Ndomo tu Amamako Oku Lekisa Ovisimĩlo Via Sunguluka

1. Asumũlũho api a tunda ku Yehova a tu kuatisa oku kuata esanju?

YEHOVA o yongola okuti tu sanjuka, kuenda o tu ĩha asumũlũho alua a tu kuatisa oku kuata esanju. Eye wa tu ĩha omuenyo oco tu u sivaye, momo wa tu kokela vefendelo liocili. (Osa. 144:15; Yoa. 6:44) Yehova o tu pamisa locisola caye, kuenda o tu kuatisa oco tu amameko oku linga upange waye. (Yer. 31:3; 2 Va Kor. 4:16) Tu sanjukila ombembua tu kuete yoku kala kumue la vamanji, momo tu tambula okulia kuespiritu, kuenda ocisola ci kasi pokati ketu la vamanji. Omo liaco, tua sanjukilavo elavoko liekalo liwa tu ka kuata kovaso yoloneke.

2. Ovitangi vipi afendeli vamue va Suku vakuekolelo va siata oku liyaka lavio?

² Ndaño okuti tu kuete esunga lioku kuata esanju, pole, afendeli vamue va Suku va siatavo oku kuata ovisimĩlo ka via sungulukile viatiamẽla kokuavo muẽle. Ovo va siata oku sima okuti Yehova ka va kapeleko, kuenda ka kapelekovo upange va kasi oku u lingila. Omanu vana va kuete ovisimĩlo viaco, va sima okuti oku ‘kala anyamo alua’ komuenyo, esanda. Va simavo okuti, omuenyo u kasi ndoloneke viowelema.—Uku. 11:8.

3. Nye ca siata oku tu vetiya oku kuata ovisimĩlo ka via sungulukile?

³ Vamanji vamue, va siata oku kuata ovisimĩlo ka via sungulukile omo liovitangi va liyaka lavio, oku vela, ale oku kuka. (Osa. 71:9; Olosap. 13:12; Uku. 7:7) Olonjanja vimue tua siata oku liyaka lovitangi vi tunda kutima wetu weyuka elimbi kuenda tu sima okuti, Suku ka tu kapeleko. (Yer. 17:9; 1 Yoa. 3:20) Eliapu lia siata oku lundila afendeli va Suku. Kuenje, vana va kuete ovisimĩlo ndevi via Satana va siata oku tu vetiya oku tava kolondaka via Elifasi wa popia hati, Suku ka tu kapeleko. Ndaño okuti uhembi waco wa lingiwa koloneke via Yovi, pole, u kasi oku amamako koloneke vilo.—Yovi 4:18, 19.

4. Nye tu konomuisa vocipama cilo?

⁴ Embimbiliya li tu sapuila okuti, Yehova o kasi lafendeli vaye va ‘pita lovitangi vi koka o ku fa.’ (Osa. 23:4) Eye o ci linga lekuatiso Liondaka Yaye. Embimbiliya ‘li kuete unene wa Suku woku nyõla olombonge’ oku kongelamo atatahãi kuenda ovisimĩlo ka via sungulukile. (2 Va Kor. 10:4, 5) Omo liaco, tu konomuisi ndomo tu ecelela okuti, Embimbiliya li tu kuatisa oku kuata ovisimĩlo via sunguluka. O pondola oku kuatisiwa lovina viaco, oco o limbuke ndomo o kuatisavo omanu.

KUATISIWA LEMBIMBILIYA OCO O KUATE OVISIMĨLO VIA SUNGULUKA

5. Nye ci tu kuatisa oku kũlĩhĩsa nda tu kuete ovisimĩlo via sunguluka?

⁵ Upostolo Paulu wa lombolola ovina vimue vi tu kuatisa oku kuata ovisimĩlo via sunguluka. Eye wa vetiya vamanji va kala vekongelo lio ko Korindo hati: “Liseteki ene muẽle nda . . . vu kasi ocili vekolelo.” (2 Va Kor. 13:5) “Ekolelo,” li panga onepa kovina Ukristão wocili a tava okuti, via situluiwa Vembimbiliya. Nda ovina tu popia levi tu linga vi likuata leci Embimbiliya li longisa, tu lekisa okuti tu “kasi vekolelo.” Tu pondola oku sokisa omuenyo wetu lalongiso Akristão vocili. Omo liaco, tu sukila oku pokola kovina viosi vi sangiwa Vembimbiliya.—Tia. 2:10, 11.

