Elavoko Liava Va Fa Epinduko

Ove hẽ, wa kolela kohuminyo yepinduko yi sangiwa Vembimbiliya?a Elavoko lioku li sanga la vangandietu va fa, li sanjuisa calua. Anga hẽ elavoko liaco liocili? Oco tu tambulule epulilo liaco, tu sukila oku konomuisa ulandu wovapostolo va Yesu Kristu.

Ovapostolo va kolelele kelavoko liepinduko liava va fa. Momo lie? Kuli asunga avali. Catete, elavoko liavo lia kunamẽlele kovina va mola: Yesu wa pinduiwa kolofa. Ovapostolo kuenda eci ci pitahãla ‘500 via vakuetavo’ va mola Yesu wa pinduiwa. (1 Va Korindo 15:6) Handi vali epinduko lia Yesu li taviwa kuenda lia sonehiwa ndomo ci lekisiwa Vavanjeliu akuãla.​—Mateo 27:62–28:20; Marko 16:1-8; Luka 24:1-53; Yoano 20:1–21:25.

Cavali, ovapostolo va mola apinduko atatu a lingiwa la Yesu. Liatete ko Naini, noke ko Kafarinau, oku sulako ko Betánia. (Luka 7:11-17; 8:49-56; Yoano 11:1-44) Epinduko lia sulako lina lia tukuiwa vorevista yilo, mua kongelele epata limue okuti lia kala ekamba lia Yesu. Tu konomuisi ovina via pitako.

“AME NDIPINDUKO”

“Mume wove o pinduka.” Yesu wa sapuila olondaka evi ku Marta una okuti tunde eci manjaye Lasaru a fa, pa pitile ale oloneke vikuãla. Kefetikilo Marta ka kuatele elomboloko liolondaka via Yesu. Ndaño wa tambulula hati, “Ndi ci okuti o pinduka,” pole wa simĩle hati ci ka lingiwa lika kovaso yoloneke. Sokolola esanju a kuata noke yoku yeva Yesu eci a popia hati, “Ame ndipinduko haime ndimuenyo,” wa mola ndomo eye a pindula mume waye kolofa!​—Yoano 11:23-25.

Pi Lasaru a kala vokuenda kuoloneke vikuãla noke yokufa? Lasaru ka popele okuti wa kala lomuenyo kocitumãlo cikuavo. Lasaru ka kuatele ocilelembia ka ci fi okuti ca endele kilu. Yesu poku pindula Lasaru ko upile kilu kuna a kuata esumũlũho lioku kala ocipepi la Suku oco o nene vali palo posi. Oco hẽ, pi Lasaru a kala vokuenda kuoloneke vikuãla? Eye wa kala oku pekela veyambo.—Ukundi 9:5, 10.

Ivaluka okuti, Yesu wa sokisa olofa lotulo okuti omunu o pasuka lika poku pinduiwa. Ulandu waco u popia ndoco: “‘Ukuetu Lasaru wa pekela, puãi ngenda ho pasula kotulo.’ Olondonge via popia laye viti: ‘A Ñala, nda wa pekela o kaya.’ Yesu wa tukuile okufa kuaye. Ovo puãi va soka okuti wa tukula oku puyukila votulo. Oco Yesu wa teta onimbu, wa va sapuila hati, Lasaru wa fa.’” (Yoano 11:11-14) Yesu poku pindula Lasaru wo tiuwiya komuenyo kuenje wo kongela vali kepata liaye. Ya kala ombanjale yi komohisa Yesu a eca kepata!

Apinduko Yesu a linga eci a kala palo posi, a eca uvangi wovina a ka linga kovaso yoloneke poku viala Vusoma wa Suku.b Vokuenda kuotembo a ka viala ongongo, o ka tẽlisa onjongole yaye yoku pindula omanu vosi va pekela vayambo. Eli olio esunga lieci a popela hati, “ame ndipinduko.” Sokolola esanju o ka kuata poku mola epinduko lia vangandiove! Sokololavo esanju omanu va ka pinduiwa va ka kuata!​—Luka 8:56.

LEKISA EKOLELO KOMUENYO

Yesu wa sapuila Marta hati: “U o ñolela, ndaño o fa, haimo o kala vali lomuenyo. Kuenda wosi o kasi lomuenyo, kuenje o ñolela, ka fi vali.” (Yoano 11:25, 26) Vana Yesu a ka pindula vokuenda kuviali waye wohulukãi yanyamo, va ka kala otembo ka yi pui​—nda va lekisa ekolelo ko kuaye.

Noke yoku popia olondaka evi viatiamẽla kepinduko, Yesu wa linga epulilo limue ku Marta li vetiya oku sokolola hati: “‘Eci hẽ, o ci kolela?’ Eye wo tambulula hati: ‘Oco, a Ñala, nda kolela ale okuti vu Kristu, vu Mõla a Suku.’” (Yoano 11:26, 27) Ove hẽ​—o yongola oku kolelavo kelavoko liepinduko ndeci Marta a linga? Catete o sukila oku kũlĩha ocipango ca Suku catiamẽla komanu. (Yoano 17:3; 1 Timoteo 2:4) Ukũlĩhĩso waco u ku kuatisa oku kuata ekolelo. Momo lie ku pingila Kolombangi Via Yehova oco va ku lekise eci Embimbiliya li longisa catiamẽla kulandu owu? Ovo va ka sanjukila oku vangula love catiamẽla kelavoko li komohisa liepinduko.