Oku Eca Ekuatiso ku Vana va Kuka

1, 2. (a) Ovitangi vipi apata alua a siata oku liyaka lavio, kuenda apulilo api a lingiwa? (b) Olonjali kumue lomãla va pondola oku liyaka ndati lapongoloko omuenyo?

OMUNU o sumua calua poku limbuka okuti olonjali viaye via kuatele uhayele kuenda via enda oku linga ovina vi yongola, cilo ka vi pondola vali oku linga ovina viaco. Pamue o yeva ondaka yokuti, Isiove ale Ina, wa kupuka, kuenje, wa teka ombunda, ka tẽla vali oku sokolola ovina, ka limbuka oku a kasi oku enda, ale o kuete uvei umue u kapa kohele omuenyo waye. Citava okuti kuiya ocitangi cikuavo cekambo liolombongo. Pamue ka ci leluka ku vana va kuka oku tava kapongoloko omo lioku vela, ale ovitangi vikuavo, ca piãla enene nda ka va tẽla vali oku linga ovina va yongola. (Yovi 14:1) Nye tu sukila oku linga oco tu va kuatise? Va tatiwa ndati?

² Ocipama cimue ci lombolola ovina viatiamẽla koku tata vana va kuka ci popia ndoco: “Ndaño okuti ka ca lelukile oku sapela ovina viatiamẽla koku kuka, nda apata a sokiya selo ovina va linga kovaso yoloneke, ci va kuatisa oku nõla onjila ya sunguluka poku tata umue o vela. Oku sapela ovina viaco, ci kuatisa epata oku lipongiyila kovitangi vi laika oku iya.” Eli olio esunga lieci epata li sukilila oku sapela ovina viaco, momo, lomue o tẽla oku yuvula ovitangi vi tunda koku kuka. Pole, tu sukila oku lipongiya selo, oco tu nõle onjila ya sunguluka. Omo liaco, vocipama cilo, tu konomuisa ndomo apata a pondola oku liangiliya, oco va tẽle oku pandikisa kovitangi vi tunda koku kuka.

OKU LIANGILIYILA ‘OLONEKE VIOHALI’

3. Ovina vipi omãla va sukila oku linga, eci olonjali viavo via kuka vi sukila ekuatiso? (Tala elitalatu kefetikilo liocipama cilo.)

³ Eci omanu va fetika oku kuka, kuiya otembo yimue okuti, ka va tẽla vali oku litata ovo muẽle, pole, va sukila ekuatiso. (Tanga Ukundi 12:1-7.) Eci ovitangi viaco vi fetika, olonjali via kuka kumue lomãla vavo, va sukila oku nõlela kumosi onjila ya sunguluka okuti oyo va kuama. Ca sunguluka nda epata li sapela eci catiamẽla kekuatiso li sukiliwa, oku kũlĩha ndomo li eciwa, kuenda ndomo omunu lomunu a pondola oku eca ekuatiso liaco. Omanu vosi va kongeliwa vocitangi caco, ca piãla enene olonjali, va sukila oku lekisa ovisimĩlo viavo, kuenda ovina vikuavo. Va sukilavo oku sapela catiamẽla kolonjali nda vi yongola oku kala vonjo yavo muẽle.a Omãla va sukila oku sapela catiamẽla kueci ci lingiwa, oco olonjali vi tambule ekuatiso liwa. (Olosap. 24:6) Citava okuti omãla vamue va kuatisa olonjali kovopange o vonjo, pole, vakuavo va eca olombongo. Omunu lomunu pokati komãla, o sukila oku limbuka ocikele caye. Pole, vokuenda kuotembo pamue ovikele viaco vi pongoloka, ale epata li kuata ovikele vikuavo.

