Vana va Sole Yehova Lacimue ci va Kokela Ocilondokua

1. Ocituwa ukuakuyoloka a lekisa ci situlula ndati onjongole yetu yoku vumba Suku okuti ka tuliwekapo?

UFEKO umue o tukuiwa hati Marl Decker, eci afetika oku panga onepa kolomapalo vioku yoloka wa kala umalẽhe. Eye wa tambula ocingangu culu omo lioku yula omapalo yoku yoloka vocinãla ci soka 3.000 kolometulu, ya lingiwa kunyamo wo 1984. Pole, olohaku viaye lalimue eteke vio kuatisile oku yoloka toke kesulilo. Eye wa likonjoka vokulu kuomunu ukuavo va kala oku yolokela kumosi, kuenje wa teka onengo. Ndaño wa pita locitangi caco, kuenda wa lila, pole, ka liwekelepo oku lupuka. Eye wa pita lika olosãi vimue kuenje, wa panga vali onepa kolomapalo vioku yoloka lakãi vakuavo via lingiwa kunyamo wa 1985, kuenje wa yula.

2. Akristão vocili va kasi oku yoloka ndati, kuenda ocimãho cipi va kuete?

² Omo okuti Tuakristão vocili, ekalo lietu li sokisiwa loku linga olupesi lumue lu tuala komuenyo ko pui. Olupesi luetu, ka lu sokisiwa lomunu o yoloka oco a tambule onima. Olupesi luaco ka lu sokisiwavo lomunu o yoloka levando okuti, olonjanja vimue o talama. Pole, lu sokisiwa lomunu o pandikisa koku yoloka oco a tambule onima. Vukanda upostolo Paulu a sonehela vamanji va kala ko Korindo okuti omanu vaco va litumbikile calua koku yoloka, wa tukula omunu ukuakuyoloka vupopi umue wocindekaise. Eye wa soneha ndoco: “Ka wa kũlĩhĩli okuti vakuakuyoloka vosi yavo va yolokela kumosi pole umosi lika o tambula ekolowa? Yoloki oco vu tambuli ekolowa.”—1 Va Kor. 9:24, NW.

3. Akristão vosi va kasi oku yoloka va pondola ndati oku tambula onima yomuenyo ko pui?

³ Embimbiliya li tu vetiya oku linga olupesi luocindekaise. (Tanga 1 Va Korindo 9:25-27.) Cikale Akristão olombuavekua va lavoka oku enda kilu, ale owiñi ­wakahandangala u kuete elavoko lioku kala palo posi, vosi yetu tu lavoka oku tambula onima yomuenyo ko pui. Pole, oku yoloka kuetu kua litepa loku yoloka kua siata oku lingiwa voluali, momo vosi va litumbika koku yoloka nda va pandikisa toke kesulilo va ka tambula onima. (Mat. 24:13) Nda vakuakuyoloka ka va pokola kolonumbi, ka va pitĩla kesulilo liolupesi. Oku yoloka kuaco ku kuatisa omunu oku tambula onima yomuenyo ko pui.

4. Ovina vipi vi pondola oku tu tateka oku yoloka oco tu tambule onima yomuenyo ko pui?

⁴ Ka ca lelukile oku yoloka toke kesulilo. Tu sukila oku lipindisa loku kolela kocimãho caco. Yesu Kristu eye lika wa yoloka toke kesulilo kuenda ka ecelele okuti cimue cu kokela ocilondokua. Pole, ondonge yaye Tiago ya soneha okuti, oloñame via Kristu ‘viosi via siata oku lueya.’ (Tia. 3:2) Olondaka evi viocili! Omo okuti ka tua lipuile, citava okuti vakuetu va tu lueyela, kuenje tu tepulula olupesi luetu. Olonjanja vimue nda tu kasi oku linga ungende, pamue tu lilondoka, kuenje, ka tu kuata vali ongusu yoku amamako lungende wetu. Nda tua kupuka, tu sukila oku votoka lonjanga oco tu amameko oku yoloka. Omanu vamue nda va kupuka va sukila ekuatiso lioku votoka, oco va amameko oku yoloka toke kesulilo. Citava okuti pamue tu kupukavo—1 Olos. 8:46.

