Lava Owanji Wutima Wove

1. Yipi osapi yeteke liohongele yilikasi yunyamo wo 2013, kuenda ulandu waco u kuete ocimãho cipi?

¹ Eteke leteke tua siata oku liyaka lovina vi yapula owanji wutima wetu. Eli olio esunga lieci ulandu weteke liohongele yilikasi yunyamo wo 2013 u fetika 1 Yenyenye Linene wo 2012, u kuetele osapi yiti: “Lava Owanji Wutima Wove.” (1 Tim. 1:19) Ulandu wovipama wa pongiyiwila oku kuatisa omunu lomunu oku kũlĩhĩsa lutate, ndomo tu talavaya lombanjaile eyi yi komõhisa ya tunda Kululiki wetu.

2. Apulilo api a velapo a ka tambuluiwa vokuenda kulandu wohongele?

² Kũlĩhĩsa Atosi a Kuãimo: Ulandu wovipama u ka tambulula apulilo epanduvali a velapo atiamẽla kowanji wutima:

• Ovina vipi vi kapa kohele owanji wutima wetu?

• Tu pindisa ndati owanji wutima wetu?

• Ndamupi tu yuvula oku kuata eko liosonde yomanu vosi?

• Ovisimĩlo lovilinga vietu, vi lekisa ndati okuti tu kuãi olonumbi Viembimbiliya?

• Tu yuvula ndati oku kapela vamanji ocilondokua kovina okuti omunu lomunu eye o nõla onjila a kuama?

• Ene amalẽhe, vu pondola oku pandikisa ndati eci vu kisikiwa oku linga ocina cimue ka ca sungulukile?

• Vana va ecelela okuti owanji wutima wavo u pindisiwa, asumũlũho api va kuata?

3. Tu kuatisiwa ndati lulandu wohongele?

³ Yehova o tu kuatisa oku tamalãla kalikolisilo a Satana oku yapuisa owanji wutima wetu. Lekuatiso Liondaka yaye kuenda ocisoko caye, Isietu wokilu o tu sapuila ndoco: “Eyi oyo onjila, endelimo.” (Isa. 30:21) Ohongele eyi yimue pokati kolonjila Yehova a tu ĩha olonumbi. Omo liaco, linga esokiyo lioku kala kohongele yaco. Yevelela lutate kuenda kũlĩhĩsa ndomo o kapako olonumbi viaco komuenyo wove. Sapela lepata catiamẽla kulandu waco. Oku kapako olonumbi tu ka tambula ci ka tu pamisa oco tu amameko oku kuata “utima wa sunguluka” kuenda oku yuvula oku yapuisiwa lolonjongole vĩvi violuali lua Satana.—1 Pet. 3:16.