Oku Kuatisa Vakuepata Lietu

YESU KRISTU wa popia hati: “Kuende konjo yene kuenda ku vakuene. Va sapuila ovina viosi Suku a ku lingila, kuenda ndeci a ku linga ohenda.” Eci Yesu a kala ko Gadala ocipepi Lokalunga ko Galileya, wa sapela lulume umue okuti wa kuata onjongole yoku kala ondonge yaye. Olondaka via Yesu vi lekisa okuti, wa kuata elomboloko lioku sapela lepata ovina via velapo.—Mar. 5:19.

Koloneke vilo, tua siatavo oku mola okuti omanu vamue va sapela lepata liavo, pole, vakuavo ka va ci lingi. Eci omunu umue a linga ufendeli wa Yehova Suku yocili, o kuata onjongole yoku sapela ovina viaco lepata liaye. Eye o pondola oku linga ndati ovina viaco? Tu pondola ndati oku kuatisa vakuepata lietu okuti vatiamẽla ketavo likuavo? Embimbiliya li tu ĩha olonumbi via sunguluka.

“TUA SANGA MESIYA”

Kocita catete, Andereu eye wa limbuka tete Yesu okuti, Mesiya. Kulie a sapuila ovina viaco? Andereu tete wa sanga manjaye Simono, yu wa popia laye hati: ‘Tua sanga Mesiya, ci lomboloka okuti, Kristu.’ Andereu wa sindikila Petulu toke ku Yesu, kuenje, Petulu wa tava oku kala ondonge ya Yesu.—Yoa. 1:35-42.

Eci pa pita anyamo epandu, tunde eci Petulu a kala ko Yopa, wa lalekiwa oku enda ko Kaisarea konjo ya Korneliu una wa kala esualali. Helie Petulu a sanga konjo yaco? ‘Korneliu wa kala oku talamẽla Petulu kumue la vana va linga laye ungende waco. Kuenje wa laleka vamue vakuositue waye, kuenda akamba vaye va velapo.’ Omo liaco, wa ecelela okuti, epata liaye li yevelela ovina Petulu a kala oku popia, loku kapako ovina va yeva.—Ovil. 10:22-33.

Ongangu ya Andereu kumue la Korneliu yoku tata ciwa epata liavo yi tu longisa nye?

Andereu la Korneliu, ka va tilile ocikele cavo coku kuatisa epata liavo. Andereu wa sindikila Petulu toke ku Yesu, kuenje, Korneliu wa linga esokiyo liokuti epata liaye li yevelela ovina Petulu a popia. Pole, Andereu la Korneliu ka va kisikile epata liavo oco li linge olondonge via Kristu. Nye tu lilongisa kovina viaco? Tu sukila oku kuama ongangu yavo. Tu pondola oku sapela ovina vimue lepata lietu poku sanda epuluvi lioku va longisa Embimbiliya, oco va kuate ukamba la vamanji. Pole, tu sukila oku ecelela okuti ovo muẽle va li nõlela ovina va yongola oku linga, kuenda tu yuvuli oku va kisika. Oco tu tẽle oku kuatisa epata lietu, tu konomuisi ulandu wa manji Jürgen lukãi waye Petra va kasi kofeka yo Alemanya.

Ukãi waye wa lilongisa Embimbiliya Lolombangi Via Yehova noke wa papatisiwa. Ulume waye Jürgen, wa kala esualali. Kefetikilo Jürgen, ka sanjukilile onjila ukãi waye a nõlele. Pole, vokuenda kuotembo weya oku limbuka okuti Olombangi Via Yehova vi longisa ocili ci sangiwa Vembimbiliya. Noke, weya oku lingavo Ombangi ya Yehova, kuenje, cilo wa linga ukulu wekongelo. Elungulo lipi a siata oku eca oco li vetiye ovitima via vakuepata liaye vatiamẽla ketavo likuavo?

