Kũli̇̃hi̇̃sa Ovituwa o Sukila oku Lekisa

1, 2. ‘Ovituwa vipi tu sukila oku lekisa oco tu taviwe’ la Yehova?

OMANU valua va siata oku kuata onjongole yoku kũlĩha ovina vakuavo va sima viatiamẽla kokuavo. Omo okuti Tuakristão vocili ka tu sukila hẽ oku sakalala leci Yehova a sima catiamẽla kokuetu? Yehova eye wa Velapo voluali luosi, kuenda eye “ono yomuenyo.”—Osa. 36:9.

² Upostolo Petulu poku lombolola catiamẽla ‘kovituwa tu sukila oku lekisa’ kovaso a Yehova, o tu vetiya oco ‘tu kale omanu va kola, haivo va lekisa esumbilo.’ (Tanga 2 Petulu 3:11.) Oco tu taviwe la Yehova, tu sukila oku lekisa ‘ovituwa’ vi eca uvangi wokuti, tuambata omuenyo wa sunguluka, kuenda tu kuete ukamba laye. Oco tu taviwe la Yehova, tu sukilavo oku lekisa ‘ovituwa viwa,’ kuenda oku pokola kokuaye. Omo okuti Yehova wa siata ‘oku kũlĩhĩsa ovitima,’ eye wa kũlĩha nda tu kuete ovituwa viwa, kuenda tua litumbika kokuaye ale sio.—1 Asa. 29:17.

3. Apulilo api tu sukila oku linga atiamẽla kukamba wetu la Yehova?

³ Satana Eliapu, ka yongola okuti, tu taviwa la Yehova. Eye o tu vetiya oku linga ovina vi tepa ukamba wetu la Yehova. Satana o tu yonja luhembi waye oco tu liwekepo oku fendela Yehova. (Yoa. 8:44; 2 Va Kor. 11:13-15) Omo liaco, tu sukila oku lipula ndoco: ‘Satana wa siata oku kemba ndati omanu? Nye ndi sukila oku linga oco ndi teyuile ukamba wange la Yehova?’

SATANA WA SIATA OKU YAPULA NDATI OMANU?

4. Nye Satana a siata oku linga oco a nyõle ukamba wetu la Yehova, kuenda momo lie?

⁴ Ndonge Tiago wa popia hati: “Omunu lomunu o yonjiwa loku kembiwa loloñeyi viaye muẽle. Eci oloñeyi vi li vokiya, viu vetiya oku linga ekandu, kuenje, ekandu li tuala kolofa.” (Tia. 1:14, 15, NW) Satana wa siata oku kũlĩhĩsa oku ku tunda ovisimĩlo viutima wetu oco ukamba wetu la Yehova u nyõlehe.

5, 6. (a) Satana wa siata oku seteka ndati oku yapuisa ovitima vietu? (b) Ovina vipi vitatu a siata oku kapa oco a tu vetiye oku kuata olonjongole vĩvi kovitima vietu? Wa siata oku kuama ndati ovina viaco?

⁵ Olonjanjo vipi Satana a siata oku kapa oco a yapuise ovitima vietu? Embimbiliya li lekisa okuti, “oluali luosi lu kasi povaka ukuevĩho.” (1 Yoa. 5:19) Volonjanjo viaco, mua kongela “ovina vi kasi voluali” lulo. (Tanga 1 Yoano 2:15, 16.) Tunde kosimbu, Eliapu lia siata oku sandiliya onjila yoku tu yapula lovina violuali. Omo okuti tu kasi voluali lua vialiwa la Satana Eliapu, tu sukila oku yuvula olonjanjo viaye.—Yoa. 17:15.

⁶ Satana wa siata oku tu vetiya oco tu kuate olonjongole vĩvi kutima wetu. Upostolo Yoano wa tukula ovina vitatu Satana a siata oku yapula lavio omanu ndeci: (1) “Oñeyi yetimba,” (2) “oñeyi yovaso,” kuenda (3) ‘oku litunula lovina viomuenyo.’ Satana wa seteka oku yapula Yesu lovina vitatu via tukuiwa ndeti, eci a kala vekalasoko. Omo okuti wa siata oku kapa olonjanjo viaco vokuenda kuanyamo alua, wa kũlĩha ndomo a pondola oku yapula omunu lomunu lovina viaco. Osimbu ka tua konomuisile ndomo tu pondola oku li teyuila kolonjanjo viaco, tu kũlĩhĩsi ndomo Eliapu lia yapula Heva, pole, ka lia tẽlele oku yapula omõla wa Suku.

