Sanjukila Ocituwa ca Yehova Coku Kala Ukuacili Loku Ecela

1, 2. (a) Momo lie tu sanjukilila akamba vana okuti vakuacili, kuenda va ecela vakuavo? (b) Apulilo api tu konomuisa vocipama cilo?

O LOMBOLOLA ndati ondaka ekamba liocili? Manji umue ukãi o tukuiwa hati Ashley, wa popia hati: “Kokuange ekamba liocili omunu una okuti wa ku kapako, kuenda oku ecela nda wa lueya.” Vosi yetu tu sanjukila akamba vana okuti vakuacili, kuenda va ecela vakuavo. Ovo va tu kuatisa oku limbuka okuti, tua kolapo, kuenda tu soliwe.—Olosap. 17:17.

² Yehova eye wa velapo koku kala ukuacili, kuenda eye Ekamba limue li ecela eci tu lueya. Eli olio esunga lieci ukualosamo a popela hati: ‘Ove, a Yehova, wa sunguluka haive ukuakuecela. O kuetele ocisola ka ci pui vosi va ku vilikiya.’ (Osa. 86:5) Oku kala ukuacili kuenda oku ecela ci lomboloka nye? Yehova o lekisa ndati ovituwa viaco vi komõhisa? Tu pondola ndati oku kuama ongangu yaye? Etambululo kapulilo a lingiwa ndeti, li tu kuatisa oku vokiya ocisola tu kuetele Yehova, Ekamba lietu lia velapo. Li tu kuatisavo oku pamisa ukamba wetu lomanu vakuavo.—1 Yoa. 4:7, 8.

YEHOVA UKUACILI

3. Ondaka ukuacili yi lomboloka nye?

³ Vondaka ukuacili, mua kongela oku lieca lutima wosi, oku lekisa ekolelo, kuenda oku pandikisa. Omunu ukuacili ka kuete atatahãi. Eye o kakatela komunu umue, kuenda o pamisa ukamba laye ndaño lovitangi. Momo Yehova eye wa velapo koku lekisa ‘esunguluko.’—Esit. 16:5.

4, 5. (a) Yehova o lekisa ndati okuti ukuacili? (b) Tu pamisiwa ndati poku sokolola ovilinga via Suku vioku kala ukuacili?

⁴ Yehova wa siata oku lekisa ndati okuti ukuacili? Eye ka yanduluka afendeli vaye vo kolela. Umue pokati kafendeli vaco Soma Daviti una wa kala ukuacili ku Yehova. (Tanga 2 Samuele 22:26.) Eci a liyaka lovitangi, Yehova wo songuila, wo teyuila, kuenda wo yovola. (2 Sam. 22:1) Daviti wa limbuka okuti, Yehova ka lekisile lika okuti wa kala ukuacili volondaka, pole, o kuatisa afendeli vaye. Momo lie Yehova a lekisila ku Daviti okuti ukuacili? Momo Daviti wa kala ‘ukuacili.’ Yehova wa kapako afendeli vaye vakuacili, kuenda o va tata lesunguluko.—Olosap. 2:6-8.

⁵ Eci tu sokolola ndomo Yehova a siata oku lekisa kafendeli vaye okuti ukuacili, ci pamisa ekolelo lietu. Manji umue o tukuiwa hati Reed, wa popia hati: “Eci ndi tanga ulandu u lekisa ndomo Yehova a kuatisa Daviti poku liyaka lovitangi, ci pamisa ekolelo liange. Eci Daviti a tilila valeva muna a kala vokuenda kuotembo yimue, Yehova wo kuatisa. Ulandu waco u ndi pamisa calua! Momo, u ndi kuatisa oku limbuka okuti, ndaño ndi liyaka lovitangi, pole, Yehova o ndi kuatisa osimbu nda amamako oku kala ukuacili kokuaye.” Citava okuti o kuatavo ovisimĩlo ndevi via manji wa tukuiwa ndeti.—Va Rom. 8:38, 39.

