APULILO EMBIMBILIYA A TAMBULUIWA
Eteke Liekanga li Lomboloka Nye?
Momo lie eteke liesombiso li ka kalela otembo yimue yesanju?
Kosimbu Suku wa tuma olonganji oco vi popele afendeli vaye kungangala. (Olonganji 2:18) Embimbiliya li lekisa okuti Eteke Liesombiso li keya kovaso yoloneke li ka kala eteke limue liesanju eci Yehova, Onganji yoluali luosi a ka popela omanu kungangala.—Tanga Osamo 96:12, 13; Isaya 26:9.
Suku wa nõla Yesu oco a lekise esunga kuava va kasi lomuenyo kuenda ava va fa. (Ovilinga 10:42; 17:31) Omanu valua va siata oku fa osimbu handi ka va kũlĩhile Suku. Vokuenda Kueteke Liesombiso, Yesu o ka pindula omanu vaco oco va kuate epuluvi lioku kũlĩha kuenda oku sola Suku yocili.—Tanga Ovilinga 24:15.
Momo lie Eteke Liesombiso li ka pitila ohulukãi yanyamo?
Vana va fa va ka pinduiwa vokuenda kuohulukãi yanyamo. (Esituluilo 20:4, 12) Ovo va ka sukila otembo yoku lilongisa olonumbi via Suku loku pokola kokuaye. Ca li tepa lovisimĩlo viomanu ceci okuti, Embimbiliya li lekisa okuti omanu va ka sombisiwa omo liovina va ka linga noke yepinduko liavo.—Tanga Va Roma 6:7.
Embimbiliya li lekisavo okuti eteke liesombiso li ka fetika osimbu handi ohulukãi yanyamo ka ya fetikile. Eteke liaco li tukuiwavo okuti eteke liesulilo ndomo ci lekisiwa ko kapa yorevista yilo. Keteke liaco Suku o ka nyola omanu vosi olondingaivĩ. (2 Petulu 3:7) Omo liaco tu likolisiliko oku lekisa ocisola cetu ku Suku.—Tanga 2 Petulu 3:9, 13.