6. Momo lie tu sukilila oku li kũlĩhĩsa etu muẽle ‘nda tu kasi vekolelo’? (Tala elitalatu kefetikilo liocipama cilo.)

⁶ Citava okuti o kuata ohele yoku nõla oku kuama onjila ya sunguluka, omo lioku sima okuti, ku ci tẽlisa. Pole, Yehova wa tu kapako, kuenda ovisimĩlo viaye via velapo okuti ovisimĩlo vietu, vi sule. (Isa. 55:8, 9) Eye o kũlĩhĩsa afendeli vaye oco a limbuke ovituwa viavo viwa, kuenda oku va kuatisa. Nda wa ecelela okuti Embimbiliya li ku kuatisa oku li kũlĩhĩsa ove muẽle, o “lekisa okuti o kasi vekolelo,” kuenda o li tenda ove muẽle ndomo Yehova a ku tenda. Kuenje, ci ku kuatisa oku yuvula ovisimĩlo viokuti, ku kuete esilivilo, kuenda ci ku kuatisavo oku ivaluka okuti, o kuete esilivilo kovaso a Suku. Oku ivaluka ovina viaco, ci sokisiwa loku yulula onjanela, oco vohondo mu iñile ocinyi cekumbi.

7. Tu pondola ndati oku kuatisiwa lovolandu omanu vakuekolelo va tukuiwa Vembimbiliya?

⁷ Onjila yikuavo yoku li kũlĩhĩsa etu muẽle nda tu kasi vekolelo, oku sokolola ongangu yiwa yafendeli va Suku vakuekolelo va tukuiwa Vembimbiliya. Sokisa ovitangi va liyaka lavio ale ovisimĩlo va kuata levi viove, kuenda sokolola ndomo nda wa tetulula ovitangi viaco. Tu konomuisi ovolandu atatu a lekisa ndomo tu ecelela okuti, Embimbiliya li tu kuatisa oku limbuka nda “tu kasi vekolelo” kuenda oku kuata ovisimĩlo via sunguluka.

OCIMBUMBA CIMUE OSUKE

8, 9. (a) Ekalo lipi ocimbumba osuke a kuata? (b) Ovisimĩlo vipi ka via sungulukile ukãi ocimbumba a kuata?

⁸ Eci Yesu a kala vonembele ko Yerusalãi, wa mola ocimbumba cimue osuke. Ongangu yaye, yi pondola oku tu kuatisa oku kuata ovisimĩlo via sunguluka ndaño tu kasi oku liyaka lovitangi. (Tanga Luka 21:1-4.) Tu kũlĩhĩsi ekalo ukãi waco a kuata. Eye ka kuatele esumuo omo liulume waye wa fa, pole, wa sumuile omo lioku kala pokati kasongui vatavo esanda okuti, va yonguile lika oku ‘lia volonjo viovimbumba,’ pole, ka va endaile oku eca ekuatiso kokuavo. (Luka 20:47) Ndaño okuti wa kala osuke, pole, ocilumba a eca vonembele, ci sokisiwa lofeto yeciwa konalavayi yi linga upange vokuenda kuakukutu amue.

