Apulilo a Lingiwa la Vakuakutanga

Yehova Suku o tenda ndati ‘olofa viukuekolelo?’

▪ Ukualosamo wa vetiyiwa lespiritu sandu oku popia hati: “Omanu vana va fa lekolelo, va kuete esilivilo kovaso a Yehova.” (Osa. 116:15, NW.) Afendeli va Yehova va kuete esilivilo kokuaye. Pole, olondaka vi sangiwa Kosamo 116, ka vi tukula olofa viomunu umosi.

Nda manji umue o linga ohundo yolofa Viukristão, o sukila oku yuvula oku tiamisila olondaka vi sangiwa Kosamo 116:15 komunu waco, ndaño okuti wa vumba Yehova lekolelo toke kolofa viaye. Momo lie? Momo olondaka viukualosamo vi kuete elomboloko likuavo. Ovio, vi lekisa okuti, Suku ka ecelela okuti afendeli vaye vo kolela vosi yavo va fa vonjanja yimosi, momo va kuete esilivilo kokuaye.—Tanga Osamo 72:14; 116:8.

Osamo 116:15, yi lekisa okuti, Yehova ka ecelela okuti, afendeli vaye vo kolela, vosi va kunduiwa kilu lieve. Ovolandu o koloneke vilo, a lekisa ndomo, tua siata oku pandikisa kovitangi, kuenda kalambalalo. Ovina viaco, vi eca uvangi wokuti, Yehova Suku ka ecelela okuti, afendeli vaye va kunduiwa kilu lieve.

Omo okuti Yehova o kuete unene wa piãla, lomue o pondola oku tateka oku tẽlisiwa kuocipango caye, kuenda ka ka ecelela okuti, omanu vaye va kunduiwa kilu lieve. Nda Yehova wa ci linga, ci lekisa okuti, ovanyãli vaye va kuete unene walua, eye ci sule! Nda ca lekisavo okuti, ocipango caye coku yukisa oluali luosi omanu vakuesunga, ka ci tẽlisiwa. (Isa. 45:18; 55:10, 11) Nda kilu lieve ka kua kalele omanu va fendela Yehova, upange u kola wa siata oku lingiwila vonembele yinene yespiritu, nda wa imũha! Nda ka kua kalele ociseveto ‘coluali luokaliye,’ luomanu vakuesunga vemẽhi ‘lilu liokaliye.’ (Esit. 21:1) Mulo voluali nda ka mua kalele olonungi, nda ka tua kuatele elavoko Liuviali wa Kristu vokuenda Kuohulukãi Yanyamo.—Esit. 20:4, 5.

Nda Yehova Suku wa ecelela okuti, ovanyãli vaye va kundula afendeli vocili kilu lieve, nda ca nena etombo konduko yaye. Eci nda ca sepuisa omoko yaye yoku Viala Kilu kuenda palo Posi. Omo okuti Yehova wa sumbila onduko yaye yi kola, ka ecelela okuti afendeli vaye vo kolela vosi va fa. Kũlĩhĩsa olondaka evi: Omo okuti Suku “ukuesunga,” o ka popela omanu vana vo fendele lekolelo. (Esin. 32:4; Efet. 18:25) Yehova nda ecelela okuti ovanyãli va kundula afendeli vaye vosi, ka ci li kuata lolondaka vi sangiwa Vembimbiliya vi popia ndoco: “Yehova ka yanduluka omanu vaye omo onduko yaye yi kola.” (1 Sam. 12:22) Ka ci li kuatavo lolondaka vi popia hati: “Yehova ka pañula omanu vaye, [kuenda] ka yanduluka ocipiñalo caye.”—Osa. 94:14.

Tua sanjuka calua omo lioku kũlĩha okuti, Yehova ka ecelela okuti, afendeli vaye va ka nyõliwa kilu lieve. Omo liaco, tu amamiko oku pokola ku Suku, loku kolela kohuminyo yaye, yokuti: “Lacimue ocimãlẽho va ci telela oku yaka love ci ku linga cimue [cĩvi]; kuenje o yula alimi osi a ku katukila vekanga. Eci oco ocipiñalo cakuenje va Yehova, kuenda esunga liavo lia tunda kokuange.”—Isa. 54:17.

[Etosi lia velapo kemẽla 22]

Suku ka ka ecelela okuti afendeli vaye va kunduiwa