Oku Sokolola Lolohutililo ci Kuete Esilivilo Kakundi Vakuambili
1. Nye ca kuatisa Yesu oku yuvula oku siapo upange waye wa velapo?
1 Onjanja yimue Yesu wa pita uteke loku kayisa omanu kuenda oku tundisa olondele. Eteke lia kuamamo, eci olondonge viaye vio sanga, via popia vati: “Vosi va ku sanda,” kuenje vo vetiya oku amamako oku linga ovikomo. Pole, Yesu ka silepo upange waye wa velapo woku kunda olondaka viwa. Eye wa popia hati: “Tu endi kumue kuiñi kovaimbo a lisungue si ka kundilakovo, momo oco ndeyilila.” Nye ca kuatisa Yesu oku amamako lupange waye? Eye wa enda oku pasuka omẽle oku likutilila loku sokolola lutate kupange waye. (Mar. 1:32-39) Oku sokolola lohutililo ci tu kuatisa ndati oku kala akundi vakuambili?
2. Kovina vipi tu sukila oku sokolola okuti vi tu kuatisa oku amamako oku lekisa ombili kupange woku kunda?
2 Kovina Vipi tu Sokolola? Yesu wa limbukile okuti omanu “va pekengua kuenda va sakalaisua ndolomeme ka vi kuete ungombo.” (Mat. 9:36) Cimuamue haico okuti, koloneke vilo omanu valua va sukila oku yeva esapulo liolondaka viwa. Tu limbuki okuti otembo ya kambako yitito. (1 Va Kor. 7:29) Omo liaco, tu sukila oku ivaluka okuti ovilinga via Yehova, ovituwa viaye, lesumũlũho tu kuete lioku kala Olombangi via Yehova, kuenda ovina tua siata oku lilongisa Vondaka ya Suku, ka via kũlĩhĩwile lomanu va sangiwa vocikanjo cetu.—Osa. 77:11-13; Isa. 43:10-12; Mat. 13:52.
3. Vapuluvi api tu sukila oku sokolola?
3 Vapuluvi Api tu Sokolola? Koloneke vilo, vamue va pasuka omẽle yalua, ndeci Yesu a lingaile. Vakuavo va nõlapo oku sokolola luteke osimbu ka va pekelele. (Efet. 24:63) Ndaño tu kuete ovina vialua vioku linga, tu pondola oku sanga otembo yoku sokolola. Vamue va ci linga osimbu va kevelela ocendelo. Vakuavo va ci linga kelivala liavo lionanya. Vamanji valua va limbuka okuti oku sokolola osimbu ka va endele kupange woku kunda, ndaño muẽle okatembo katito, ci va kuatisa oku lekisa ombili kuenda utõi kupange waco.
4. Momo lie ci kuetele esilivilo oku sokolola?
4 Oku sokolola lohutililo, ci vokiya onjongole yetu yoku vumba Yehova, oku tenda efendelo lietu ndocina ca velapo komuenyo wetu, kuenda ci pamisa ombili yetu yoku amamako oku kunda. Ndeci Yesu Ondingupange ya Velapo ya Suku a kuatisiwa omo lioku sokolola lutate, tu pondolavo oku kuatisiwa.