“Tua sanga Mesiya”!

Noke liovita vikuãla vianyamo tunde eci elivulu liasulako liovisonehua vio Heveru lia sonehiwa, olondaka viuprofeto Mika viatiamẽla ku Mesiya via tẽlisiwa. Momo, Yesu wa citiwila Kombeteleme. Eci papita 30 kanyamo, kunyamo wa 29 K.K., onepa yatete yo citumasuku ca Daniele catiamẽla kokuiya kua Mesiya ca tẽlisiwa. Yesu wa papatisiwa kuenda Suku wo waveka lespiritu sandu. Kuenje Mesiya una va kala oku lavoka okuti eye Ombuto ya likuminyiwa, wa tukuluka!

Yesu wa fetika upange woku kunda, ‘poku sapula olondaka viwa viusoma wa Suku.’ (Luka 8:1) Ndomo ca popiwile vocitumasuku, Yesu wa lekisa okuti ukuacisola, ukuesunga, kuenda wa kapeleko omanu. Alongiso aye a kuatisa omanu kuenda wa lekisa ocisola poku “sakula ovovei osi lafengi osi” pokati komanu kuenda wa lekisa okuti, Suku wa kala laye. (Mateo 4:23) Omanu vosi cikale akulu ale omãla, va liongoluila ku Yesu kuenje va popia vati: “Tua sanga Mesiya”!—Yoano 1:41.

Yesu wa popele hati, osimbu Usoma waye ka wa fetikile oku viala oluali luosi, voluali mu kala uyaki, ovilemawe kuenda ovitangi vikuavo. Eye wa vetiya vosi oku amamako oku ‘lavulula.’—Marko 13:37.

Yesu wa kala omunu walipua okuti wa pokola ku Suku, pole wa kuata ovanyali veya oku u ponda. Olofa viaye via linga ofeto yalipua yoku tu yovola kekandu Adama la Heva va linga, momo va pumba oku kala otembo ka yi pui Vocumbo Celau.

Ocitumasuku ca popele okuti Suku o ka pindula Yesu vetimba liespiritu noke yoloneke vitatu, ca tẽlisiwa. Yesu wa molẽha kueci ci pitahãla 500 kolondonge viaye. Osimbu Yesu ka tiukilile kilu wa eca kolondonge viaye ocikundi coku kunda olondaka viwa viatiamẽla kokuaye kuenda Usoma waye “komanu vo kolofeka viosi.” (Mateo 28:19) Va tẽlisa ndati ocikele caco?

—Ulandu wopiwa kelivulu lia Mateo, Marko, Luka, Yoano kuenda 1 Va Korindo.