6. Kovina vipi Yehova a siata oku lekisa okuti ukuacili kuenda ci kuatisa ndati afendeli vaye?

⁶ Kovina vipi vikuavo Yehova a siata oku lekisa okuti ukuacili? Eye wa siata oku ci linga poku kuama ovihandeleko viaye. Yehova o tu sapuila hati: ‘Toke eci omunu a kuka, si pongoloka.’ (Isa. 46:4) Ovina viosi a yongola oku linga, via kunamẽla kovihandeleko viaye vieci ciwa leci cĩvi okuti ka vi pongoloka. (Mal. 3:6) Yehova wa siatavo oku lekisa okuti, ukuacili poku situlula okuti o ka tẽlisa ondaka a likuminya. (Isa. 55:11) Omo okuti Yehova ukuacili, ci kuatisa afendeli vaye vosi vakuekolelo. Ndamupi? Eci tu li kolisilako oku pokola kovihandeleko via Yehova, tu pondola oku kolela okuti, eye o tẽlisa ohuminyo yaye yoku tu sumũlũisa.—Isa. 48:17, 18.

TU KUAMI ONGANGU YA YEHOVA YOKU KALA UKUACILI

7. Tu pondola ndati oku kuama ongangu ya Yehova yoku kala ukuacili?

⁷ Tu kuama ndati ongangu ya Yehova yoku kala ukuacili? Tu ci linga poku kuatisa vana va liyaka lovitangi. (Olosap. 3:27) Ove hẽ wa kũlĩha manji umue wa sumua omo lioku vela, oku lambalaliwa lepata, ale ovitangi vikuavo? Momo lie ku sapelela laye loku tukula ‘olondaka viwa oco viu lembeleke’? (Sak. 1:13)a Nda wa ci linga, o lekisa okuti, ukuacili, kuenda ukamba liocili ‘li kakatela kokuaye okuti ‘huvaye ci sule.’—Olosap. 18:24.

8. Tu kuama ndati ongangu ya Yehova yoku kala vakuacili volohuela?

⁸ Tu pondolavo oku kuama ongangu ya Yehova yoku kala vakuacili poku lekisa okuti tuakuacili komanu vana tu sole. Nda tu kuele, tua kũlĩha okuti tu sukila oku kala vakuacili lohueli yetu. (Olosap. 5:15-18) Tu ci linga poku yuvula ovina vi tu vetiya oku linga ukahokolo. (Mat. 5:28) Tu lekisavo ku vamanji okuti tuakuacili, poku yuvula oku va popia lãvi, ale oku yevelela ombangulo yaco yĩvi.—Olosap. 12:18.

9, 10. (a) Kulie tu sukila oku lekisa okuti, tuakuacili? (b) Momo lie olonjanja vimue ka ca lelukilile oku pokola kolonumbi via Yehova?

⁹ Vosi yetu tu yongola oku kala vakuacili ku Yehova. Tu ci linga ndati? Poku sola ovina Yehova a sole, loku yuvula ovina a nyãle, kuenda oku linga ovina vi sanjuisa utima waye. (Tanga Osamo 97:10.) Oku kuata ovisimĩlo ndevi via Yehova, ci tu kuatisa oku pokola kolonumbi viaye.—Osa. 119:104.

¹⁰ Olonjanja vimue, ka ca lelukile oku pokola kolonumbi via Yehova. Tu sukila oku likolisilako oco tu amameko oku kala vakuacili. Kuli vamanji valua akãi okuti va yongola oku kuela, pole, pokati kafendeli va Yehova ka va sangele manji umue okuti citava oku tokekisa laye olohuela. (1 Va Kor. 7:39) Citava okuti manji umue ufeko kupange a talavaya kuli vamue va siata oku u vetiya oco a kuele umue pokati kavo. Ndaño okuti olonjanja vimue manji yaco o yeva ulika, pole, o sukila oku amamako lekolelo liaye ku Yehova. Ka tu sanjukila hẽ elikolisilo liavo lioku kala vakuacili? Yehova o ka sumũlũisa afendeli vaye va amamako oku kolela kokuaye ndaño lovitangi.—Va Hev. 11:6.

YEHOVA UKUAKUECELA

11. Oku ecela ci lomboloka nye?

¹¹ Cimue pokati kovituwa via velapo via Yehova, onjongole yaye yoku ecela. Ondaka oku ecela yi lomboloka nye? Vondaka yaco mua kongela oku ecela umue wa lueyela ukuavo, nda ci sukiliwa oku ci linga. Pole, ka ci lomboloka okuti, omunu ecela o pisa una wa lueya. Eye, o yuvula oku u kuatela ocikumbiti. Embimbiliya li lekisa okuti, Yehova ‘ecela’ vana va likekembela lutima wosi.—Osa. 86:5.

12. (a) Yehova o lekisa ndati okuti ukuakuecela? (b) Ondaka ‘oku ecela’ akandu yi lomboloka nye?