“OÑEYI YETIMBA”

7. Satana wa yonja ndati Heva ‘loñeyi yetimba’?

⁷ Oco omanu va kuate ongusu vetimba, va sukila oku litekula lokulia kuwa. Yehova wa lulika oluali oco mu kale okulia kualua. Citava okuti Satana o seteka oku tu yapula lonjongole yoku lia oco tu linge cimue ci sumuisa Suku. Tu konomuisi ndomo a yapuisa Heva lonjongole yokulia. (Tanga Efetikilo 3:1-6.) Satana wa sapuila Heva hati, nda wa lia ‘kepako liuti woku kũlĩha eci ciwa leci cĩvi,’ ka fi. Noke, wo sapuilavo hati, nda wa lia kepako liaco, o kala nda Suku. (Efet. 2:9) Satana Eliapu wa sapuila Heva hati, ka sukila oku pokola ku Yehova oco amameko lomuenyo. Olondaka viaco viuhembi! Omo okuti Satana wa kapa kutima wa Heva ovisimĩlo vĩvi, pokati kolonjila vivali wa sukilile oku nõlapo yimue ndeci: Ocisimĩlo coku yuvula oku lia kepako liaco, ale oku ecelela okuti, onjongole yoku lia kepako yi li vokiya. Ndaño okuti vocumbo Cedene mua kala oviti vikuavo viapako, pole, wa nõlapo oku tava kolondaka Satana o sapuila viatiamẽla kuti wa kala vokati ­kocumbo. Noke ‘wa yunga epako liaco, kuenje wa liako.’ Satana wa vetiya Heva oku kuata onjongole yoku lueya onumbi Ululiki waye a ecele.

8. Satana wa seteka ndati oku yapula Yesu ‘lonjongole yokulia’? Momo lie eyonjo liaco ka lio tundilile ciwa?

⁸ Eci Yesu a kala vekalasoko, Satana wa setekavo oku u yapula lonjongole yokulia. Momo Yesu wa kala eci cisoka 40 koloneke, kuenda 40 kovoteke okuti ka kuatele okulia. Kuenje, Satana wa sapuila Yesu hati: ‘Nda vumõla a Suku popia lewe eli, oco li linge ombolo.’ (Luka 4:1-3) Pokati kolonjila vivali Yesu a kuata, wa sukilile oku nõlapo yimue ndeci: Oku likala oku linga ocikomo oco ka ka tẽlise onjongole yokulia, ale oku linga ocikomo caco. Yesu wa kũlĩhĩle okuti, wa sukilile oku yuvula oku ci linga oco ka ka tẽlise onjongole yaye. Ndaño Yesu wa kala lonjala, pole, ka lingile ocikomo caco, momo ka yonguile oku nyõla ukamba waye la Yehova. Omo liaco, wa tambulula Satana hati: ‘Ca sonehiwa okuti omunu ka muila omuenyo kokulia, pole o kuatisiwa lolondaka vi tunda vomẽla wa Yehova.’—Luka 4:4.

‘OÑEYI YOVASO’

9. Olondaka viokuti ‘ovaso ove a ka letuluka’ vi lomboloka nye? Satana wa kapa ndati onjanjo yaco oco a yapule Heva?

⁹ Yoano wa tukulavo ‘oñeyi yovaso’ okuti yimue pokati kolonjanjo Satana a siata oku kapa, oco a yapule omanu. Citava okuti omunu o vetiyiwa lonjongole yoku linga cimue poku ci tala. Satana wa yapula Heva lonjongole yovaso poku u sapuila hati: ‘Ovaso ove a ka letuluka.’ Osimbu Heva a kala oku tala uti wepako Yehova a lunguile hati ka citava oku liako, onjongole yoku lia kepako liaco ya livokiya. Kuenje ‘wa limbuka okuti, citava oku lia kepako liuti waco.’

