Oku Sakalala Lepata

Ukãi umue o tukuiwa hati Janet wa popia hati: “Noke liotembo yimue tunde eci Isiange a fa, ulume wange wa ndi sapuila hati o sandiliya ukãi ukuavo. Noke wa longeka uwalo waye kuenje wa ndi siapo lomãla vetu vavali pole ka tu sikile.” Janet noke wa sanga upange pole ofeto a tambula ka yi tẽla oku landa ovina viosi vi sukiliwa vonjo yaye. Eye ka liyakele lika lovitangi viekambo liolombongo. Eye wa ivaluka ndoco: “Esakalalo lia velapo ñuete lieli okuti, nda sukilile oku potolola likaliange ovitangi viosi ndi li yaka lavio kuenje ca enda oku ndi sakalaisa calua. Nda enda oku livetela evelo omo okuti sia tẽlele oku eca ovina viosi omãla vange va sukila ndeci olonjali vikuavo vi lingainga. Toke cilo nda siata oku sakalala poku sokolola ndomo omanu va ndi tenda ame kuenda omãla vange. Va kasi oku lipula hẽ nda nda linga cosi oco ndi teyuile olohuela viange?”

Ohutililo ya siata oku kuatisa Janet oku lava ovisimĩlo viaye loku pamisa ukamba waye la Suku. “Vokati kuteke okuti ka kuli onjuela, esakalalo li livokiya. Oku likutilila kuenda oku tanga Embimbiliya ci ñuatisa oku pekela. Ocipama Cembimbiliya nda velisapo, Va Filipoi 4:6, 7, ci lekisa okuti: “Lacimue ko ka ci kuateli ohele, puãi kovina viosi apingilo ene a sapuiwe ku Suku lolopandu volohutililo viene lalombelo ene. Kuenje ombembua ya Suku, yina ya piãla olondunge viosi, yi lava ovitima viene lovisimilo viene.” Nda pita ovoteke alua loku likutilila kuenda ombembua ya Yehova ya siata oku ndembeleka.”

Olondaka Yesu a tukula viatiamẽla kohutililo, vohundo a lingila Komunda vi kuatisa oku liyaka lasakalalo, “Isiene wa kũlĩha ovina vio sesameli osimbu ka wa vi pingili.” (Mateo 6:8) Tu sukila oku pinga kokuaye. Oku linga olohutililo onjila yimue yi kuatisa oku ‘Amẽla ku Suku.’ Onima yi pi iyililako? “Eye amẽla kokuene.”—Tiago 4:8.

Ohutililo ka yi tu kuatisa lika oku sanjuka omo tua situlula asakalalo etu. Yehova ‘ukuakuyeva ohutililo,’ o kuatisavo vana vo sandiliya lekolelo. (Osamo 65:2) Eli olio esunga lieci Yesu a vetiyila olondonge viaye ‘okuti ca va sesamẽla oku likutilila pole, oku tokoka hacoko.’ (Luka 18:1) Tu sukila oku pinga ku Suku oco eye a tu kuatise loku tu songuila, loku kolela okuti o ka pamisa ekolelo lietu. Lalimue eteke ka tu ka tatãle konjila yaye yoku songuila ovina. Oku kala “locituwa coku likutilila” ci lekisa okuti tu kuete ekolelo lia pama.—1 Va Tesalonike 5:17.

CECI CI LOMBOLOKA OKU KUATA EKOLELO

Ekolelo li lomboloka nye? Vekolelo mua kongela oku “kũlĩha” Suku ndomunu. (Yoano 17:3) Tu pondola oku ci linga poku lilongisa Embimbiliya. Nda tua ci linga, tu limbuka okuti eye wa kapako omunu lomunu pokati ketu kuenda o yongola oku tu kuatisa. Pole, vekolelo liocili ka mua kongelele lika oku kũlĩha ocili catiamẽla ku Suku. Mua kongelavo oku kuata ukamba wocili laye. Ndeci ca siata pokati komanu, ukamba waco ka u lingiwa veteke liongongo. Ekolelo lietu li “amamako” osimbu tu lilongisa ovina viatiamẽla kokuaye, loku linga “ovina viu sanjuisa,” kuenje eye o ka tu kuatisa. (2 Va Korindo 10:15; Yoano 8:29) Eli olio ekolelo lia kuatisa Janet oku liyaka lasakalalo.

Janet wa popia hati: “Eci ca ñuatisa oku pamisa ekolelo liange ku Yehova, oku limbuka ekuatiso a nyiha vokuenda kuovitangi nda liyaka lavio. Olonjanja vialua eci tua tatiwa lãvi, ca moleha okuti ka ca lelukile oku liyaka lovitangi viaco. Lolohutililo vialua, Yehova wa sanda onjila yoku tu kuatisa, okuti nda ca kale likalietu nda ka tua ci tẽlele. Eci ndi lekisa olopandu viange kokuaye, ci ndi ivaluisa ovina vialua eye a ndingila. Olonjanja vialua eye wa enda oku tu kuatisa vokati kuteke, vepuluvi tua sukilile. Eye wa nyiha akamba vawa alume lakãi okuti Akristão vocili. Olonjanja viosi va nyiha ekuatiso ndi sukila kuenda ovo ongangu yiwa komãla vange.”a

“Nda kũlĩha esunga lieci Yehova a popela kelivulu lia Malakiya 2:16 hati: ‘Ndi nyãle oku linyãla.’ Oku linyãla ku koka evalo lialua, capiãla enene kohueli yina ka yi kuete eko. Ndaño okuti papita ale anyamo alua tunde eci tua linyãla lulume wange, olonjanja vimue nda siata oku yeva ulika. Eci ndi yeva esumuo, ndi likolisilako oku linga cimue ci kuatisa omunu ukuavo, noke poku ci linga ci ñuatisavo.” Poku kapako olonumbi Viembimbiliya oco ka ka yeve esumuo, ca siata oku kuatisa Janet oku liyaka lasakalalo.b—Olosapo 18:1.

Janet wa popia hati: “Nda lembelekiwa calua eci nda lilongisa okuti Yehova eye ‘Isia yolosiwe, haiye onganji yovimbumba.’ Eye lalimue eteke a ka tu yanduluka ndeci ulume wange a linga.” (Osamo 68:5) Janet wa kũlĩha okuti ‘Suku ka tu yonji leci cĩvi.’ Pole, eye “ecaeca komanu vosi ocali” olondunge kuenda “unene wa piãla” oco tu li yake lasakalalo etu.—Tiago 1:5, 13; 2 Va Korindo 4:7.

Nye ci popiwa nda tua sakalala omo okuti omuenyo wetu u kasi kohele?