEMBO YOKU LINGA OVINA VIA SUNGULUKA’

11. Oku kũlĩha okuti tu kasi koloneke via sulako, ci tu vetiya oku linga nye?

¹¹ Oku kũlĩha okuti Usoma wa Suku wa fetika oku viala, kuenda tu kasi “kotembo yesulilo,” ci tu vetiya oku linga nye? (Dan. 12:4) Omanu valua va siata oku mola ndomo ovitangi vi kasi oku li vokiya voluali, pole, ka va limbukile okuti, ovitangi viaco, vi panga onepa koku tẽlisiwa kuovitumasuku viatiamẽla koloneke via sulako. Omanu vaco va lavoka okuti, eteke limue oluali lu ka nyõliwa, ale va tava kalikolisilo omanu oku nena ‘ombembua loku kolapo.’ (1 Va Tes. 5:3) Anga hẽ tu kuete ovisimĩlo ndevi viomanu vaco? Nda tua limbuka okuti tu kasi koloneke via sulako violuali lulo lua vialiwa la Satana, ka tu vetiyiwa hẽ oku pesila otembo ya kambako koku vumba Suku ‘yotembo lovovo’ oco tu kuatise omanu oku u kũlĩha? (2 Tim. 3:1) Tu sukila oku sokolola lutate kovina tua siata oku pesila otembo yetu.—Tanga Va Efeso 5:15-17.

12. Olondaka Yesu a tukula viatiamẽla koloneke via Noha vi tu longisa nye?

¹² Ka ca lelukile oku ‘landa otembo voluali lulo lue yuka ovitalukilo.’ Yesu wa lungula hati: “Ndeci ca [kala] koloneke via Noha haico ci kala eci Mõlomunu a tukuluka.” Omanu vo koloneke via Noha va tuwile ndati? Suku wa likuminyile oku malako oluali luaco. Kotembo yaco, olondingaĩvi vieya oku nyõliwa letande. Omo okuti Noha ‘wa kala ukuesunga,’ wa kundila omanu vo koloneke viaye esapulo lia Suku. (Mat. 24:37; 2 Pet. 2:5) Pole, omanu va tiamisilile lika ovitima viavo ‘koku lia kuenda koku nyua, koku kuela loku kueliwa. Ovo, ka va limbukile cimue, toke eci etande lieya, kuenje, lia va nyõla vosi.’ Yesu wa lungula olondonge viaye hati: “Liangiliyi, momo [Mõlomunu] iya owola ka wa simĩli.” (Mat. 24:38, 39, 44) Tu lekisi okuti, tu kuãi ongangu ya Noha, poku yuvula ovituwa ndevi viomanu va kala koloneke viaye. Nye ci tu kuatisa oku liangiliya?

13, 14. Osimbu tu lavoka oku iya kuo Mõlomunu, nye tu sukila oku ivaluka catiamẽla ku Yehova okuti ci tu kuatisa oku u vumba lekolelo?

¹³ Ndaño Mõlomunu o keya kowola ka tua kũlĩhĩle, tu sukila oku ivaluka okuti, Yehova eye Usokiyi wa Velapo Wotembo. Otembo yaye, ka yi tatekiwa lovina via siata oku pita voluali, kuenda ovisimĩlo viomanu. Yehova wa sokiya otembo, kuenda wa kũlĩha ndomo ocipango caye ci ka tẽlisiwa. (Tanga Daniele 2:21.) Elivulu Liolosapo 21:1, li tu sapuila ndoco: “Utima wosoma u kasi peka lia Yehova ndolui luovava. Eye [o u tiamisila oku] a panga.”

¹⁴ Yehova o kuete unene woku linga apongoloko oco a tẽlise ocipango caye votembo a sokiya. Apongoloko a siata oku pita voluali, a kasi oku tẽlisa ocitumasuku catiamẽla koku kundiwa kuolondaka viwa Viusoma kolonepa viosi. Sokolola ovitangi via pita kofeka yo Uniãu Sovietika kuenda eci ceyililako. Omanu vamue ka va lavokaile okuti, oku teyiwa kuovimbaka viaco, kua ponduile oku nena lonjanga apongoloko alua pokati kolombiali. Apongoloko aco, a kasi oku ecelela okuti, upange woku kunda olondaka viwa, u li sanduila kolofeka vina vamanji va tatekiwile lolombiali. Omo liaco, tu landi otembo yoku vumba lekolelo Suku ‘yotembo lovovo.’