⁹ Sokolola ovisimĩlo ukãi waco osuke a kuata poku iñila vonembele omo lioku ambata lika alusendu avali. Anga hẽ wa simĩle okuti olombongo a eca vi sokisiwa lombanjaile a enda oku eca eci ulume waye a kala lomuenyo? Eci a mola okuti vakuavo va kala oku eca olombanjaile vinene, wa yeva hẽ esumuo loku sima okuti ombanjaile yaye ka ya kuatele esilivilo? Ndaño okuti wa kuatele ovisimĩlo viaco, pole, wa linga ovina a tẽla vefendelo liocili.

10. Yesu wa lekisa ndati okuti Suku wa kapeleko ukãi ocimbumba?

¹⁰ Yesu wa lekisa okuti, Yehova wa kapeleko ukãi waco ocimbumba kumue lombanjaile yaye. Omo liaco, wa popia hati: Ukãi waco ‘wa imbamo calua okuti olohuasi ci sule.’ Ndaño okuti ocilumba caye ya litengele lovilumba viomanu vakuavo, pole, Yesu wa velisilepo ocituwa cukãi waco coku eca esivayo ku Yehova. Omanu va kala vonembele, ka va kũlĩhile ndomo Yehova a velisilepo alusendu avali kuenda ndomo a kapeleko ocimbumba caco. Ndaño okuti ukãi waco ocimbumba kumue lomanu vakuavo va kuata ovisimĩlo ka via sungulukile, pole, Yehova wa kapeleko ocilumba caco. Anga hẽ wa siata oku ecelela okuti ulandu waco u ku kuatisa oku limbuka nda o kasi vekolelo?

11. Ulandu wukãi ocimbumba u ku longisa nye?

¹¹ Citava okuti, ekalo liove li pondola oku tateka ovina eca ku Yehova. Vamanji vamue omo liovina vimue ndeci oku kuka, oku vela kuenda ovitangi vikuavo, ka va tẽla vali oku pesila otembo yalua kupange woku kunda ndeci va yongola. Anga hẽ, va sima okuti upange wavo woku kunda ka u kuete esilivilo? Ndaño ove umalẽhe ale o kuete uhayele wa suapo, pamue o sima okuti, alikolisilo ove a panga lika onepa kolowola vialua afendeli va Suku va siata oku eca unyamo lunyamo oco vo fendele. Ulandu wocimbumba osuke u tu longisa okuti, Yehova wa kapako ovina vitito tu u lingila, kuenda o tu sumũlũisa ca piãla enene eci tu linga ovina viaco poku liyaka lovitangi. Sokolola ovina wa lingila Yehova vokuenda kuanyamo a pita. Anga hẽ, wa sukilile oku likolisilako oco o pesile otembo yalua kupange woku kunda? Nda wa ci linga, kolela okuti Yehova wa kapako ovina wa linga vokuenda kuotembo yaco. Nda wa kuama ongangu yocimbumba osuke, ci lekisa okuti, o kasi oku likolisilako oku linga ovina o tẽla kupange wa Yehova. Poku ci linga, o limbuka okuti, “o kasi vekolelo.”

“NJUPE OMUENYO WANGE”

12-14. (a) Ovisimĩlo vipi ka via sungulukile Eliya a kuata? (b) Momo lie Eliya a kuatela usumba?

¹² Uprofeto Eliya wa kala ukuacili ku Yehova, kuenda wa kuata ekolelo lia pama. Pole, onjanja yimue eci Uprofeto Eliya a sumuĩle wa pinga ku Yehova oco o ponde, kuenje wa popia hati: ‘Ndoco yapa! A Yehova, njupe omuenyo wange.’ (1 Olos. 19:4) Vana ka va la yeva esumuo, va pondola oku sima okuti, ohutililo Eliya a linga, ‘ka ya sungulukile.’ (Yovi 6:3) Pole, Eliya wa kuatele ovisimĩlo viocili. Ivaluka okuti, ndaño wa livelele oku fa, pole, Yehova wo kuatisa.