4. Pi epata li pondola oku sanga ekuatiso?

⁴ Osimbu amamako oku eca ekuatiso, kũlĩhĩsa lutate ekalo liolonjali viove. Nda wa limbuka okuti onjali yove yi kuete uvei umue u ka livokiya kovaso yoloneke, sokolola ovina vi pondola oku pita laye. (Olosap. 1:5) Sandiliya ekuatiso ombiali yofeka ya siata oku eca komanu va kuka. Sandiliyavo onjila yikuavo yecelela oku tata ciwa olonjali viove. Citava okuti o sumua omo lioku sokolola apongoloko aco, ale ku kuata elomboloko liovitangi viaco. Sapela ocitangi caco lekamba limue wa kolela, kuenda likutilila ku Yehova catiamẽla kocitangi caco. Nda wa ci linga, Yehova oku ĩha ombembua yo vutima oco o pandikise kovitangi viaco.—Osa. 55:22; Olosap. 24:10; Va Fil. 4:6, 7.

5. Momo lie oku linga selo esokiyo lionjila yi kuamiwa poku tata olonjali via kuka ci kuetele esilivilo?

⁵ Ca sunguluka nda olonjali via kuka vi sapela lomãla vavo catiamẽla kolonjila via litepa va sukila oku kuama poku sakula umue o vela. Va pondola oku linga esokiyo liokuti, olonjali viavo vi kala konjo ya umue pokati komãla vaco. Pamue, omãla va nõlapo oku tuala olonjali vonjo yoku tatela vana va kuka, ale va kuama onjila yikuavo. Nda epata lia ci linga, li pondola oku lipongiyila ‘kovitangi kuenda kesumuo’ li tunda koku kuka. (Osa. 90:10) Pole, nda epata ka li sokiya onjila va sukila oku kuama, citava okuti li kisikiwa oku linga lonjanga esokiyo liaco, eci kuiya ovitangi. Eli olio esunga lieci onoño yimue ya popela hati: “Vepuluvi liaco, omanu va pesela otembo yalua loku sokolola onjila yi kuamiwa.” Omo lioku nõla lonjanga onjila yi kuamiwa, citava okuti, epata li sakalala loku li patãla pokati, kuenda lomue o tava kueci va sukila oku linga. Pole, nda epata lia linga selo esokiyo, ci leluka oku linga apongoloko a sukiliwa.—Olosap. 20:18.

6. Momo lie ci kuetele esilivilo oku sapela lolonjali catiamẽla kesokiyo lioku vi yongola oku kala eci vi kuka, kuenda ndomo vi sukila oku tatiwa?

⁶ Pamue o sima okuti, ka ca sungulukile oku sapela lolonjali viove catiamẽla kapongoloko o sukila oku linga vonjo yavo, ale apongoloko akuavo a sukiliwa oku lingiwa kovaso yoloneke. Pole, oku sapela ovina viaco, ci kuatisa olonjali kovaso yoloneke. Momo lie? Momo, ci leluka oku sapela catiamẽla kovitangi, loku yevelela lesumbilo ovisimĩlo viavo, kuenda oku linga esokiyo lia sunguluka, osimbu ka wa pitili lovitangi. Nda epata li kuete ocituwa coku sapela, ci kuatisa omunu lomunu pokati kavo oku eca ovisimĩlo viaye, loku pamisa ukamba wavo okuti, ci leluka oku nõla onjila yi kuamiwa nda ci sukiliwa. Ndaño okuti, olonjali vi nõlapo oku kala ­likaliavo loku linga ovina vi yongola vokuenda kuotembo yimue, pole, ca sunguluka okuti, vi sapela lomãla vavo oco va kũlĩhe ekuatiso vi yongola, nda ci sukiliwa.

7, 8. Ovina vipi epata li sukila oku sapela, kuenda momo lie?

⁷ Ene alonjali, poku sapela lepata, lekisi ovisimĩlo viene, olombongo u sukila, kuenda ovina vikuavo u yongola. Nda wa lingi esokiyo liaco, ci kuatisa omãla vene oku nõla onjila yi kuamiwa, nda ka u tẽla oku ci linga. Citava okuti, omãla va yongola oku sumbila ovisimĩlo viene, kuenda oku ecelela ovina u yongoli oku linga nda citava. (Va Efe. 6:2-4) O tava hẽ oku kala konjo yomõlove, ale o yongola ekalo likuavo? Ivaluka okuti, vamue ka va tendi ovina ndomo ove o vi tenda. Momo, cikale olonjali ale omãla, va sukila otembo yoku sokolola lutate, oco va kuate ovisimĩlo vimuamue.

