Ku ka Liwekepo Oku Eca Uvangi
1. Utõi we tu sukila oku kuata, kuenda momo lie?
1 Anga hẽ eteke limue wa liwekelepo oku eca uvangi kosikola omo liusumba woku pembuiwa? Olonjanja vimue ci sukila utõi woku vangula, ca piãla enene nda ukuasõi. Nye ci pondola oku ku kuatisa?
2. Eci ku molẽha epuluvi lioku eca uvangi kosikola, o lekisa ndati utate?
2 Lekisa Utate: Ndaño ca sunguluka oku tenda osikola ndocikanjo cove, ivaluka okuti ku lavoka oku fetika ombangulo lomanu vosi ndomo wa siata oku ci linga eci o kasi oku kundila konjo lanjo. Lekisa utate poku kũlĩhĩsa epuluvi ci tava oku vangula. (Uku. 3:1, 7) Osimbu ku lomboluiwa ondaka yimue kosikola ale ceci vu lingila kumosi upange umue wo kosikola, ci pondola oku ku ĩha epuluvi lioku vangula catiamẽla kekolelo liove. Ale ceci umue vu tangela kumosi a ku pulisa esunga lieci ku pangela onepa kovopange amue. Akristão vamue eci va fetika oku tanga, va siata oku sapuila alongisi vavo okuti ovo Olombangi via Yehova kuenda oku eca kokuavo alivulu a lombolola alongiso etu. Vakuavo va kapa alivulu komesa oco a vetiya vana va tangela kumosi oku linga apulilo.
3. O lipongiyila ndati oku eca uvangi kosikola?
3 Lipongiya: Nda wa lipongiya ciwa, utõi wove u li vokiya. (1 Pet. 3:15) Seteka oku sokolola apulilo va pondola oku ku linga, kuenda ndomo o ka a tambulula. (Olosap. 15:28) Nda citava, ambata Embimbiliya liove kosikola kuenda alivulu amue ndeci o Raciocínios, elivulu Os Jovens Perguntam, ale alivulu akuavo a lombolola ovina via lulikiwa okuti a pondola oku ku kuatisa nda ci sukiliwa. Pinga kolonjali viove oco vi kongele ovindekaise vimue vefendelo liene liepata.
4. Momo lie o sukilila oku amamako oku eca uvangi kosikola?
4 Kuata Ocisimĩlo ca Sunguluka: Ku ka sime okuti omanu vu tangela kumosi olonjanja viosi va ka ku pembula eci o va lomboluila ocili. Vamue va ka komoha utõi wove kuenje va ka ku yevelela. Pole ku ka sumue nda lomue wa ku yevelela. Yehova o sanjukila elikolisilo liove. (Va Hev. 13:15, 16) Amamako oku pinga ekuatiso kokuaye oco o kuate ‘utõi woku popia.’ (Ovil. 4:29; 2 Tim. 1:7, 8) Sokolola esanju o kuata eci umue a ku yevelela. Citava okuti omunu waco o pondola oku linga ufendeli wa Yehova!