¹² Yehova wa siata oku lekisa ndati okuti ukuakuecela? Yehova poku ecela omunu umue, o ci linga lutima wosi okuti, ka sokolola vali ekandu liaco. (Isa. 55:7) Tua kũlĩha ndati okuti nda Yehova wa ecela ka sokolola vali ekandu liaco? Kũlĩhĩsa ohuminyo yi sangiwa kelivulu Liovilinga 3:19. (Tanga.) Upostolo Petulu wa vetiya olonjeveleli viaye oco ‘vi likekembele akandu avo okuti vi pongoloka.’ Nda omunu wa lueya o likekembela lutima wosi, o sukila oku suvuka onjila yĩvi a kuama, kuenda ka pitulula vali ekandu liaco. (2 Va Kor. 7:10, 11) Omunu wa likekembela lutima wosi, ‘o siapo’ ocituwa caye cĩvi, kuenda o kuama onjila yi sanjuisa Suku. Nda olonjeveleli via Petulu via likekembelele lutima wosi, nye nda ceya oku pita lavio? Petulu wa popia hati, nda olonjeveleli via pongoloka, ‘Yehova ecela akandu avo.’ Ondaka oku ecela, yopiwa kelimi lio Helasi, yi lomboloka “oku imũla ocina cimue okuti ka ci kalako vali.” Yehova poku ecela akandu etu, ci kasi ndoku puenya lekenya ololetala vimue via sonehiwa vopapelo.—Va Hev. 10:22; 1 Yoa. 1:7.

13. Olondaka viokuti ‘akandu avo si va ivaluka vali’ vi tu kuatisa ndati?

¹³ Tua kũlĩha ndati okuti nda Yehova wa ecela ka sokolola vali ekandu liaco? Tu kũlĩhĩsi ocitumasuku ca Yeremiya catiamẽla kocisila cokaliye ca lingiwa Lakristão olombuavekua okuti, ca yulula onjila yoku ecela akandu omanu vosi va lekisa ekolelo kocisembi. (Tanga Yeremiya 31:34.) Yehova wa popia hati: ‘Ngecela evĩho liavo, lakandu avo si va ivaluka vali.’ Omo liaco, Yehova o tu likuminya okuti, nda wa tu ecela, kovaso yoloneke, ka ka ivaluka vali akandu aco. Eye ka ivaluka vali akandu etu oco a tu kangise olonjanja viosi. Pole, Yehova ecela akandu aco, kuenda ka va sokolola vali.—Va Rom. 4:7, 8.

14. Tu pondola ndati oku lembelekiwa poku sokolola ongecelo ya Yehova? Tukula ulandu umue.

¹⁴ Tu pondola oku lembelekiwa poku sokolola ongecelo ya Yehova. Tu konomuisi ulandu umue. Vokuenda kuanyamo a pita, manji umue ukãi o tukuiwa hati, Elaine, wa tundisiwile vekongelo. Noke lianyamo amue wa tiuka vekongelo. Kuenje, wa popia hati: “Ndaño nda sapuila vakuetu okuti Yehova wa ngecela, pole, nda siata oku sima okuti Yehova o sole calua vakuetu okuti ame ci sule.” Pole, manji Elaine wa lembelekiwa poku tanga kuenda oku sokolola ovolandu Embimbiliya a lombolola ndomo Yehova a siata oku ecela vana va lueya. Manji Elaine wa amisako lulandu waye hati: “Nda limbuka okuti Yehova o ndi sole calua, kuenda wa siata oku ndi tata ciwa.” Noke wa vetiyiwa lolondaka viokuti: “Nda Yehova ecela akandu etu, tu sukila oku yuvula ovisimĩlo viokuti, tu kala londimbukiso yaco vokuenda kuomuenyo wetu.”b Manji Elaine wa popiavo hati: “Sia tavele okuti, Yehova ongecela, kuenda nda simĩle okuti, ndi kala lakandu aco vokuenda kuomuenyo wange. Nda kũlĩha okuti, vokuenda kuotembo, ndi kuata vali ukamba la Yehova, kuenda si kuete vali utima wa teka.” Ocili okuti, Yehova o tu sole, kuenda ecela akandu etu!—Osa. 103:9.