Manji Jürgen wa popia hati: “Lalimue eteke tua setekele oku kisika epata lietu oco li tave kovina tu lilongisa. Momo nda tua ci linga, ka va kuata elomboloko liovina viaco. Pole, tu sukila oku kuata uloño poku va longisa oco okuti, vokuenda kuotembo va kapako ovina va lilongisa. Ca sungulukavo okuti, tu vetiya vakuepata lietu oku kuata ukamba la vamanji vana va kuete anyamo amuamue kuenda va kuete ovisimĩlo vimuamue. Nda tua ci linga, tu va kuatisa oku lilongisa Embimbiliya.”

Upostolo Petulu kumue lepata lia Korneliu va tava lonjanga kesapulo Liembimbiliya. Vakuavo va kala kocita catete, va pita otembo yalua oco va tave kesapulo liaco.

VELIE VA KALA VAMANJI YA YESU?

Vamue vakuepata lia Yesu, va kolelele kokuaye vokuenda kupange waye woku kunda. Citava okuti, pokati komanu vaco va tava, pa kala ovapostolo ndeci, Tiago la Yoano okuti va kala epata lia Yesu, kuenda ina yavo Salome una wa kala pahãi yaye. Eye wa kala umue ‘pokati kakãi va tekula Yesu kumue lovapostolo vaye poku va ĩha ovina va kuatele.’—Luka 8:1-3.

Pole, epata likuavo lia Yesu, ka lia tavele lonjanga kokuaye. Eci pa pita unyamo umue tunde eci Yesu a papatisiwa, owiñi wa kala vonjo wa yeva ovina a longisa. Pole, ‘eci vangandiaye va ci yeva, va tunda oco vo kuate, kuenje va popia vati: ‘Wa linga eyui.’ Noke liotembo yimue, eci vamanji ya Yesu va pula catiamẽla kesokiyo liaye lioku linga ungende, eye ka va tambuluile. Momo lie? ‘Momo vamanjaye ka va lekisile ekolelo kokuaye.’—Mar. 3:21; Yoa. 7:5.

Ongangu ya Yesu yoku tata epata liaye yi tu longisa nye? Yesu ka sumuĩle eci omanu vamue va popia vati wa linga eyui. Pole, noke liolofa kuenda epinduko liaye, wa pamisa epata liaye eci a molẽha ku manjaye Tiago. Oku molẽha kuaco, ka kua kuatisile lika Tiago, pole, vakuepata liaye va limbukavo okuti, Eye Mesiya. Ovo va kala pokati kovapostolo vohondo yosapalalo ko Yerusalãi, muna va tambula espiritu sandu. Noke Tiago la Yuda kuenda vamanji vakuavo va Yesu, va kuata esanju omo liovikele va tambuile.—Ovil. 1:12-14; 2:1-4; 1 Va Kor. 15:7.

OMANU VAMUE VA SUKILA OTEMBO YALUA

Ndeci ca pita kocita catete, apata amue koloneke vilo, a sukila oku pita otembo yalua oco va lilongise Embimbiliya. Konomuisa ulandu wukãi umue o tukuiwa hati Roswitha, wa tiamelẽle ketavo lio Katolika okuti, ulume waye wa papatisiwa kunyamo wo 1978. Omo okuti Roswitha, wa kolelele kovina a lilongisa ketavo liaye, wa lambalalele ulume waye. Pole, noke lianyamo amue, wa liwekapo oku u lambalala, momo wa limbuka okuti, Olombangi Via Yehova vi longisa ocili. Kuenje, kunyamo wo 2003 wa papatisiwa. Nye co vetiya oku linga apongoloko? Ulume waye ka lekisile esumuo omo lielambalalo liaco, pole, wa ecelela okuti, ukãi waye o linga a pongoloko. Elungulo lipi eye a eca? Eye wa popia hati: “Ocina ca velapo oku lekisa epandi kuenda oku amamako lepandi liaco.”

