OSAPI YO KOÑOÑO | MOMO LIE TU SUKILILA OKU KALA VAKUACILI?

Ndomo wa Kongeliwa Voku Kemba

“Kuli ovitangi vimue okuti, nda wa kongelamo uhembi vi tetuluiwa lonjanga.” —Samantha, wo kofeka yo Afrika do Sul.

Ove hẽ o tava kolondaka evi? Ndeci ca pita la Samantha, vosi yetu tua siata oku liyaka lovitangi vialua. Ocituwa tu lekisa eci tu setekiwa oku kemba, oco ci situlula nda tua siata oku popia ocili ale sio. Nda tua limbuka okuti oku liteyuila kocitangi cimue oco ci kuete esilivilo lia velapo kokuetu, tu vetiyiwa oku sima okuti, oku kemba kua sunguluka. Oku kemba ku nena ovitangi eci omanu vakuavo va limbuka ocili. Omo liaco, tu konomuisi ovolandu a kuãimo.

OKU KEMBA KU TATEKA OKU KOLELIWA

Omanu va pondola lika oku pamisa ukamba wavo nda va likolela pokati. Omanu vavali va pondola oku limbuka okuti va kolapo nda va likolela pokati. Pole, oku likolela kuaco pokati ka ku iya ocipikipiki. Omanu va pondola lika oku li kolela pokati nda va kala otembo yalua pamosi, nda va vangula ocili poku sapela, kuenda va li kuatisa pokati. Oku likolela ku pondola oku nyõleha omo liuhembi. Nda pokati komanu va likolela pali umue o kemba, ukamba wavo u nyõleha.

Ove hẽ wa kembiwile ale lomunu umue wa simĩle okuti ekamba liwa? Nda wa kembiwile, kua yevele hẽ esumuo? Ocili okuti wa sumuile calua, kuenda wa kala ndomunu umue wa pakuiwa. Pole, ca sunguluka oku kuata elomboloko liaco. Momo, uhembi u pondola oku nyõla ukamba omanu va likuetele pokati.

OKU KEMBA KU VOKIYA UHEMBI

Ulume umue o tukuiwa hati Robert Innes okuti ulongisi wo kosikola ya velapo yo kolupale luo Kalifornia, wa linga ekonomuiso liokuti oku “kemba ku sambuka.” Oku kemba ku sokisiwa luvei umue u sambuka okuti, osimbu amamako oku kala lomunu waco, “o yapuisiwa” luhembi waye.

O pondola oku yuvula ndati ocituwa coku kemba? Embimbiliya li pondola oku ku kuatisa. Omo liaco, tu konomuisi ulandu umue Wembimbiliya u ka situluiwa vocipama ci kuãimo.

Olonjila vi Lekisa Okuti Omunu Hokuaciliko

Oku Kemba

KU LOMBOLOKA NYE? Ku lomboloka oku vangula uhembi komunu umue o kuete omoko yoku kũlĩha ocili. Voku kemba mua kongela oku pengisa ovolandu oco omunu umue a nyaniwe, oku tepulula ovolandu ocili okuti omunu o kembiwa, kuenda oku vokiya ovina viuhembi kovolandu ocili, oco tu ece uvangi umue wesanda.

CECI EMBIMBILIYA LI POPIA: “Yehova o nyale ocimbinde, puãi o kolela ava va sunguluka.” (Olosapo 3:32) “Omo okuti wasipo uhembi, omunu lomunu pokati kene a vangule ocili lukuavo.”—Va Efeso 4:25.

Alundi

A LOMBOLOKA NYE? A lomboloka oku vangula ovina viuhembi okuti vi nyõla ekalo liwa liomunu umue.

CECI EMBIMBILIYA LI POPIA: “Ocimbinde ci sanomola ovama; ocisokui ci tepisa akamba vocili.” (Olosapo 16:28) “Pa kamba olohui ondalu yima; ka pali ukualombonde uyaki u pua.”—Olosapo 26:20.

Oku Kembiwa

KU LOMBOLOKA NYE? Voku kembiwa mua kongela oku vetiya omunu umue oco a ece olombongo vioku linga omĩlu yimue yesanda.

CECI EMBIMBILIYA LI POPIA: “Ka ci tava oku kangisa ondingupange ohukui haeye osuke.” (Esinumuĩlo 24:14, 15) “U o linga lãvi osuke o pembula usovoli waye, u o lingila osuke ohenda u kemainya.”—Olosapo 14:31.

Oku Nyana

KU LOMBOLOKA NYE? Ku lomboloka oku upa ocikuata comunu umue okuti ka tu kuete omoko yaco.

CECI EMBIMBILIYA LI POPIA: “U o nyana ka ka nyane vali; puãi a talavaye loku linga upange uwa lovaka aye muẽle, okuti o kuata cimue coku eca komunu wa suka.” (Va Efeso 4:28) “Ko ka kembiwi. Ndaño ovimunu, ndaño vakuacipululu, ndaño oloholua, ndaño vakuakuimbula, ndaño olondiandia, ka va piñala Usoma wa Suku.”—1 Va Korindo 6:9, 10.