TU KUAMI ONGANGU YA YEHOVA YOKU ECELA

15. Tu kuama ndati ongangu ya Yehova yoku ecela?

¹⁵ Tu pondola oku kuama ongangu ya Yehova yoku ecela vana va tu lueyela. (Tanga Luka 17:3, 4.) Ivaluka okuti, eci Yehova a tu ecela, ka sokolola vali akandu aco. Cimuamue haico tu sukila oku linga okuti, eci tu ecela vakuetu, ka tu ivaluka vali akandu aco kovaso yoloneke.

16. (a) Oku ecela vana va tu lueyela, ci lomboloka hẽ okuti tu tava kovina va linga, ale tu ecelela oku tatiwa lãvi la vakuetu? Ci lombolola. (b) Nye tu sukila oku linga oco tu tambule ongecelo ya Yehova?

¹⁶ Oku ecela vakuetu va tu lueyela, ka ci lomboloka okuti tu tava kovina va linga, ale tu ecelela oku tatiwa lãvi la vakuetu. Pole, ci lomboloka oku yuvula oku kuatela ocikumbiti vana va tu lueyela. Omo liaco, nda tu yongola okuti ­Yehova ecela akandu etu, tu sukila oku kuama ongangu yaye yoku ecela vakuetu. (Mat. 6:14, 15) Ohenda ya vetiya Yehova oku limbuka okuti, ‘tuneketela.’ (Osa. 103:14) Anga hẽ ohenda ka yi tu vetiyavo oku ecela lutima wosi vana va tu lueyela?—Va Efe. 4:32; Va Kol. 3:13.

17. Nye ci pondola oku ku tu kuatisa nda manji umue wa tu lueyela?

¹⁷ Olonjanja vimue, ka ca lelukile oku ecela vana va tu lueyela. Akristão vamue olombuavekua kocita catete, ka ca lelukile kokuavo oku tetulula ovitangi via kala pokati kavo. (Va Fil. 4:2) Nda manji umue wa tu lueyela nye tu sukila oku linga? Tu konomuisi ulandu wa pita la Yovi. Eye wa sumuisiwa ‘lakamba vaye’ ndeci, Elifasi, la Bilidade, kuenda Cofare okuti, vo lundila ovina ka lingile. (Yovi 10:1; 19:2) Pole, noke Yehova wa pisa akamba vaco, kuenje wa va vetiya oku enda ku Yovi, loku eca ocilumba omo liakandu avo. (Yovi 42: 7-9) Pole, Yehova wa pingavo ku Yovi oco a linge ocina cimue. Ocina caco nye? Yehova wa vetiya Yovi oco a kongele volohutililo viaye akamba vaco. Kuenje, Yovi wa pokola kepingilo liaco, kuenda Yehova wo sumũlũisa omo lioku ecela akamba vaye. (Tanga Yovi 42:10, 12, 16, 17.) Ulandu owu u tu longisa nye? U tu longisa okuti, oku kongela volohutililo vietu vana va tu lueyela, ci tu kuatisa oku yuvula oku va kuatela ocikumbiti.

AMAMAKO OKU SANJUKILA LUTIMA WOSI OVITUWA VIA YEHOVA

18, 19. Tu pondola ndati oku amamako oku sola ovituwa via velapo via Yehova?

¹⁸ Tua sanjuka calua omo lioku konomuisa atosi alua atiamẽla kekalo lia Yehova lioku kala ukuacisola. Tua limbuka okuti, Yehova wa lianja lomanu, ka kuete ocame, ukuacali, wa sunguluka, ukuacili, kuenda ukuakuecela. Tua lilongisa lika ovituwa vimue viatiamẽla ku Yehova. Momo vokuenda kuotembo ka yi pui, tu ka lilongisa ovina vialua viatiamẽla kokuaye. (Uku. 3:11) Tu tava kolondaka viupostolo Paulu wa popia hati: ‘Ukũlĩhĩso lukuasi, kuenda olondunge via Suku via longa calua!’ Tu pondolavo oku tukula ocisola ca Suku, kuenda ovituwa viaye epandu tua konomuisa vovipama evi.—Va Rom. 11:33.

¹⁹ Vosi yetu tu amamiko oku sola ovituwa via velapo via Yehova. Tu ci linga poku kũlĩha ciwa ovituwa viaye, loku sokolola catiamẽla kokuaye, kuenda oku kuama ongangu yaye komuenyo wetu. (Va Efe. 5:1) Nda tua ci linga, tu tava kolondaka viukualosamo wa imba ocisungo hati: ‘Oku kala ocipepi la Suku, ci kuete esilivilo liocili kokuange.’—Osa. 73:28.