⁸ Vosi yetu, tu sukila oku ivaluka okuti, tu pondola lika oku tetulula ovitangi, nda tua sokiya ciwa ovina tu yongola oku linga, kuenda oku sapela ciwa lepata. (Olosap. 15:22) Vesokiyo liaco mua kongela oku sapela catiamẽla koku sakuiwa londotolo, kuenda ovina vikuavo. Poku sapela ondaka yaco, ca sunguluka oku kongelamo Olonumbi Olombangi Via Yehova via siata oku kuama, Viatiamẽla koku sakula vana va vela. Omunu lomunu o kuete omoko yoku kũlĩha onjila yi kuamiwa yoku tatiwa londotolo, oco a nõlepo nda o tava ale sio. Kuli okokanda kamue Olombangi Via Yehova via siata oku lekisa kolondotolo, oco vi kũlĩhe ndomo ombeyi yi yongola oku sakuiwa. Ocili okuti, (kuli olofeka vimue va ecelela okuti,) ku nõliwa omunu umue ukuakuteyuila ovihandeleko, ale ondotolo yimue ya koleliwa, oco yi lekise onjila ya sunguluka poku sakula umue o vela. Vosi va kongeliwa vocitangi caco, va sukila oku seleka ciwa ovikanda vi eca uvangi wonjila yi kuamiwa poku sakula ombeyi, nda ci sukiliwa. Omanu vamue va siata oku kongela ovikanda viavo viuvangi lolopapelo vikuavo vi kuete esilivilo, oco vi va kuatise kovina vimue ndeci: Oku sakuiwa lolondotolo, oku tambula olombongo kombango, oku sapela loloseketa violombiali, kuenda ovina vikuavo.

NDOMO TU LIYAKA LAPONGOLOKO KOMUENYO

9, 10. Ovitangi vipi olonjali via kuka via siata oku liyaka lavio okuti, vi sukila ekuatiso liomãla vavo?

⁹ Olonjanja vimue, omãla kumue lolonjali viavo, va siata oku nõlapo onjila yokuti, olonjali via kuka vi kala konjo yavo muẽle. Momo, pamue vi pondola oku teleka okulia kuavo, oku yelisa onjo yavo, loku landa ovihemba, kuenda via amamako oku sapela lomãla vavo. Pole, olonjali poku sapela lomãla vavo vi ci linga lonjila yimue okuti, ka vi litengi vomuenyo wavo. Nda vokuenda kuotembo olonjali ka vi tẽla vali oku enda calua, oku landa ovina, ale ka vi tẽla vali oku sokolola, omãla va sukila oku linga ovopange aco.

¹⁰ Osimbu olonjali vi amamako oku kuka, vi liyaka lovitangi vialua ndeci: Esumuo, oku vuvala vovaso, oku kala ocisitatũi, kuenda ocitangi coku sokolola ovina. Pole, nda kua molẽha ovovei aco omãla va sukila oku sandiliya lonjanga ondotolo oco olonjali vi sakuiwe. Omãla va sukilavo oku linga esokiyo lioku tuala olonjali viavo kolondotolo olonjanja viosi, oco vi tambule ekuatiso. Oco olonjali vi tatiwe ciwa, omãla va sukila oku lomboluila kolondotolo ovitangi viaco, oku vi sindikila kosipitali, kuenda oku eca ekuatiso likuavo.—Olosap. 3:27.

