Ocili Catiamẽla Kovina Vio Kovaso Yoloneke
Wa lipulile ale catiamẽla kovina vi ka pita kovaso yoloneke? Embimbiliya li tu sapuila eci catiamẽla kovina via velapo via laikele oku pita voluali luosi oku kongelamo omanu.
Yesu wa lombolola ndomo tua laikele oku ‘limbuka okuti Usoma wa Suku u kasi ocipepi.’ (Luka 21:31) Eye wa popia hati pokati kovina viaco, kua laikele oku kala ovoyaki, ovilemawe, onjala kuenda afengi, kuenje oco tua siata oku mola koloneke vilo.—Luka 21:10-17.
Embimbiliya li tu sapuilavo okuti “koloneke via sulako,” uviali womanu wa laikele oku limbukiwa konjila ndomo omanu va lekisa ovituwa viavo. O pondola oku tanga ovituwa viaco kukanda 2 Timoteo 3:1-5. Eci o tala ovituwa, lovilinga viaco koloneke vilo, o tava okuti ocitumasuku eci Cembimbiliya ci likuata lovina vi kasi oku pita cilo.
Eci hẽ ci lomboloka nye? Ci lomboloka okuti, otembo Yusoma wa Suku yoku linga apongoloko komuenyo vongongo, yi kasi ocipepi. (Luka 21:36) Vembimbiliya, Suku wa likuminya ovina viwa viatiamẽla kongongo kuenda komanu va ka kalamo. Tala ovolandu amue.
UVIALI UWA
“Kuenje [Yesu] wa ĩhĩwa uviali lulamba kuenda usoma, oco apata osi lolofeka lomanu vakualimi añi añi vo vumbe. Uviali waye ka u pui, ka u piti kuenje usoma waye ka u nyolĩwa.” —DANIELE 7:14.
Eci ci lomboloka okuti: Ove o pondola oku kuata esanju komuenyo vemẽhi liuviali umue wa velapo Suku a tumbikila Omõlaye Ndosoma.
UHAYELE UWA
“Layimue onungi yi popia yiti, ‘Ndi vela’”—ISAYA 33:24.
Eci ci lomboloka okuti: Ove lalimue eteke o ka vela ale oku kala ocilema; o pondola oku kala komuenyo okuti, lalimue eteke o fa.
OMBEMBUA VOLUALI LUOSI
Eye “Imola ovita toke kesukiyo liongongo.”—OSAMO 46:9.
Eci ci lomboloka okuti: Ka ku ka kala vali uyaki, lohali yosi ya siata oku kokiwa layo.
ONGONGO YI KEYUKA LOMANU VAWA
“Ondingaĩvi ka yi kalapo . . . Ambombe puãi va piñala ofeka.”—OSAMO 37:10, 11.
Eci ci lomboloka okuti: Ka ku ka kala vali omanu olondingaĩvi, ku ka kala lika omanu va pokola ku Suku.
ONGONGO YOSI YI KA KALA OFEKA YELAU
“Va tunga olonjo kuenje va kalamo; va kũla oviumbo viayuva kuenje va lia epako liavio.”—ISAYA 65:21, 22.
Eci ci lomboloka okuti: Ongongo yosi yi ka posoka. Suku o ka tẽlisa ohutililo yetu yokuti, ocipango cove ci lingiwe “palo posi.”—Mateo 6:10.