Olonumbi Vitatu vi Kuatisa Oku Mioñolola Oku Longisa Kuove

1. Momo lie tu sukilila oku mioñolola oku longisa kuetu?

¹ Akundi vosi alongisi. Ci kale okuti tu kasi oku vangula lomunu onjanja yatete, ale poku linga epasu, kuenda koku songola elilongiso Liembimbiliya, ocimãho cetu oku pitiya esapulo. Esapulo tu kunda li kuete esilivilo. Tu kasi oku taimisa ocinyi ‘covisonehua vi kola,’ vina vi pondola oku tuala omanu ‘kepopelo.’ (2 Tim. 3:15) Hesumũlũhokuolio tu kuete! Cilo tu konomuisa olonumbi vitatu vi tu kuatisa oku mioñolola oku longisa kuetu.

2. Tu longisa ndati lonjila ya leluka?

² Longisa Lulelu: Nda tua kũlĩha ciwa ulandu umue, pamue tu ivalako okuti kuli umue ka kuete elomboloko liulandu waco. Poku songola elilongiso Liembimbiliya, yuvula oku kongelamo alomboluilo ka a sukiliwa. Pole, lombolola atosi a velapo. Oku vangula calua ka ci lomboloka oku kala ulongisi uwa. (Olosap. 10:19) Ci kuete esilivilo oku tanga lika ovisonehua via velapo. Noke yoku tanga ocisonehua cimue, lombolola etosi li likuata lulandu u kasi oku konomuisiwa. Vohundo yo Komunda ya sonehiwa kelivulu lia Mateo ovipama 5 toke 7, mu sangiwa alongiso a longa, pole Yesu wa longisa lulelo kuenda wa vangula loku teta onimbu.

3. Ovindekaise vi kuete esilivilo lie, kuenda olonjanja vimue vipi ci tava okuti vi kuamiwa?

³ Ovindekaise: Ovindekaise vi vetiya ovisimĩlo, onjongole kuenda vi kuatisa oku ivaluka ulandu. Ka ci sukila oku luvikiya oco o tukule ovindekaise viwa. Yesu ka tukuile ovindekaise vialua havio via tatama. (Mat. 7:3-5; 18:2-4) Oviluvialuvia vi sangiwa valivulu etu ci tava okuti vi kuamiwavo. Oku lipongiya ciwa ci kuatisa oku sanga ovindekaise viwa.

4. Ndamupi tu linga apulilo a kuatisa?

⁴ Apulilo: Apulilo a kuatisa ondonge oku sokolola. Omo liaco, lekisa epandi noke yoku linga epulilo. Nda ove eca etambululo, ku kũlĩha nda omunu o longisa o kasi oku kuata elomboloko. Nda etambululo liaye ka lia suilepo, ku ko pise, pole linga apulilo akuavo o kuatisa oku tambulula ciwa. (Mat. 17:24-27) Lomue pokati ketu wa lipua koku longisa. Omo liaco, Embimbiliya li tu vetiya oku kũlĩhĩsa oku longisa kuetu. Nda tua ci linga tu ka popela omuenyo wetu kuenda wa vana va tu yeva.—1 Tim. 4:16.