KOLELA OKUTI YEHOVA O KA TẼLISA OCIPANGO CAYE VOTEMBO A SOKIYA

15. Tu lekisa ndati epokolo kapongoloko a siata oku lingiwa vocisoko ca Yehova?

¹⁵ Oco tu amameko oku kunda olondaka viwa Viusoma, tu sukila oku kolela okuti, Yehova o ka tẽlisa ocipango caye votembo a sokiya. Ovina via siata oku pita voluali, vi pondola oku nena apongoloko kupange woku kunda. Vocisoko ca Yehova, mua siata oku lingiwa apongoloko oco a tu kuatise kupange woku kunda olondaka viwa Viusoma. Tu sukila oku kolela Suku ‘yotembo lovovo,’ poku pokola kapongoloko a siata oku eciwa Lomõlaye okuti, eye “utue wekongelo.”—Va Efe. 5:23.

16. Momo lie tu sukilila oku kolela okuti Yehova o ka tu kuatisa votembo a sokiya?

¹⁶ Yehova o yongola okuti, tu likutilila kokuaye lelianjo loku kolela okuti, o tu ‘kuatisa votembo a sokiya.’ (Va Hev. 4:16) Anga hẽ Yehova ka kasi oku lekisa ocisola komunu lomunu pokati ketu? (Mat. 6:8; 10:29-31) Omo liaco, tu lekisi ekolelo ku Yehova Suku, poku likutilila olonjanja viosi, oco a tu kuatise oku linga ovina tua pinga vohutililo. Pole, tu sukilavo oku tukula vamanji volohutililo vietu.

17, 18. (a)Nye Yehova a ka linga ndopo kovanyãli vaye? (b) Onjanjo yipi tu sukila oku yuvula?

¹⁷ Tu yuvuli ovina vi ‘tepulula ombili yetu,’ kuenda tu likolisiliko oku pamisa ekalo lietu kespiritu. (Va Rom. 4:20) Satana kumue la vana va kasi vemẽhi liaye, va siata oku tateka upange woku kunda Yesu a tuma oku linga. (Mat. 28:19, 20) Ndaño tua siata oku lambalaliwa Leliapu, pole, tua kũlĩha okuti, Yehova, ‘Suku ukuamuenyo, eye Upopeli womanu vosi vo kolela.’ Eye ‘wa kũlĩha ndomo a ka popela kohali, vana vo sumbila.’—1 Tim. 4:10; 2 Pet. 2:9.

¹⁸ Ndopo Yehova o ka mãlako ovina viosi vĩvi, vi kasi voluali lulo lua vĩha. Ndaño ka tua kũlĩhĩle otembo ovina viaco vi ka pita, pole, votembo ya sokiyiwa, Kristu o ka kundula ovanyãli vosi, kuenda o ka kemãlisa uviali wa Yehova Suku. Nda ka tu limbuka ‘otembo lovovo’ tu kasi cilo, tu kapa omuenyo wetu kohele! Omo liaco, tu yuvuli onjanjo yoku sima okuti, “ovina viosi vi kasi . . . ndeci via kala tunde kefetikilo lioluali.”—1 Va Tes. 5:1; 2 Pet. 3:3, 4.

‘KUATA O CITUWA COKU TALAMẼLA’

19, 20. Momo lie tu sukilila oku kuata ocituwa coku talamẽla Yehova?

¹⁹ Vocipango catete ca Yehova Suku catiamẽla komanu, mua kongelele oku lilongisa ovina vialua viatiamẽla kokuaye kuenda koviluvo viaye otembo ka yi pui. Elivulu Liukundi 3:11, li popia ndoco: “Cosi [Yehova] wa ci posuisila uvo waco. Wa kapa elivelo [liovina] ka vi pui vutima womanu okuti ka va tẽla oku limbuka [ovina Suku a linga] tunde kefetikilo toke kesulilo.”

²⁰ Tu eca olopandu omo okuti, Yehova ka pongoluile ocipango caye catiamẽla komanu! (Mal. 3:6) Embimbiliya li popia ndoco: ‘Suku, ka pongoloka, kuenda ka ñuala ndulembo.’ (Tia. 1:17) Ndeci omanu ka va tẽla oku tateka ilu lieve oco ka li ka ñuale kekumbi, cimuamue haico ci pita lotembo Yehova a sokiya okuti, lomue o tẽla oku yi tateka. Yehova eye ‘Soma yonahũlulua.’ (1 Tim. 1:17) Tu ‘lekisi ocituwa coku talamẽla ku Suku yeyovo lietu.’ (Mika 7:7) Omo liaco, tu ‘amamiko oku kolela Yehova, kuenda ovitima vietu vi kuate utõi.’—Osa. 31:24.

[Atosi pombuelo yamẽla]

[Elitalatu kemẽla 19]

Daniele wa kolelele okuti, ovitumasuku vi ka tẽlisiwa

[Elitalatu kemẽla 21]

Wa siata hẽ oku sokiya ciwa otembo oco o linge ocipango ca Yehova?