NDA WA LILONDOKA, AMAMAKO OKU YOLOKA

5, 6. (a) Momo lie, tu popela tuti ‘lacimue ci pondola oku tu kokela ocilondokua’? Nye ci tu kuatisa oku votoka? (b) Momo lie vamue ka va sandela oku votoka noke yoku lilondoka?

⁵ Citava okuti wa tukuile ale olondaka “oku lilondoka,” kuenda “oku lueya,” oco situlule ndomo ekolelo liomunu li kasi. Ndaño okuti olondaka viaco via tukuiwa Vembimbiliya, pole olonjanja vimue ka vi kuete elomboloko limuamue. Omo liaco, tu konomuisi olondaka vi sangiwa kelivulu Liolosapo 24:16, vi popia hati: “Ukuesunga o kupuka olonjanja epanduvali kuenje o votoka vali. Olondingaĩvi puãi vi lunduka lũvi.”

⁶ Yehova ka ka ecelela okuti vana vo kolela lutima wosi va kuata cimue ci va kokela ocilondokua, ale va liyaka lovitangi vimue okuti ka va tẽla oku vi tetulula, kuenje va liwekapo oku u vumba. Tua kolela okuti Yehova o tu kuatisa oku “votoka” oco tu amameko oku u fendela. Olondaka evi vi lembeleka vosi va sole Yehova lutima wosi! Pole, olondingãivi nda via kupuka ka vi lekisa onjongole yoku votoka. Momo ka vi tava kekuatiso liespiritu sandu lia Suku, leli li eciwa lomanu vaye. Pole vana ‘va sole ovihandeleko via Yehova,’ lacimue ci va tateka oku amamako oku yoloka oco va tambule onima yomuenyo ko pui.—Tanga Osamo 119:165.

7, 8. Nda omunu wa ‘kupuka’ o pondola ndati oku taviwa vali la Suku?

⁷ Vamanji vamue va siata oku pitolola akandu atito, omo liehonguo liavo. Pole, va tendiwa lika okuti olondingesunga kovaso a Yehova, nda va likolisilako oku “votoka,” loku likekembela lutima wosi okuti va amamako oku u vumba lekolelo. Tu pondola oku limbuka ulandu waco poku kũlĩhĩsa ndomo Yehova a tata va Isareli kosimbu. (Isaya 41:9, 10) Elivulu Liolosapo 24:16 ka li lombolola lika ovina vĩvi tua siata oku linga, pole, li lekisa okuti Yehova o kuete onjongole yoku tu kuatisa oku “votoka.” (Tanga Isaya 55:7.) Omo okuti Yehova Suku la Yesu Kristu va tu kolele, va siata oku tu kuatisa oco tu ‘votoke.’—Osa. 86:5; Yoa. 5:19.

⁸ Omunu o panga onepa komapalo yoku yoloka, nda wa kupuka o sukila oku votoka lonjanga oco amameko oku yoloka toke kesulilo. Etu ka tua kũlĩhĩle ‘eteke lowola’ oku yoloka kuetu ku tuala komuenyo ko pui ku pitĩla kesulilo. (Mat. 24:36) Nda tua yuvula ovina vi tu kokela ovilondokua, ci tu kuatisa oku yoloka toke kesulilo liolupesi luetu. Tu yuvula ndati ovina vi koka ovilondokua?

OVINA VI PONDOLA OKU TU KOKELA OCILONDUKUA

9. Ovina vipi vi koka ocilondokua tu konomuisa vocipama cilo?

⁹ Tu konomuisi ovina vitãlo vi pondola oku tu kokela ocilondokua ndeci: Ehonguo lietu, oloñeyi vietimba, oku tatiwa lãvi lamanji umue, elambalalo, kuenda akulueya a vakuetu. Ivaluka okuti, nda tua yapuisiwa, Yehova o lekisa epandi lioku tu kuatisa. Eye ka tu tendi okuti tulohembi.

