Apulilo Vatambuluiwa

◼ Tu sukila hẽ oku likutilila poku fetika elilongiso Liembimbiliya puvelo?

Oku fetika loku yika elilongiso Liembimbiliya lohutililo, ci kuete esilivilo lialua. Poku likutilila tu pinga ku Yehova espiritu sandu liaye vokuenda kuombangulo yetu. (Luka 11:13) Ohutililo yi kuatisa omunu tu longisa Embimbiliya oku limbuka esilivilo lielilongiso liaye kuenda cu longisa ndomo a likutilila. (Luka 6:40) Omo liaco, ciwa oku linga ohutililo poku fetika elilongiso. Handi vali, omo okuti ekalo ka lia li sokele, ukundi o sukila oku kũlĩhĩsa nda citava oku linga ohutililo puvelo womunu a fetika laye elilongiso Liembimbiliya.

Onepa yikuavo yi sukila oku yi kũlĩhĩsa, ocitumãlo apa elilongiso li lingiwila. Nda u kasi pocitumãlo ka pali onjuela ku lingiwe lutate ohutililo yi teta onimbu poku fetika loku malusula elilongiso. Pole, nda ocitumãlo caco ka ci ecelela oku ci linga, ale omunu tu lilongisa laye ka liyevi ciwa, hĩse oku kevelela toke eci u fetika oku lingila elilongiso vokati konjo. Apa posi elilongiso li lingiwila tu sukila oku lekisa olondunge poku nõla epuluvi tu fetika lohutililo.—Tala Upange Wetu Wusoma Welombo wo 2005 kemẽla 4.