Anga hẽ Iso Liove Lia Yela?
1. Oku kuata ‘iso lia yela’ ci lomboloka nye?
1 Ovina tu tala lovaso, vi vetiya utima wetu. Olondaka via Yesu, vi kuete esilivilo eci a popia hati: “Iso liove, nda li yela, etimba liove liosi li kala locinyi”! (Mat. 6:22) Nda iso lietu ‘lia yela’ ndomo Yesu a ci popia, tu tiamisila utima wetu koku linga ocipango ca Suku. Tu pitisa kovaso Usoma wa Suku kuenda ka tu tiamisila utima kovina ka vi kuete esilivilo, ale kovopange ana a tateka upange woku kunda.
2. Nye ci pondola oku yapuisa ovisimĩlo vietu, pole nye ci tu kuatisa?
2 Ovina tu Sukila Oku Kũlĩhĩsa Lutate: Ovisimĩlo vietu vi pondola oku yapuisiwa lasapulo a tu vetiya oku sanda ovina vakuetu va kuete. Nda tu sandiliya upange umue, ale cimue tu yongola, okuti ci pesela otembo yetu, lolombongo, kuenda ongusu yetu, tu sukila ‘oku kũlĩhĩsa epese liaco,’ loku li pula ndoco: ‘Anga hẽ, ci ka ndi kuatisa oku vokiya otembo yange kupange wa Yehova, ale ci ka ndi tateka?’ (Luka 14:28; Va Fil. 1:9-11) Olonjanja vimue, ca sunguluka oku konomuisa ekalo lietu ndomo tu leluisa omuenyo wetu, oco tu vokiye upange woku kunda.—2 Va Kor. 13:5; Va Efe. 5:10.
3. Nye tu lilongisa kulandu wa manji umue ukãi wa nõlapo oku leluisa omuenyo waye?
3 Manji umue ukãi eci a litumbika kupange wakundi vavelapo, wa liwekapo oku talavaya kupange weteke liosi woku sanda eteku. Kuenje, wa nõlapo ukuavo okuti wecelela oku talavaya lika onepa yimosi yeteke, oco a sange ovina a sukila. Eye wa lombolola hati: “Lomue o tẽla oku talavayela vacime vavali. Nda nõlapo oku yuvula ovina si sukila calua, oco ndi pitise kovaso ovina vi kuete esilivo lialua. Kuenje, nda limbuka okuti, noke yoku landa ovina vimue, vokuenda kuotembo ka tu vi yongola vali, kuenje, tu kuata onjongole yoku landa vikuavo.” Onjila a nolapo, yo kuatisa oku leluisa omuenyo waye, kuenda oku sandiliya upange ukuavo wo wecelela oku amamako kupanga wakundi vavelapo.
4. Momo lie oku kuata iso lia yela ci kuetele esilivilo koloneke vilo?
4 Otembo tu kasi yi lekisa okuti, oku kuata iso lia yela ci kuete esilivilo. Eteke leteke tua siata oku limbuka okuti, esulilo lioluali lulo li kasi ocipepi, kuenda ndopo kuiya oluali luokaliye lua Suku. (1 Va Kor. 7:29, 31) Nda tua velisapo upange woku kunda, tu lipopela etu muẽle kuenda vana va tu yevelela.—1 Tim. 4:16.