Tu Mioñololi Uloño Wetu Kupange Woku Kunda​—Oku Kundila Omunu Umue o Vangula Elimi Likuavo

Esunga Lieci ci Kuetele Esilivilo: Yehova o yongola okuti omanu vo ‘kolofeka viosi’ va kuata ekalo liwa konepa yespiritu. (Ovil. 10:34, 35) Yesu wa lekisa okuti, olondaka viwa via laikele oku kundiwila ‘voluali luosi,’ kuenda “kolofeka viosi.” (Mat. 24:14) Uprofeto Sakariya wa popia hati, omanu vo “kolofeka vialimi osi,” va laikele oku tava. (Sak. 8:23) Vocinjonde upostolo Yoano a kuata ca lombolola okuti, pokati komanu va ka puluka kohali ya piãla, pa ka kongela omanu vo “kolofeka viosi kuenda kapata osi, ... [la] vakualimi osi.” (Esit. 7:9, 13, 14) Omo okuti omanu va vangula alimi a litepa, eci tu sanga omunu umue kupange woku kunda okuti o vangula elimi likuavo, tu sukila oku u kundila.