Apulilo Embimbiliya Atambuluiwa
Anga hẽ lalimue eteke tu ka kuata ombiali yimue yi viala oluali luosi?
Ombiali yimue yoluali yi pondola oku kongela ndati omanu vokolofeka viosi? Isaya 32:1, 17; 54:13
Sokolola ndomo uviali umue woluali luosi u pondola oku kuatisa omanu. Koloneke vilo omanu valua va tala ohali omo liuhukũi osimbu okuti va kuavo olohuasi. Pole ombiali yimue ukuacikembe o pondola oku kuatisa vosi oco va kuate ovina va sukila. Ove hẽ, o sima okuti omanu va pondola oku tumbika uviali waco?—Tanga Yeremiya 10:23.
Vokuenda kuanyamo, olombiali ka via siatele oku tẽlisa olonjongole viomanu vana va viala, ca piãla enene olohukũi. Olombiali vimue olongangala. (Ukundi 4:1; 8:9) Pole Suku Tõlo, wa likuminya oku tumbika uviali umue u ka piñala ovoviali osi akuavo. Uviali waco u ka kuatisa omanu vosi.—Tanga Isaya 11:4; Daniele 2:44.
Nye Usoma wa Suku u ka Tẽlisa?
Yehova Suku wa nõla Omõlaye Yesu okuti eye ombiali yi sesamela oku Viala oluali. (Luka 1:31-33) Eci Yesu a kala palo posi, wa kuatisa omanu. Eci a ka viala Ndosoma, o ka kongela omanu vokolofeka viosi kuenda o ka yovola omanu kohali yosi.—Tanga Osamo 72:8, 12-14.
Anga hẽ omanu valua va ka tava Yesu ndombiali? Sio. Pole Yehova ukuepandi. (2 Petulu 3:9) Eye o kasi oku eca epuluvi komanu oco va tave Yesu Ndosoma. Ndopo, Yesu o ka nyõla omanu vosi vãvi kuenje o ka tumbika ombembua kuenda oku kolapo voluali.—Tanga Mika 4:3, 4.