Manji Monika wa papatisiwa kunyamo wo 1974, kuenda omãla vaye vavali va linga Olombangi Via Yehova eci pa pita ekũi lianyamo. Manji Hans osimbu ka lingile Ombangi ya Yehova, ka lambalele ukãi waye Monika, omo liovina a kala oku lilongisa. Eye wa papatisiwa kunyamo wo 2006. Omo lioku kuatisiwa lovina viaco, elungulo lipi epata liavo lia eca ku vakuavo? Olio lia popia hati: “Ocina ca velapo, oku amamako oku kolela Yehova, kuenda oku yuvula oku honguisa ekolelo.” Ocituwa caco, ca kuatisa manji Monika oku amamako oku sola ulume waye Hans, ndaño ka simĩle okuti eteke limue o ka tava oku lilongisa Embimbiliya.

VA KUATISIWA LOVAVA OCILI

Yesu wa lombolola esapulo liocili ndovava a eca omuenyo ko pui. (Yoa. 4:13, 14) Tu yongola okuti epata lietu li nyua ovava ocili. Ka tu yongola oku sumuisa va kuepata lietu poku va kisika oku tava lonjanga oku nyua kovava aco. Onjila tu kuama poku va kuatisa, oyo yi va vetiya oku tava kovina tu va longisa. Embimbiliya li popia hati: “Ondingesunga yi sokolola eci a tambulula kuenda utima wukualondunge u longaisa omẽla waye, ho vokiya uloño kolondaka viaye.” Tu kapako ndati elungulo eli?—Olos. 15:28; 16:23.

Ukãi ukualondunge, o sapuila ulume waye ovina viatiamẽla kekolelo liaye. Nda o ‘sokolola osimbu ka tambuluile,’ cu kuatisa oku sapuila kulume waye olondaka via sunguluka okuti, ka ci lingi lukãlu. Eye ka lekisa okuti, ovisimĩlo viaye ovio lika via sunguluka. Onjila a kuama poku sapela, yi pondola oku vetiya ulume waye, kuenda yi nena ombembua. Ukãi o sukila oku lipula ndoco: Vepuluvi lipi okuti ci leluka oku sapela lulume wange? Ovina vipi a sole oku sapela ale oku tanga? Anga hẽ wa kapako calua oku lilongisa ovoloño, opulitika, ale olomapalo? Ukãi o pondola ndati oku kuatisa ulume waye oco a lekise onjongole yoku lilongisa Embimbiliya loku kapako ovisimĩlo viaye? Oku sokolola ovina viaco, ci kuatisa ukãi oku sapela ciwa lulume waye, kuenda oku lekisa olondunge.

Oco tu kuatise vakuepata lietu ka va lilongisa Embimbiliya, ka tu sukila lika oku va lomboluila ovina viatiamẽla kekolelo lietu. Pole, tu ci linga poku sapela ovina vi likuata lovituwa vietu viwa.

OVITUWA VIWA

Manji Jürgen wa tukuiwa kefetikilo liocipama cilo, wa popia hati: “Tu sukila oku amamako oku kapako olonumbi Viembimbiliya oloneke viosi komuenyo wetu. Poku ci linga, ci kuatisa vakuepata lietu oku limbuka okuti, ovina tu lilongisa viocili ndaño ka va tava kovina viaco. Manji Hans wa papatisiwa eci pa pita 30 kanyamo tunde eci ukãi waye a linga Ombangi ya Yehova. Eye wa popia hati: “Ovituwa viwa Viakristão vi kuete esilivilo kuenda vi vetiya vakuepata lietu oku limbuka ndomo ovina tu lilongisa vi pongolola omuenyo wetu.” Vakuepata lietu va sukila oku limbuka okuti, omo liovina tu lilongisa, tu kuete ekalo lia litepa leli liomanu vakuavo, kuenda eyi oyo onjila ya sunguluka.