11. Nye omãla va sukila oku linga oco olonjali viavo vi kuatisiwe kapongoloko a lingiwa?

¹¹ Nda olonjali viove vi kuete uvei umue okuti ka ca lelukile oku u sakula, omãla va sukila oku sandiliya onjila yikuavo yoku vi sakula, ale oku linga esokiyo likuavo lioku vi kuatisa. Nda kua lingiwa apongoloko amue atito, ci leluka oku a kuama. Nda omãla va kasi ocipãla lolonjali viavo, va pondola oku linga esokiyo liokuti, umue Ombangi ya Yehova, ale omunu ukuavo wa koleliwa o kasi ocipepi lonjo yavo, o nyula olonjali olonjanja viosi, noke, o sapuila komãla ndomo vi kasi. Anga hẽ olonjali vi sukila lika oku vi telekelako okulia kuenda oku yelisa vonjo yavo? Ovina vimue vi kasi vonjo yaco vi sukila hẽ oku pongoluiwa oco ci kuatise olonjali oku iñila vohondo yoku lisukuila, kuenda oku linga ovina vikuavo? Citava okuti olonjali via kuka vi yongola oku amamako oku kala likaliavo okuti, konjo ku kala umue o talavayako oco a vi kuatisa kovopange osi. Pole, nda olonjali ka vi pondola oku linga ovopange avo, omãla va sukila oku linga esokiyo likuavo lioku vi kuatisa. Omo liaco, omãla va sukila oku kũlĩhĩsa nda vimbo olonjali vi kasi ci leluka oku sangamo ekuatiso li sukiliwa.b—Tanga Olosapo 21:5.

NDOMO VAMUE VA SIATA OKU PANDIKISA KOVITANGI

12, 13. Omãla vana ka va kasi ocipepi lolonjali viavo va siata oku vi tata ndati, kuenda va lekisa ndati esumbilo kokuavo?

¹² Omãla vana va kuetele ocisola olonjali viavo, va yongola okuti, vi kala ciwa. Oku limbuka okuti olonjali vietu vi kasi oku tatiwa ciwa, ci tu ĩha ombembua yo vutima. Kuli omãla vamue okuti ka va kasi ocipepi lolonjali viavo, omo liovikele va kuete. Omo liaco, omãla vamue va siata oku sokiya oloneke viepuyuko okuti va ka nyula olonjali viavo oco va vi kuatise kovopange amue ka vi pondola oku linga, kuenda oku landa ovina vi sukiliwa. Omãla va pondolavo oku lekisa okuti, va kuetele ocisola olonjali viavo, poku vi telefonalela olonjanja viosi, kuenda oku vi tumisa ovikanda.—Olosap. 23:24, 25.

¹³ Ndaño olonjali viove vi kasi ocipãla, kũlĩhĩsa ekuatiso o sukila oku eca eteke leteke. Nda ku kasi ocipepi lolonjali viove okuti Olombangi Via Yehova, sapela lakulu vekongelo muna vi kasi, oco va ku sapuile ovina viatiamẽla kokuavo. Kongela volohutililo olonjali viove. (Tanga Olosapo 11:14.) Ndaño okuti olonjali viove ka vi fendela Yehova, pole, o sukila oku “Sumba so la nyõho.” (Etu. 20:12; Olosap. 23:22) Kuli apata amue okuti, ka a kuama onjila yimuamue. Omãla vamue va siata oku linga esokiyo liokuti, eci olonjali viavo vi kuka vi ilukila vonjo yavo, ale vi kala ocipepi lavo. Pole, olonjanja vimue ka ca lelukile oku ci linga. Momo, olonjali vimue via kuka, ka vi sole oku kala lomãla va kuete epata liavo. Pole, vi yongola oku lianja, oco ka vi ka kale ndocilemo komãla vavo. Omo okuti olonjali vimue vi pondola oku litekula ovio muẽle, vi nõlapo oku kala likaliavo.—Uku. 7:12.

14. Ovitangi vipi vana va tata olonjali via kuka pamue va liyaka lavio?

¹⁴ Apata alua a kuete ocituwa cokuti, nda omõla umue o kasi ocipepi lolonjali via kuka, eye lika va kapa ocikele coku vi tata. Pole, omãla vaco va sukila oku lekisa esunguluko oco va limbuke ndomo va tata epata liavo, kuenda olonjali viavo via kuka. Momo, omunu lomunu o kuete epondolo lia litepa lioku eca ekuatiso. Nda ekalo liomõla una wa kala oku kuatisa olonjali lia pongoloka, epata li sukila oku linga esokiyo likuavo. Anga hẽ vepata muli umue o kuete ovikele vialua? Omãla vakuavo va pondola hẽ oku ecavo ekuatiso kolonjali viavo?

