O Kala Ndati Eci o Mola Avala?
Poku tala ovina via ku ñuala, ovaso kuenda owoño vi talavayela kumosi oco o limbuke ovina. Ci tava okuti o mola epako limue kuenda o nõla nda o yongola oku li lia. Poku vanja kilu, o pondola oku limbuka nda eteke liaco ombela yi loka ale sio. O pondolavo oku mola olondaka loku vi tanga kuenda oku sanda elomboloko liavio. Toke cilo, o kasi oku vetiyiwa lavala. Ku tava hẽ kondaka eyi?
Evala liepako li ku kuatisa oku limbuka nda lia pia kuenda lisõsa. Evala liokilu kuenda alende a ku kuatisa oku kũlĩha ekalo liotembo. Osimbu o tanga olondaka viocipama cilo, ovaso ove a ku kuatisa oku limbuka oku litepa ku kasi pokati kavala lulandu wa sonehiwa, kuenda evala liopapelo. Ndaño kua ci limbukile, olonjanja vialua oku kuama evala oco ci ku kuatisa oku kũlĩha ovina via ku ñuala. Pole, evala li pondolavo oku vetiya ovisimĩlo viove.
NDOMO AVALA A VETIYA OVISIMĨLO
Eci iñila vovenda yimue, o pondola oku mola olokasia, ololata, kuenda ovina vikuavo via litepa okuti, vi vetiya ovaso ove. Nda wa ci limbuka ale sio, vakuakusandeka ovina vi landisiwa, va siata oku nõla avala alitepa oco a vetiye ovisimĩlo kuenda olonjongole viove. Vakuakuposuisa olonjo, kuenda vana va vi pindala, va kũlĩha okuti avala a vetiya onjongole yove.
Omanu va pondola oku lombolola avala lonjila ya litepa, omo liekalo, kuenda ovituwa viavo. Omanu vamue vocifuka co Asia va tiamisila evala li kusuka kekalo liwa kuenda kocipito, pole kolofeka vimue vo Afrika, evala li kusuka li lomboloka esumuo. Ndaño omanu va pangiwa lonjila ya li tepa pole va pondola oku sola avala amuamue. Tu kũlĩhĩsi avala atatu oco tu limbuke ndomo a pondola oku vetiya ovisimĩlo viove.
EVALA LI KUSUKA, li limbukiwila ocipãla. Evala li kusuka li tiamisiwila kongusu, kuyaki kuenda kovina vi koka ohele. Evala li kusuka li koka esakalalo kuenda utima u veta lonjanga.
Vembimbiliya ondaka yo Heveru yokuti, “ci kusuka,” yi lomboloka “osonde.” Embimbiliya li tukula evala li kusuka, poku lombolola ociluvialuvia cocipuepue omondi wa wala olonanga vi vumbula levi vi kusuka, “wa tumala kocinyama ci kusuka nge, ce yuka olonduko vioku tomba.”—Esituluilo 17:1-6.
EVALA LIEMẼLA likoka ekalo lia litepa leli li tunda koku mola evala li kusuka, momo ka li koki esakalalo. Evala liaco litiamisiwila kombembua. Eci tu mola ocumbo coloneleho kuenda oviti vi talala tu kala ciwa. Ulandu watiamẽla kovina via lulikiwa u sangiwa kelivulu Liefetikilo u lekisa okuti Suku wa panga owangu, lovikũla oco vi kuatise omanu.—Efetikilo 1: 11, 12, 30.
EVALA LI YELA li tiamisiwila kocinyi, koku kolapo kuenda koku yela. Li tiamisiwilavo kovituwa ndeci ohenda, umamale, kuenda onjelo. Evala li yela lia tukuiwa olonjanja vialua Vembimbiliya. Vovinjonde, omanu kuenda ovangelo, va lekisiwa okuti va wala uwalo u yela, u lombolola esunga, kuenda oku yela kespiritu. (Yoano 20:12; Esituluilo 3:4; 7: 9, 13, 14) Otuvalu tu yela kuenda vana va endelako okuti va wala olonanga viovalatanya vi yela tue, vi lomboloka uyaki wesunga. (Esituluilo 19: 14) Suku wa tukula evala li yela poku situlula onjongole yaye yoku ecela akandu poku popia hati: “Ndaño akandu ene a kusuka ngẽ ndonanga yohusu, a yela ndocikokoto.”—Isaya 1: 18.
EVALA LI KUATISA OKU SOKOLOLA OVINA
Embimbiliya li tukula evala poku situlula elomboloko Suku a kuete liekalo liomanu liatiamẽla kavala. Elivulu Liesituluilo Vembimbiliya li tukula ovina tu kasi oku pita lavio koloneke vilo oku kongelamo uyaki, onjala kuenda oku fa omo liekambo lioku lia kuenda ovovei. Oco tu kuatisiwe oku ivaluka ovina viaco, kua tukuiwa ocinjonde colokavalu vi kuete avala a litepa.
Catete, okavalu ka yela, ka lomboloka uyaki wesunga wa Kristu Yesu. Noke, tu lete okavalu ka kusuka okuti, ka lomboloka uyaki pokati kolofeka. Kuenje, tu letevo “okavalu ka tekãva” okuti, ka lomboloka onjala. Tu letevo ‘okavalu kocimembia okuti, u endelako onduko yaye Kufa.’ (Esituluilo 6: 1-8) Avala olokavalu tua konomuisa ndeti, a tu kuatisa oku kuata elomboloko liaco. Omo liaco, ca leluka oku ivaluka avala olokavalu okuti, a tu longisa ovina viatimẽla koloneke vilo.
Vembimbiliya musangiwa ovolandu alua a tiamẽla kavala okuti, a lekisa ekalo liomuenyo womanu. Ululiki wocinyi, avala kuenda ovaso omanu, wa panga avala oco a kuatise omanu oku kuata elomboloko liovina. Avala a tu kuatisa oku kũlĩha ovina via tu ñuala. Evala li vetiya ekalo lietu, kuenda li pondola oku tu ivaluisa ovina vi kuete esilivilo. Handi vali, evala ombanjaile yocisola Yululiki wetu oco yi tu kuatise oku kuata esanju komuenyo.