Sanda Ekuatiso Oco o Kuate Elomboloko Liembimbiliya

Sokolola okuti o kasi oku nyula onjanja yatete ofeka yimue kua kũlĩhĩle. Kuenje o sangako omanu, lovituwa, lokulia kuenda olombongo kua kũlĩhĩle. Vepuluvi liaco citava okuti nda wa yeva esumuo omo liovina viaco.

Cimuamue haico o pondola oku yeva poku tanga Embimbiliya onjanja yatete. Osimbu o tanga, o pondola oku sanga ulandu womanu vamue vo kosimbu okuti kua va kũlĩhĩle, ndeci va Filisiti va kuatele ocituwa ka ca siatele koloneke vilo coku ‘tola uwalo.’ Handi vali o kũlĩhavo okulia kumue ku tukuiwa hati, omana kuenda ocingangu ci tukuiwa okuti odracma. (Etundilo 16:31; Yehosua 13:2; 2 Samuele 3:31; Luka 15:9) Citava okuti ovina viaco vi pondola oku ku nenela ekatanga. Ndeci ci pita nda o kasi o ku nyula ofeka yimue kua kũlĩhĩle, nda kua sanjukilile hẽ ekuatiso liomunu umue oco a ku lomboluile ovina viaco?

EKUATISO KOSIMBU

Tunde eci ovisonehua vi kola via sonehiwa onjanja yatete kocita 16 O.Y., kua eciwa ekuatiso oco omanu va kuate elomboloko liovisonehua. Mose usongui watete wofeka yo Isareli wa “lombolola” ovisonehua.—Esinumuĩlo 1:5.

Noke yoku pita ci soka ovita ekũi, handi kua kala alongisi Vovisonehua va loñolõha. Kunyamo wo 455 O.Y., ocimunga cimue cinene ca va Yudea, oku kongelamo omãla, va liongoluila polusenje volupale luo Yerusalãi. Alongisi Vembimbiliya va enda oku va “tangela ... elivulu [li kola]. Pole hacoko lika va enda oku linga. “Eci va tanga haico va [lomboluila omanu] okuti ci va lomboloka.”—Nehemiya 8:1-8.

Noke yovita vitãlo kanyamo, Yesu Kristu wa li tumbikilevo kupange waco woku longisa. Ocili okuti Eye wa kũlĩhĩwile lomanu ndu longisi. (Yoano 13:13) Eye wa longisa owiñi walua, oku kongelamo omunu lomunu. Eteke limue, wa vangula lowiñi poku linga o hundo Komunda, kuenje “owiñi womanu wa komoha okulongisa kuaye.” (Mateo 5:1, 2; 7:28) Kunyamo wo 33 K.K., Yesu osimbu a kala oku sapela lolondonge vivali eci va kala oku enda vimbo limue ocipepi lo Yerusalãi, wa va “situluila [lutate] ovisonehua.”—Luka 24:13-15, 27, 32.

Olondonge via Yesu via kalavo alongisi Vondaka ya Suku. Eteke limue, kalei umue woko Etiopia wa kala oku tanga ulandu umue Wembimbiliya. Kuenje ndonge Filipu wo pula hati: “Eci o kasi oku tanga ndeti ca ku lomboloka?” Eye wa tambulula hati: “Ci ndomboloka ndati nda ka pali laumue o ci ndomboluila?” Kuenje Filipu wo lomboluila onepa yocisonehua a kala oku tanga.—Ovilinga 8:27-35.

EKUATISO KOLONEKE VILO

Olombangi Via Yehova koloneke vilo via litumbikavo kupange woku longisa Embimbiliya koluali luosi, kueci ci soka 239 kolofeka, ndeci alongisi Vembimbiliya kosimbu va lingaile. (Mateo 28:19, 20) Osemana losemana, va kuatisa eci ci pitahãla olohuluwa ecea viomanu oku kuata elomboloko Liembimbiliya. Valua pokati kavo va tunda katavo ana okuti Hakristãoko. Elongiso liaco ka lifetiwa, kuenda citava okuti li lingiwa konjo yove, ale kocitumãlo ca ku sungulukila. Omanu vamue va lilongisa lekuatiso liotelefone, ale liolovideo vo Internet.

Sapela Lombangi yimue ya Yehovaoco yi ku lomboluile ndomo o pondola oku kuatisiwa lesokiyo liaco. O ka limbuka okuti Embimbiliya elivulu limue “[lisilivila] koku tu longisa, koku tu pisa, koku suñamisa ovina loku tu pindisila vesunga,” oco okuti o “loñoloha loku liangiliyila upange wosi uwa.”—2 Timoteo 3:16, 17.