15. Nye omãla va sukila oku linga, oco va yuvule ocilemo coku tata olonjali vavo via kuka?

¹⁵ Nda olonjali via kuka vi sukila ekuatiso olonjanja viosi, noke ci kavisa una o kuete ocikele coku eca ekuatiso liaco. (Uku. 4:6) Ndaño okuti omãla vana va kuete ocisola va likolisilako oku tata olonjali viavo, pole, noke va yeva ekavo. Nda va pita locitangi caco, va sukila oku sapela la vakuavo, oco va kuatisiwe. Nda omãla vosi va nõlapo oku amamako oku tata olonjali viavo, ci va kuatisa oku yuvula oku vi tuala konjo ya vana va kuka.

16, 17. Ovitangi vipi omãla va tata olonjali via kuka va siata oku liyaka lavio? Nye ci pondola oku va kuatisa oku liyaka lovitangi viaco? (Tanga pokakasia losapi hati: “Sanjukila Ekuatiso.”)

¹⁶ Tu sumua calua eci tu limbuka okuti, olonjali vietu vi tala ohali omo lioku kuka. Vana va kuete ocikele coku eca ekuatiso, pamue va yeva esumuo, esakalalo, onyeño, ale va livetela evelo. Olonjanja vimue olonjali poku vangula, ka vi sokolola vali, ale ka vi eci olopandu. Nda wa pita locitangi caco ku ka sumue. Ulume umue wa loñoloha koku sakula uvei uyui wa popia hati: “Eci tu limbuka okuti tu kuete ovisimĩlo ka via sungulukile vina vi tu tateka oku lianja la vakuetu, tu sukila oku ivaluka okuti, ovina viaco vi pondola oku pita letu. Yuvula oku livetela evelo omo liovina ka via lingiwile ndomo wa yonguile.” Sapela lohueli yove, la vakuepata liove, ale lekamba liove wa kolela, catiamẽla kesumuo liove. Nda wa ci linga, ombangulo yaco yi ku kuatisa oku kuata elomboloko liovina vi kasi kutima wove, kuenda ovisimĩlo via sunguluka.

¹⁷ Tu lavoka otembo eci okuti, lomue vali o ka sukila oku tatiwa konjo. Pamue omãla va nõlapo oku tuala olonjali viavo vonjo ya vana va kuka. Manji umue ukãi okuti oloneke viosi wa enda oku nyula inaye wa kala vonjo ya vana va kuka, wa sapuila kepata liaye hati: “Ka tu pondola oku eca ekuatiso ina a sukila vokuenda kueteke liosi. Ka ca lelukile oku tava kesokiyo liokuti, o tualiwa konjo ya vana va kuka. Tua sumuile calua oku tava kovisimĩlo viaco. Pole, eci tua limbuka okuti o panda kolofa, tua nõlapo oku ci linga, kuenje wa tava kondaka yaco.”

18. Elavoko lipi vana va tata olonjali via kuka va kuete?

¹⁸ Ocikele coku tata olonjali viove osimbu via amamako oku kuka, ka ca lelukile. Ocili okuti, ka ca lelukile oku sanga onjila yi kuamiwa poku tata olonjali via kuka. Pole, nda wa linga esokiyo liwa ndeci: Oku li kuatisa pokati lepata, oku sapela ciwa lavo, kuenda oku likutilila ku Yehova, o pondola oku tẽlisa ocikele cove coku lekisa esumbilo locisola kolonjali viove. Nda wa ci linga, o kuata esanju poku limbuka okuti, olonjali viove via kuka vi kasi oku tambula ekuatiso vi sukila. (Tanga 1 Va Korindo 13:4-8.) Ivaluka okuti ocina ca velapo kokuove, oku kuata ombembua yo vutima, momo Yehova o sumũlũisa omãla vana va sumbila olonjali viavo.—Va Fil. 4:7.