¹³ Nye ca vetiya Eliya oku kuata ovisimĩlo viaco? Tete, Eliya wa lingile ocikomo cimue ko Isareli ca lekisa okuti, Yehova eye Suku yocili, eci a kundula ci soka 450 kovaprofeto va Baale. (1 Olos. 18:37-40) Citava okuti Eliya wa yonguile oku kuatisa afendeli va Suku oku tiukila vefendelo liocili, pole, ka ca tẽlisiwile. Noke Nasoma Isevele una wa kala ongangala, wa tuma esapulo limue ku Eliya li lekisa okuti, wa linga esokiyo lioku u ponda. Oco Eliya a teyuile omuenyo waye, wa tilila konano yolupale luo Yuda, kuna a kala vekalasoko.—1 Olos. 19:2-4.

¹⁴ Citava okuti Eliya wa kuata ovisimĩlo viokuti upange a linga woku kala uprofeto ka wa kapiwileko. Kuenje, wa sapuila Yehova hati: ‘Sia velelepo olosekulu viange.’ Eliya wa simĩle okuti wa kala ndoneketela, kuenda ndakepa olosekulu viaye via fa osimbu. Eye wa simĩlevo okuti, ka kuatele esilivilo pokati komanu, kuenda, Yehova ko kapeleko.

15. Yehova wa lekisa ndati ku Eliya okuti wa kuatele esilivilo kovaso aye?

¹⁵ Yehova Ukuonene Wosi wa kuata ovisimĩlo via litepa viatiamẽla ku Eliya. Kuenje Eliya wa limbuka okuti, Yehova wo kapeleko kuenda wa likuminyile oku u kuatisa. Omo liaco, Yehova wa tuma ungelo umue oco a pamise Eliya. Eye wa tekula Eliya poku u wĩha okulia kuenda ovava, vokuenda kueci ci soka 40 koloneke oco a tẽle oku londa Komunda Horeve. Eci Eliya a simĩle okuti ka kuli omunu ukuavo u Isareli o vumba Yehova lekolelo, Yehova wa lekisa ohenda kokuaye poku u lungula omo liocisimĩlo caye ka ca sungulukile. Omo liaco, Yehova wa eca ku Eliya ocikele cokaliye, kuenje wa tava. Omo okuti Eliya wa kuatisiwa la Yehova, wa tiukila vali lesanju kupange waye woku kala uprofeto.—1 Olos. 19:5-8, 15-19.

16. Wa siata ku pamisiwa ndati la Yehova?

¹⁶ Ulandu wa Eliya u pondola oku ku kuatisa oku limbuka nda o kasi vekolelo, kuenda oku kuata ovisimĩlo via sunguluka. Catete, sokolola ndomo Yehova a siata oku ku kuatisa. Anga hẽ, wa tambuli ale ekuatiso liukulu umue wekongelo, ale lia manji umue wa loñoloha? (Va Gal. 6:2) Anga hẽ Embimbiliya, lalivulu etu, kuenda ­olohongele, via siata oku ku kuatisa oku limbuka okuti Yehova wa ku kapako? Omo liaco, eci o kuatisiwa konjanja yikuavo, sokola oku ku tunda ekuatiso liaco, kuenda likutilila ku Yehova loku eca olopandu Kokuaye.—Osa. 121:1, 2.

17. Nye Yehova a velisapo kafendeli vaye?

¹⁷ Cavali, tu ivaluki okuti ovisimĩlo ka via sungulukile vi tu nenela esumuo. Ovisimĩlo via Suku vi kuete esilivilo kokuetu. (Tanga Va Roma 14:4.) Yehova wa kapako upange wetu lekolelo tu u kuetele, kuenda ka sokisa ovina tu u lingila. O pondolavo oku linga ovina o tẽla kupange wa Yehova, ndeci Eliya a linga. Citava okuti o kuatisa vamanji vekongelo lovina viwa, kuenda omanu vocikanjo cove va pondola oku kũlĩha ocili omo lialikolisilo ove.

