Ovimãleho Vietu Vioku Longisa Embimbiliya
1. Akristão va sokisiwa ndati lomesele yimue?
1 Omesele yimue yi talavaya lovimãleho vialua. Pole kuli ovimãleho vimue okuti ovio a talavaya lavio olonjanja vialua. Omesele ya loñoloha yi kuete ovimãlẽho vialua vociseleko caye, kuenda yi pondola oku talavaya ciwa lovimalẽho viaco. Embimbiliya li vetiya Akristão vosi oku litumbika kupange woku kunda loku kala ‘ondingupange ka yi kuete eci ci yi kutisa osõi.’ (2 Tim. 2:15) Pokati kovimalẽho vietu vioku longisa Embimbiliya cipi ocimãleho ca velapo? Ondaka ya Suku okuti Embimbiliya oyo ocimalẽho cavelapo tu pondola oku longisa layo omanu oco “va linge olondonge.” (Mat. 28:19, 20) Tu sukila oku likolisilako oco tu loñolohe oku “kunda lesunga ondaka yocili.” Pole, kuli ovimalẽho vikuavo vioku longisa ocili Cembimbiliya komanu okuti Akristão vosi va sukila oku lilongisa oku talavaya lavio ciwa.—Olosap. 22:29.
2. Ovimalẽho vipi vikuavo tu pondola oku longisa lavio omanu?
2 Ovimalẽho Vietu Vioku Longisa: Ovimalẽho vipi vikuavo tu pondola oku talavaya lavio kupange woku kunda? Cimue pokati kovimaleho tu kuete elivulu losapi hati: Embimbiliya li Longisa Nye? Eci tu mala oku longisa omunu umue velivulu liaco, tu pondola oku u longisa velivulu losapi hati: “Kali Vocisola ca Suku” oco tu kuatise oku kapako olonumbi Viembimbiliya komuenyo waye. Omo liaco, tu sukila oku likolisilako oku loñoloha poku talavaya ciwa lalivulu aco avali. Olombrochura, vi pangavo onepa kovimãleho vietu vioku longisa. Ombrochura losapi hati: Olondaka Viwa vi Tunda ku Suku! yimue pokati kovimãleho vietu vi tu kuatisa oku fetika oku longisa omunu Embimbiliya. Nda okuti vocikanjo muli omanu ka va tẽla oku tanga ciwa, ale vana okuti va vangula elimi likuavo okuti ka kuli alivulu kelimi liavo, tu pondola oku talavaya lolombrochura losapi hati: Yevelela Suku, Kuenje o Kala Otembo Ka yi Pui ale Yevelela Suku. Ombrochura losapi hati: Velie va Kasi Oku Linga Ocipango ca Yehova Koloneke Vilo? ocimalẽho cimue cikuavo ci kuatisa omunu tu longisa Embimbiliya oku kũlĩha ciwa ocisoko ca Yehova. Olovideo vi pondola oku tu kuatisa oku longisa omanu oco va linge olondonge vievi: Momo Lie Ndi Lilongisila Embimbiliya? Nye ci Lingiwa Vonjango Yusoma?, kuenda ovideo losapi hati, Deus Tem Nome? Evi vimue pokati kovimãleho tu sukila oku talavaya lavio ciwa.
3. Ovipama vi ka sandekiwa Vupange Wetu Wusoma, vi ka tu kuatisa oku linga nye?
3 Vupange Wetu Wusoma, mu ka sandekiwa ovipama vi ka tu kuatisa oku loñoloha poku talavaya ciwa lalivulu etu oku longisa omunu umue Embimbiliya. Osimbu tu amamako oku talavaya ciwa lovimalãho viaco tu ka vetiyiwa oku kapako olondaka viokuti: “Lilava ove muẽle. Lavavo oku longisa kuove. Pandikisa lovina evi, omo, nda o ci linga, o lipopela ove muẽle, o popelavo ava va ku yeva.”—1 Tim. 4:16.