O Kasi hẽ Oku Kuatisiwa Lesokiyo Lioku Kuata Ocikanjo Cove Muẽle?
1. Nye ci lomboloka oku kuata ocikanjo cove muẽle?
1 Nye ci lomboloka ocikanjo cove muẽle? Vakongelo ana muli ovikanjo vialua, ca sunguluka oku kuata onepa yimue yocikanjo yi kasi ocipepi lonjo yove, oco o kundilemo. Elivulu Organizados, kemẽla 103, li popia ndoco: “Oku kuata ocikanjo ocipepi lonjo yove, ci pondola oku ku kuatisa oku talavaya ciwa lotembo kupange woku kunda. O pondolavo oku laleka akundi vakuavo oco o talavaye lavo vocikanjo cove.”
2. Oku kuata ocikanjo cetu muẽle ci tu ecelela ndati oku kuatisa ocimunga cupange woku kunda?
2 Oku Kuatisa Ocimunga Cupange Woku Kunda: Nda ocipepi locitumãlo cupange wove kuli ocikanjo cimue, citava okuti kelivala lionanya ale poku lembuka, o kundila vocikanjo caco la manji umue o talavaya ocipepi locikanjo caco. Nda ocikanjo cimue ci kasi ocipepi lonjo yove, citava okuti koñolosi kumue lepata liove, vu kundili vocikanjo caco. Omo liaco, nda ku pondola oku kala kohongele yupange woku kunda, likutilila ku Yehova oco a ku kuatise osimbu kua fetikile oku kundila vocikanjo caco. (Va Fil. 4:6) Handi vali o pondola oku sokiya otembo yoku linga upange woku nganyala olombongo, leyi yoku kundila vocikanjo cove oco o kuatise ocimunga cupange woku kunda. Ca piãla enene kesulilo liosemana okuti, vamanji valua, va enda kupange woku kunda, kuenje, ci ku ecelela oku kuatisa ocimunga.
3. Asumũlũho api eyilila koku kuata ocikanjo cetu muẽle?
3 Asumũlũho: Nda o kuete ocikanjo cove muẽle, ci ku kuatisa oku linga esokiyo lioku kundilamo. Ci kuatisavo oku pita otembo yalua kupange woku kunda, momo ku sukila oku enda ecinãla calua kohongele yupange woku kunda. Ci ku kuatisavo oku kala ukundi wasokamo ale ukundi wotembo yosi. Nda o sanga omunu umue o lekisa onjongole, ci leluka oku tiuka konjo yaye oco o vokiye onjongole yaye loku u longisa Embimbiliya. Vamanji valua va limbuka okuti, oku kuata ocikanjo ocipepi lonjo yavo, ci va kuatisa oku kũlĩha ciwa omanu va sangiwamo, loku va vetiya oku lianja lavo, ca piãla enene nda vocikanjo caco va talavayamo ale calua, osimbu handi ka va ecele ocikanjo caco ku vamanji vakuavo, oco va talavayemovo. Ove kumue lepata liove wa siati hẽ oku kuatisiwa lesokiyo lioku kuata ocikanjo cene muẽle?—2 Tim. 4:5.