Upostolo Petulu wa eca elungulo limue lia velapo kakãi vana okuti, alume vavo ka va lilongisa Embimbiliya poku popia hati: “Pokoli ku va veyene okuti vamue, ndaño ka va tava kondaka, kuenda ndaño ondaka yimosi ka yi popiwa, . . . va kokiwa lovilinga viakãi vavo, eci va mola ovilinga viene viesunga lesumbilo. Oku liposuisa kuene ka ku ka linge oku liposuisa kuo kilu ndeci oku livinda ocifuko, loku limiangulula lulu, pamue oku wala uwalo wolonambelo; ku linge puãi oku posuisa omunu wovutima luwalo ka u pongoloka wespiritu, haiwo wusima kuenda wumbombe. Eposo liaco olio li panduiwa la Suku.”—1 Pet. 3:1-4.

Volondaka Petulu a soneha wa lekisa okuti, ulume o pondola oku vetiyiwa lovituwa viwa viukãi waye. Manji umue o tukuiwa hati Christa, omo okuti wa pokola kolonumbi Viembimbiliya, wa vetiya ulume waye lovituwa viwa a lekisa tunde eci a papatisiwa kunyamo wo 1972. Ndaño okuti ulume waye otembo yimue wa kala oku lilongisa Embimbiliya Lolombangi Via Yehova, pole, ka kapeleko ovina viaco. Eye wa kuatele ocituwa coku endaenda kolohongele, kuenda wa kuata ukamba la vamanji. Ulume waye wa sumbilile onjila ukãi waye a nõlelepo. Manji Christa wa tẽla ndati oku vetiya utima wulume waye?

Manji Christa wa popia hati: “Nda nõlelepo oku kuama onjila Yehova a ndi yonguila. Handi vali, ovituwa viwa nda lekisa, via vetiya ulume wange oku kapako olonumbi Viembimbiliya. Eci ndi limbuka okuti wa kapako olonumbi Viembimbiliya, ndi likolisilako oku tẽlisa olonjongole viaye. Nda siata oku sumbila elianjo liaye lioku li nõlela ovina a yongola oku linga, kuenda oku kolela ku Yehova.”

Ulandu wa manji Christa, woku lekisa esunguluko, u kuete esilivilo. Eye wa amamako oku pitisa kovaso ovina viespiritu, oku kongelamo oku endaenda kolohongele, kuenda kupange woku kunda. Pole, o lekisa esunguluko, momo wa kũlĩha okuti, o sukila oku lekisa ocisola kulume waye, oku sandiliya otembo yoku kala laye, kuenda oku u yevelela. Ocili okuti, oku lekisa esunguluko kuenda olondunge, ci vetiya vakuepata lietu vana ka va fendela Yehova. Embimbiliya li lombolola okuti, “ovina viosi vi kuete uvo wavio.” Vovina viaco mua kongela oku sanda otembo yoku sapela la vakuepata lietu, ca piãla enene olohueli vina okuti umue pokati kavo ka lilongisa Embimbiliya. Sanda otembo yoku kala pamosi oco u sapeli. Ovolandu a lekisa okuti, oku sapela ciwa ku tepulula ovitangi vi tunda koku kala ulika ale oku kuata esepa.—Uku. 3:1.

KU KA PUE ELAVOKO

Manji Holger okuti isiaye wa papatisiwa lika noke lieci ci soka 20 kanyamo tunde eci epata liaye lia linga Olombangi Via Yehova, wa popia hati: “Oku lekisa ocisola ku vakuepata lietu kuenda oku va kongela volohutililo, ci kuete esilivilo.” Manji Christa wa amisako hati: ‘Wa kuatele elavoko liokuti eteke limue ulume waye o ka tava oku lilongisa ovina viatiamẽla ku Yehova. Momo, noke weya oku tava kocili.’ Ovituwa viwa tu lekisa ku vakuepata lietu ka va lilongisa Embimbiliya, vi pondola oku eca onima, kuenda elavoko liwa.

Vosi yetu tu kuete ocimãho coku kuatisa vakuepata lietu ka va lilongisa Embimbiliya, oco va limbuke ocili, kuenda oku va longisa esapulo li sangiwa Vembimbiliya. Omo liaco, ovina viosi tu linga tu sukila “oku vi linga lumbombe kuenda lesumbilo.”—1 Pet. 3:15.