10. Satana wa seteka ndati oku yapula Yesu ‘loñeyi yovaso’? Yesu wa tambulula ndati?

¹⁰ Nye ci popiwa catiamẽla ku Yesu? Satana ‘wo lekisa ovosoma osi o kilu lieve. Kuenje wo sapuila hati: Ndu ku ĩha uviali wosi wokilu lieve lulamba waco, momo wa ñundikiwa, kuenda ndu weca komunu ndi yongola.’ (Luka 4:5, 6) Yesu ka muile lovaso aye uviali wosi lulamba waco, pole, Satana wa simĩle okuti, o yapuisiwa lovina a mola. Omo liaco, Satana wa sapuila Yesu hati: ‘Nda wa ndi fendela, ovina viosi vi linga viove.’ (Luka 4:7) Omo okuti Yesu ka yonguile oku kala omunu umue o pokola ku Satana, wa tambulula lonjanga hati: ‘Ca sonehiwa citi: Fendela Yehova Suku yove, eye lika o vumba.’—Luka 4:8.

‘OKU LITUNULA LOVINA VIOMUENYO’

11. Heva wa kembiwa ndati la Satana?

¹¹ Yoano poku situlula ovina violuali lulo, wa popia eci catiamẽla ‘koku litunula lovina viomuenyo.’ Omo okuti eci Adama la Heva va lulikiwa ovo lika va kala mulo voluali, ka va kuatele epuluvi lioku lekisa komanu ‘ovokuasi avo.’ Pole, va kuata epela. Eci Satana a sapela la Heva, wo kemba hati, Suku wa soleka ocina cimue ciwa okuti, ka yongola oku ceca kokuaye. Satana wa sapuilavo Heva hati, nda wa tava oku lia ‘kepako liuti woku kũlĩha eci ciwa leci cĩvi, o kala nda Suku, kuenda o kũlĩha eci ciwa leci cĩvi.’ (Efet. 2:17; 3:5) Wa popiavo hati, Heva o pondola oku kala komuenyo okuti ka sukila ekuatiso lia Yehova. Epela olio lia vetiya Heva oku tava kuhembi waco. Kuenje, wa lia kepako liuti Yehova a handelekele hati, ka ci tava oku liako, momo wa simĩle okuti, ka fi. Pole, wa kembiwa!

12. Onjila yipi Satana a kuama oco a seteke oku yapuisa Yesu, pole, wa tambulula ndati?

¹² Yesu wa lekisa ongangu yiwa yumbombe okuti, ya litepa leyi ya Heva! Satana wa seteka Yesu lonjila yikuavo, oco a linge ocina cimue ci komõhisa omanu, pole, ci kapa Suku voseteko. Yesu ka tavele, momo wa kũlĩhĩle okuti, nda wa ci lingile, nda ca lekisa okuti o kuete epela! Omo liaco, wa tambulula Satana hati: ‘Ca sonehiwa citi: Ku ka kape voseteko Yehova Suku yove.’—Tanga Luka 4:9-12.

TU TEYUILA NDATI UKAMBA WETU LA YEHOVA?

13, 14. Lombolola ndomo Satana a siata oku seteka oku tu yapuisa koloneke vilo.

¹³ Koloneke vilo, Satana wa siata oku kapa olonjanjo vimuamue ndeci a linga poku yapula Heva, kuenda oku seteka Yesu. Eye o yapula omanu ‘loloñeyi vietimba’ oco va linge ovina via vĩha, oku lia calua, kuenda uholua. Satana wa siatavo oku yapula omanu ‘loloñeyi viovaso,’ poku va vetiya oku tala omanu va kasi epolõla haivo va linga ukahonga, ca piãla enene vo Internet. Eye o vetiyavo omanu oku kuata ekemãlo, kuenda epela, ‘omo liovokuasi’!

¹⁴ Satana wa siata oku yonja omanu ‘lovina violuali lulo,’ ndeci ukuakupipa ombisi a kapa onũlo konjolo. Eci ombisi yi mola onũlo, yi kuata onjongole yoku yilia, pole, vokati konũlo yaco muli onjolo. Cimuamue haico Satana a siata oku linga poku yonja omanu. Momo o va vetiya oku linga ovina va yongola, ndaño okuti vi ­pisiwa lolonumbi via Suku. Ovina viaco vi pondola oku tu vetiya oku kuata olonjongole vĩvi oco vi yapule utima wetu. Satana o vetiya omanu oku sima okuti, oku pitisa kovaso olonjongole viavo oco ca velapo komuenyo, pole, oku linga ocipango ca Yehova ci sule. Ove hẽ o tava oku yapuisiwa luhembi waco?