18. Upange o lingila Yehova weca uvangi upi?

¹⁸ Ivaluka okuti, ovikele wa siata oku tambula ku Yehova vi eca uvangi wokuti, o kasi love. (Yer. 20:11) Ndeci Eliya a linga, o pondola oku tambula onima yi tunda kupange wove, ale oku tẽlisa ovimãho viespiritu wa simĩle okuti ka ca lelukile oku vi tẽlisa. Pole, o kuetevo esumũluho lioku kunda olondaka viwa kumue la vamanji, kuenda oku tukuiwa londuko ya Suku. Amamako oku pamisa ekolelo liove. Nda wa ci linga, olondaka Yesu a tukula volusapo luaye viokuti: “Iñila vesanju lia cime cove,” vi ka tiamisiwila kokuove.—Mat. 25:23.

“OHUTILILO YOMUNU UMUE WA SUMUILE”

19. Ocitangi cipi usonehi Wosamo 102 a liyaka laco?

¹⁹ Usonehi Wosamo 102 wa sumuile. Eye wa tala ohali ketimba, kuenda wa kuata ovisimĩlo ka via sungulukile, kuenje wa “honguele,” momo ka kuatele ongusu yoku liyaka lovitangi viaco. (Osa. 102) Olondaka viaye vi tu kuatisa oku limbuka okuti, wa sumuile omo liovitangi, ulika kuenda ovisimĩlo ka via sungulukile a kuata. (Osa. 102:3, 4, 6, 11) Eye, wa simĩle okuti Yehova wa yonguile oku u yanduluka.—Osa. 102:10.

20. Ohutililo yi kuatisa ndati omunu umue o liyaka lovisimĩlo ka via sungulukile?

²⁰ Ukualosamo wa enda oku sivaya Yehova komuenyo waye. (Tanga Osamo 102:19-21.) Osamo 102, yi tu longisa okuti, vana va kasi vekolelo, ndaño va liyakavo lovitangi, pole, va likolisilako oku linga ovina vikuavo. Ukualosamo wa simĩle okuti wa kala ‘ndokanjila ka kasi ulika kilu lionjo,’ momo wa kuata ovitangi vialua. (Osa. 102:7) Nda eteke limue wa kuata ovisimĩlo viaco, likutilila ku Yehova ndeci ukualosamo a linga. Olohutililo o linga, vi ku kuatisa oku yuvula ovisimĩlo ka via sungulukile. Yehova wa likuminya hati: ‘O yeva olohutililo violosuke. Ka pembula alombelo avo.’ (Osa. 102:17) Kolela kohuminyo yaco.

21. Omunu o pondola ndati oku yuvula ovisimĩlo ka vĩvi oco tu kuate ovisimĩlo via sunguluka?

²¹ Osamo 102, yi lekisavo ndomo o pondola oku kuata ovisimĩlo via sunguluka. Ukualosamo, wa nõlelepo oku pitisa kovaso ukamba waye la Yehova. (Osa. 102:12, 27) Eye wa lembelekiwa poku kũlĩha okuti, Yehova o kuatisa afendeli Vaye eci va liyaka lovitangi. Omo liaco, nda ovisimĩlo ka via sungulukile vi ku tateka oku linga upange wa Yehova, likutilila kokuaye. Ku ka pinge lika ku Yehova oco a ku kuatise oku tetulula ovitangi viove, pole, ‘o ci linga oco onduko ya Suku yi sandekiwe.’—Osa. 102:20, 21.

22. Tu pondola ndati oku sanjuisa Yehova?

²² Tu pondola oku ecelela okuti Embimbiliya li tu kuatisa oku limbuka okuti tu kasi vekolelo, kuenda Yehova wa tu kapako. Ocili okuti, voluali lulo lua vialiwa la Satana ka tu pondola oku malako ovisimĩlo ka via sungulukile. Omo liaco, vosi yetu tu pondola oku sanjuisa Yehova, loku kuata omuenyo kopui, poku amamako oku linga upange waye lekolelo.—Mat. 24:13.