10, 11. Ehonguo lipi Daviti a kuata?

¹⁰ Ehonguo lietu, li sokisiwa lovawe a kapiwa vetapalo. Nda tua ivaluka ulandu womuenyo wa Soma Daviti lowu wupostolo Petulu, tu limbuka okuti, kua kala ovina vivali via va honguisa ndeci: Ekambo lioku likandangiya, kuenda oku kuatela usumba omanu.

¹¹ Ehonguo lia Soma Daviti tu li limbukila kekandu a linga la Batisieva, omo liekambo lioku likandangiya. Eci Nabala a popia lãvi Daviti, eye wa seteka oku u fetuluinya. Ndaño okuti Daviti olonjanja vimue ka likandangiyile, pole, wa likolisilako oku linga ovina vi sanjuisa Yehova. Daviti wa tẽla lika oku pamisa ekolelo liaye lekuatiso liomanu vakuavo.—1 Sam. 25:5-13, 32, 33; 2 Sam. 12:1-13.

12. Petulu wa amamako ndati oku yoloka ndaño wa lueyele?

¹² Ndaño usumba Petulu a kuatela omanu wo kokela ocilondokua, pole, wa amamako oku pokola ku Yesu kuenda ku Yehova. Eye wa likala Cime caye kovaso owiñi olonjanja vitatu hati, ko kũlĩhĩle. (Luka 22:54-62) Vepuluvi likuavo, Petulu wa lekisile etombo Kakristão Vakualofeka, momo ka va tendele Ndakristão va Yudea va seviwa evamba. Noke, upostolo Paulu wa konomuisa lutate ocitangi caco, kuenje, wa limbuka okuti, pokati Kakristão ka citava okuti, pa kala vamue va livelisapo. Ocili okuti, Petulu wa lekisa ocituwa cimue ka ca sungulukile. Osimbu ocitangi caco ka ca tepele ukamba wa vamanji, Paulu wa lungula Petulu. (Va Gal. 2:11-14) Anga hẽ Petulu wa lekisa epela omo lielungulo a tambula kuenda wa liwekapo oku linga olupesi lu tuala komuenyo ko pui? Sio, ka ci lingile. Eye wa tava kelungulo lia Paulu kuenje wa amamako oku yoloka.

13. Oku vela ku pondola ndati oku tu kokela ocilondokua?

¹³ Olonjanja vimue, omunu o hongua omo lioku vela. Ekalo liaco, li pondola oku tu kokela cilondokua. Noke, ka tu ­kuata vali ombembua yo vutima, kuenje tu hongua omo liekavo. Manji umue ukãi kofeka yo Japãu noke yoku papatisiwa wa vela eci ci soka 17 kanyamo. Eye wa kuata esakalalo omo liocitangi caye, kuenje ca honguisa ekolelo liaye. Noke weya oku liwekapo oku kunda. Pole, wa nyuliwa lakulu vavali vekongelo okuti vo vetiya, kuenje, wa fetika vali oku endaenda kolohongele. Eye wa popia hati: “Eci nda limbuka ocisola vamanji va lekisa kokuange nda fetika oku lila.” Omo liaco, wa fetika vali oku yoloka.”

14, 15. Nye tu sukilila oku linga nda tu kuete oloñeyi ka via sungulukile? Lombolola ulandu waco.

¹⁴ Omanu valua va siata oku yapuisiwa omo lioloñeyi vietimba. Nda tu vetiyiwa loloñeyi viaco, tu sukila oku likolisilako oco tu kuate ovisimĩlo kuenda ovilinga vi likuata lolonumbi via Suku. Tu sukilavo oku ivaluka olondaka via Yesu vupopi umue wocindekaise wa lungula hati, nda iso ale okuokuo kuetu ku tu kokela ocilondokua tu ‘sukila oku ku tetako.’ Vovina viaco ka mua kongelele hẽ ovisimĩlo ka via sungulukile kuenda ovilinga vi tu vetiya oku liwekapo oku yoloka?—Tanga Mateo 5:29, 30.