15. Tu pondola ndati oku kuama ongangu ya Yesu yoku yuvula oku yapuisiwa la Satana?

¹⁵ Ndaño okuti Heva wa yapuisiwa layonjo a Satana, pole, Yesu wa pandikisa kolonjanjo viaco. Olonjanja viosi Satana a seteka Yesu oku u yapuisa, eye wa enda oku tambulula lekuatiso Liovisonehua poku popia hati: “Ca sonehiwa.” Nda tu kuete ombili yoku tanga Embimbiliya, tu kuata ukũlĩhĩso walua u tu kuatisa oku sokolola ovinimbu vimue eci tu liyaka layonjo. (Osa. 1:1, 2) Oku ivaluka ongangu yiwa yafendeli va Yehova vo kosimbu va tukuiwa Vembimbiliya, ci tu kuatisa oku kuama ongangu yavo yoku kala vakuacili. (Va Rom. 15:4) Oku lekisa esumbilo ku Yehova poku sola ovina a sole, loku suvuka ovina a nyale, ci tu teyuila kovitangi.—Osa. 97:10.

16, 17. Ovisimĩlo vietu vi tu kuatisa ndati oku limbuka ekalo liomuenyo wetu?

¹⁶ Upostolo Paulu o tu vetiya oku kuata ‘ovisimĩlo’ vi tu kuatisa oku kala omanu va ecelela oku penguluiwa lovisimĩlo via Yehova, kuenda oku yuvula ovisimĩlo violuali. (Va Rom. 12:1, 2) Paulu poku tu ivaluisa esilivilo lioku lavulula ovisimĩlo vietu wa popia hati: “Tu nyõla ovisimĩlo viosi viomanu vina ka vi litava lukũlĩhĩso wa Suku, kuenje tu vi pokuisila ku Kristu.” (2 Va Kor. 10:5, NW) Omo okuti ovisimĩlo vietu vi kuete unene woku situlula ekalo liomuenyo wetu, tu sukila oku ‘sokolola ovina’ vi sanjuisa Suku.—Va Fil. 4:8.

¹⁷ Nda tu yongola oku kala omanu va kola ku Yehova, tu sukila oku yuvula ovisimĩlo vi tu vetiya oku kuata oloñeyi vĩvi. Omo liaco, tu sukila oku sola Yehova ‘lutima wa yela.’ (1 Tim. 1:5) Omo okuti utima we yuka elimbi, pamue ka tu limbuka lonjanga ndomo tu kasi oku yapuisiwa ‘lovina violuali lulo.’ (Yer. 17:9) Ka tu sukila hẽ oku ‘likonomuisa etu muẽle nda tu kuete ekolelo lia pama’ poku kũlĩhĩsa ovina tua lilongisa Vembimbiliya?—2 Va Kor. 13:5.

18, 19. Momo lie tu sukilila oku lekisa ovituwa vi taviwa la Yehova?

¹⁸ Ocina cikuavo ci tu kuatisa oku yuvula ‘ovina violuali lulo,’ oku ivaluka olondaka via Yoano wa popia hati: “Oluali lu takata loñeyi yaluo, puãi u o lingainga ocipango ca Suku o kala oloneke ka vi pui.” (1 Yoa. 2:17) Oluali lulo lua Satana lu kasi ndu okuti lu ka amamako otembo ka yi pui. Pole, ovina viaco ka vi kala otembo yalua. Poku ivaluka okuti ovina viosi vi kasi voluali lulo lua Satana vi ka nyõliwa, ci tu kuatisa oku yuvula oku yapuisiwa layonjo aye.

¹⁹ Upostolo Petulu o tu vetiya hati, tu sukila oku kala omanu va taviwa la Yehova Suku, osimbu ‘tu lavoka oku iya kueteke lia Yehova. Momo ovailu a ka pia kuenje ovina viosi vi ka yenguluiwa lowuya walua!’ (2 Pet. 3:12) Eteke liaco ndopo li pitĩla, kuenje, Yehova o ka nyõla ovina viosi viatiamẽla koluali lua Satana. Osimbu eteke liaco ka lieyile, Satana o ka amamako oku tu yonja, ndeci a yonja Heva la Yesu. Ka tu ka kuami ongangu ya Heva poku tẽlisa olonjongole vietu. Nda tua ci linga, ci lekisa okuti, Satana eye suku yetu. Pole, tu kuami ongangu ya Yesu poku tamalãla kayonjo aco, ndaño okuti ovina Satana a tu lekisa vi kasi ndu okuti viwa. Omo liaco, omunu lomunu pokati ketu a lekise ovituwa vi taviwa la Yehova.