‘Tiuka Oco o Kolise Vamanjove’

PETULU wa lila calua eci a likala Yesu poku popia hati, ko kũlĩhĩle. Ndaño Petulu wa sukilile oku likolisilako oco a pamise ekolelo liaye, pole, Yesu wa yonguile okuti, o kuatisa omanu vakuavo. Yesu wo sapuila hati: ‘Eci o tiuka kolisa vamanjove.’ (Luka 22:32, 54-62) Petulu weya oku kala umue pokati kolongunji vekongelo Liakristão vo kocita catete. (Va Gal. 2:9) Cimuamue haico ci pondola oku pita la manji umue wa kala ale ukulu wekongelo okuti, o pondola oku kuata vali ovikele viaco, kuenje o kuata esanju poku pamisa ekolelo lia vamanji.

Vamanji vamue vopiwa ocikele coku kala akulu vekongelo, noke va kuata ovisimĩlo viokuti, ka va kuete esilivilo. Manji umue o tukuiwa hati Julio,a okuti wa kala ukulu wekongelo ci pitahãla 20 kanyamo Kombuelo yo Amerika wa popia hati: “Oku pongiya olohundo, oku nyula vamanji loku pamisa ekolelo liavo, ca pangele onepa komuenyo wange! Eci ndopiwa ocikele caco nda sumuile calua. Esumuo liaco lia amamako otembo yalua.” Cilo, manji Julio wa tambula vali ocikele caye coku kala ukulu wekongelo.

“CI SANJUKILI”

Ndonge Tiago wa soneha ndoco: “A vamanji, eci vu nyikiwa lolohali viñi viñi, ci sanjukili.” (Tia. 1:2) Olondaka evi Tiago wa vi tiamisila kovitangi vi tunda kelambalalo, kuenda kekambo lietu lioku lipua. Eye wa tukula ocipululu, oku lekisa ocame, kuenda ovina vikuavo. (Tia. 1:14; 2:1; 4:1, 2, 11) Eci tu pindisiwa la Yehova, pamue tu sumua calua. (Va Hev. 12:11) Pole, ka tu ka eceleli okuti, esumuo liaco li nyõla esanju lietu.

Nda tu opiwa ocikele cetu vekongelo, tu kuete epuluvi lioku kũlĩhĩsa ekolelo lietu, kuenda oku lekisa ocisola ku Yehova. Tu pondolavo oku sokolola esunga lieci tua tambuilile ocikele caco. Anga hẽ tua u lingila oco u tu kuatise etu muẽle, ale tua vetiyiwa oku tambula ocikele caco omo liocisola tu kuetele Suku, loku limbuka okuti ekongelo liatiamẽla kokuaye, kuenda li sukila oku kuatisiwa? (Ovil. 20:28-30) Akulu vekongelo okuti tunde eci va tambula ocikele caco pa pita ale otembo yalua, va kasi oku amamako lesanju kupange wavo u kola, loku lekisa komanu vosi oku kongelamo Satana okuti, ocisola va kuetele Yehova cocili.

Eci Soma Daviti a lunguiwa omo liekandu linene a linga, wa tava kepindiso a tambula, kuenje, Yehova wo wecela. Omo liaco, Daviti wa imba ocisungo hati: “Wa sumũlũha u okulueya kuaye kua eceliwa kuenda ekandu liaye lia tuvikiwa la Suku. Wa sumũlũha omunu Yehova ko veta eko, kuenda vutima waye ka mu li elimbi.” (Osa. 32:1, 2) Epindiso Daviti a tambula, lio pengulula, kuenda lio kuatisa oku kala ungombo uwa wafendeli va Suku.

Olonjanja vimue, vamanji vana va tambula vali ocikele cavo coku kala akulu vekongelo, va siata oku tata ciwa olomeme okuti, ekuatiso va enda oku eca kosimbu li sule. Ukulu umue wekongelo wa popia hati: “Cilo, ndi kuete elomboloko ndomo ndi tata ciwa vamanji va lueya.” Ukulu ukuavo wekongelo wa popia hati: “Cilo, nda velisapo ocikele cange coku kuatisa vamanji.”

O PONDOLA HẼ OKU TIUKA?