¹⁵ Manji umue ulume okuti wa kulila vepata limue Liolombangi Via Yehova wa lombolola okuti, ivaluka eci a enda oku liyaka loloñeyi vioku lipekela lalume vakuavo. Eye wa popia hati: “Olonjanja viosi sia lianjele lomanu, kuenda nda simĩle okuti, si sesamẽla oku kala pokati ka vakuetu.” Eci a tẽlisa 20 kanyamo, wa litumbika kupange wakundi votembo yosi kuenda wa linga oñuatisi yekongelo. Noke, wa linga ekandu limue linene, kuenje, akulu vekongelo vo pindisa lekuatiso Liovisonehua. Oku likutilila, loku lilongisa Ondaka ya Suku, kuenda oku kapako ekuatiso liavamanji, co kuatisa oku amamako oku yoloka. Noke lianyamo amue wa popia hati: “Ndaño olonjanja vimue nda siata oku kuata ovisimĩlo viaco, pole, si ecelela okuti, vi ndi yapuisa. Nda lilongisa okuti Yehova ka ecelela okuti, tu setekiwa lovina ka tu tẽla oku yula. Omo liaco, ndi tava okuti Suku wa kũlĩha ovina ndi yongola oku linga.” Manji yaco wa malusula lulandu waye hati: “Ovitangi nda liyaka lavio, vi ka piñanyiwa lasumũlũho ndi ka tambula voluali luokaliye. Omo liaco, ndi yongola oku amamako oku pandikisa oco si ka yapuisiwe.” Manji wa tukuiwa ndeti, wa nõlapo oku amamako oku yoloka.

16, 17. (a) Nye ca kuatisa manji umue wa simĩle okuti wa tatiwa lãvi? (b) Nye tu sukila oku linga oco tu yuvule ovina vi tu kokela ocilondokua?

¹⁶ Oku tatiwa lãvi lamanji umue, ci pondola oku tu kokela ocilondokua. Manji umue wa kala ukulu wekongelo kofeka yo Fransa, wa simĩle okuti wa kala oku tatiwa lãvi. Vokuenda kuotembo wa liwekapo oku endaenda kolohongele kuenda kupange woku kunda. Noke, akulu vavali vekongelo va endele oku u nyula kuenje, vo yevelela lutate osimbu a kala oku lombolola ulandu waye. Ovo vo vetiya oku sapuila ku Yehova ovitangi viaye viosi, kuenda vo sapuila okuti, oku linga ovina vi sanjuisa Yehova, oco ocina ca velapo a sukila oku linga. Manji yaco wa tava kelungulo a tambula, kuenje wa tiuka vekongelo.

¹⁷ Akristão vosi vocili va sukila oku kolela ku Yesu Kristu utue wekongelo okuti komanu ka va lipuile hakoko. Omo okuti “ovaso a Yesu ayela ndocikokoto,” wa siata oku mola ovina viosi lonjila ya sunguluka okuti etu ci sule. (Esit. 1:13-16) Ndaño okuti pamue ka tu kuata elomboloko liocitangi cimue, pole, Yesu wa siata oku mola ovina tu sima okuti, ka via tetuluiwile lesunga. Votembo ya sokiyiwa, Yesu o ka tetulula lesunga ovitangi viosi via siata oku pita vakongelo. Omo liaco, ka tu ka eceleli okuti, ovilinga via vamanji vi tu kokela ocilondokua, kuenje vi tu honguisa.

18. Tu pondola ndati oku pandikisa poku liyaka lovitangi?

¹⁸ Kulivo ovina vivali vi pondola oku tu kokela ocilondokua ndeci: Elambalalo, kuenda akulueya kua vamanji. Volusapo Yesu ata luatiamẽla kulume wa imba ombuto, wa popia hati, ‘elambalalo’ li pondola oku vetiya omanu vamue oku yapuisiwa. Citava okuti elambalalo tu liyaka lalio li tunda kepata lietu, komanu tu lisungue lavo, ale kolombiali, kuenje li yapuisa vana va kuete ekolelo lia hongua. (Mat. 13:21) Pole, nda tu amamako oku sola Yehova lutima wosi, ombuto Yusoma yi tu kuatisa oku kuata olombombo vi pamisa ekolelo lietu. Eci tu liyaka lovitangi tu sukila oku likutilila loku sokolola ovina viwa. (Tanga Va Filipoi 4:6-9.) Yehova o pondola oku tu ĩha ongusu oco tu pandikise kovitangi okuti, lacimue ci tu kokela ocilondokua poku yoloka.

19. Tu yuvula ndati oku yapuisiwa lovina vĩvi vakuetu va tu lingila?

¹⁹ Vamanji vamue va siata oku liwekapo oku vumba Yehova omo liakulueya kua vakuavo. Pamue va yapuisiwa omo liovina vimue vakuavo va sima okuti via sunguluka, pole, ovo va sima okuti ka via sungulukile. (1 Va Kor. 8:12, 13) Nda manji umue wa tu lueyela tu kapako hẽ ovina viaco? Embimbiliya li tu lungula hati, tu sukila oku yuvula oku sombisa vakuetu. Pole, tu sukila oku va ecela ndaño tu sima okuti tu kuete esunga lioku tema omo liocina cĩvi va tu linga. (Luka 6:37) Nda o kasi oku liyaka locitangi cimue ci pondola oku ku yapuisa, li pula ndoco: ‘Ndi liwekapo hẽ oku yoloka omo liakulueya kua vamanji vamue?’ Ndi yongola hẽ oku liwekapo oku vumba Yehova omo lia vamanji ka va lipuile? Ocisola tu kuetele Yehova ci tu kuatisa oku yuvula oku ecelela okuti ovina vĩvi vakuetu va tu lingila vi tu tateka oku yoloka toke kesulilo.

YOLOKA LEPANDI KUENDA YUVULA OKU YAPUISIWA

20, 21. Nye wa nõlapo oku linga oco amameko oku yoloka locimãho coku tambula omuenyo ko pui?

²⁰ O yongola hẽ oku amamako oku “yoloka toke kesulilo”? (2 Tim. 4:7, 8) Elilongiso lio pokolika li kuete esilivilo lia velapo. Poku linga akonomuiso amue, kuama Embimbiliya kumue lalivulu akuavo a sandekiwa lukuenje wa lunguka, loku sokolola ovina wa lilongisa oco o yuvule ovina vi ku kokela ocilondokua. Pinga espiritu sandu lia Yehova oco li pamise ekolelo liove. Tu sukila oku ivaluka okuti, omunu wosi o kasi oku yoloka pamue o lilondoka kuenje o kupuka. Pole, o pondola oku votoka oco amameko oku yoloka. Omo liaco, ovitangi tu liyaka lavio, vi tu longisa ovina vialua vi tu kuatisa oku pamisa ekolelo lietu.

²¹ Embimbiliya li lekisa okuti, nda tu yongola oku tambula onima yomuenyo ko pui, tu sukila oku amamako oku yoloka toke kesulilo. Oku yoloka kuaco ka ku sokisiwa lomanu vamue va endela vokalela locimãho coku tambula onima. Pole, tu sukila oku likolisilako oku yoloka, oco tu tambule onima yomuenyo ko pui. Nda tua amamako oku yoloka, Yehova o tu ĩha ‘ombembua yalua’ yi sokisiwa lofela yi tu sindila kovaso. (Osa. 119:165) Tua kolela okuti, Yehova o kasi oku tu kuatisa cilo, kuenda o ka tu ĩha asumũlũho omuenyo ko pui, nda tua yoloka toke kesulilo.—Tiago 1:⁠12.