Ukualosamo wa soneha ndoco: “[Yehova] ka lemaela ño-o hũ.” (Osa. 103:9) Tu sukila oku yuvula ovisimĩlo viokuti, Yehova ka kolela vali komunu umue wa linga ekandu linene. Manji umue o tukuiwa hati Ricardo, wa kala ukulu wekongelo vokuenda kuanyamo alua, pole, wopiwa ocikele caco, wa popia hati: “Ekandu nda lingile, lia ndi sumuisile calua. Nda pita otembo yalua loku sima okuti, omo sia loñolohele, si pondola vali oku tambula ocikele cange coku kala ukulu wekongelo, oco ndi kuatise vamanji. Sia kuatele elavoko liokuti, eteke limue vamanji va ka ndi kolela vali. Pole, omo okuti nda solele oku kuatisa omanu, nda fetika oku longisa Embimbiliya komanu vamue, oku pamisa vamanji Vonjango Yusoma, kuenda oku talavaya lavo kupange woku kunda. Ovina viaco via ndi kuatisa oku kala omunu umue wa koleliwa, kuenje, nda linga vali ukulu wekongelo.”

Oku kuata ocikumbiti, ci tateka omunu oku kala ukulu wekongelo. Tu sukila oku kuama ongangu ya Daviti wa kala ufendeli wa Yehova okuti, wa tila Soma Saulu ukuepela! Daviti wa likala oku fetuluinya Saulu, ndaño okuti, wa kuata epuluvi lioku ci linga. (1 Sam. 24:4-7; 26:8-12) Eci Saulu a fila kuyaki, Daviti wa lila olofa viaye, kuenje wa popia hati, eye kumue lomõlaye Yonatãu, “va soliwa locili.” (2 Sam. 1:21-23) Daviti ka kuatele ocikumbiti.

Nda o sima okuti wa lundiliwa, ale va ku linga ocina cimue cĩvi, ku ka ecelele okuti, ocikumbiti ci nyõla ovisimĩlo viove. Manji William okuti wa kala ukulu wekongelo ci soka 30 kanyamo kofeka yo Grã-bretanya, eci opiwa ocikele caco, wa yeva esumuo lialua. Nye co kuatisa oku kuata ovisimĩlo via sunguluka? Eye wa popia hati: “Oku tanga elivulu lia Yovi, ca ndi lembeleka calua. Omo okuti Yehova wa kuatisa Yovi oku sanda ombembua lakamba vaye vatatu, o pondolavo oku ndi kuatisa oku kuata ombembua lakulu vakuavo vekongelo!”—Yovi 42:7-9.

YEHOVA O SUMŨLŨISA VANA VA TAMBULA VALI OVIKELE VIAVO VIANGOMBO

Nda wa liwekapo oku kala ungombo wolomeme via Suku, o sukila oku sokolola esunga lieci wa nõlelapo oku ci linga. Anga hẽ wa ci lingila omo liovitangi o liyaka lavio? Wa velisapo hẽ ovina vikuavo komuenyo wove? Anga hẽ ekambo lioku lipua lia vakuene olio lia ku vetiya oku ci linga? Ivaluka okuti, wa enda oku kuatisa vakuene volonjila via litepa, eci wa kala ukulu wekongelo. Olohundo viove via pamisa ekolelo liavo, ongangu yove ya va pamisa, kuenda apasu wa enda oku linga kokuavo, a va kuatisa oku pandikisa kovitangi va liyaka lavio. Upange wove woku kala ukulu wekongelo wa koleliwa, wa sanjuisa utima wa Yehova, ndeci wa sanjuisa utima wove.—Olosap. 27:11.

Yehova wa siata oku kuatisa vamanji oku tumbulula esanju liavo, kuenda onjongole yoku songuila vali ekongelo. Nda wa liwekapo oku kala ukulu wekongelo, ale wopiwa ocikele caco, o pondola ‘oku ci tambula vali.’ (1 Tim. 3:1) Paulu ka ‘liwekelepo oku likutilila’ okuti, vamanji vo ko Kolosai va kuata ukũlĩhĩso wa suapo watiamẽla kocipango ca Yehova, oco ‘va endaende ndeci ca sesamẽla ku Yehova loku u sanjuisa calua.’ (Va Kol. 1:9, 10) Nda wa tambula vali ocikele coku kala ukulu wekongelo, ivaluka ekuatiso li tunda ku Yehova, epandi, kuenda esanju. Koloneke vilo via sulako, afendeli va Yehova va sukila ekuatiso liangombo vakuacisola. Anga hẽ o kuete onjongole yoku kuatisa vamanji lutima wove wosi?