Upi Ongangu Kovaprofeto—Havakuki
1. Momo lie ekalo lietu li sokisiwila leli lia Havakuki?
1 Osimbu ovina vĩvi vi livokiya voluali lulo, pamue tu kuata ovisimĩlo ndevi via Havakuki wa pula Yehova hati: “O ndekisila nye evĩho? O mbanjisila nye ahuku?” (Hav. 1:3; 2 Tim. 3:1, 13) Oku sokolola kesapulo lia Havakuki kuenda kekolelo liaye, ci tu kuatisa oku limbuka ndomo tu talamẽla lepandi eteke lia Yehova liesombiso.—2 Pet. 3:7.
2. Tu pondola oku lekisa ndati okuti tu kasi oku amamako oku kala vakuekolelo koloneke vilo?
2 Amamiko Oku Kala Vakuekolelo: Ndaño okuti Havakuki ka kuatele ekalo liwa, pole, wa amamako oku lavulula loku pamisa ukamba waye la Yehova. (Hav. 2:1) Yehova wa sapuila Uprofeto okuti, ondaka Yaye yi ka tẽlisiwa votembo ya sokiyiwa kuenda “ukuesunga o muila omuenyo kekolelo liaye.” (Hav. 2:2-4) Olondaka evi vi lomboloka nye Kakristão va kasi koloneke vilo via sulako? Ocina ca velapo, oku kolela okuti esulilo liya muẽle, oku kũlĩha otembo esulilo liaco li keya ci sule. Ekolelo li tu vetiya oku amamako oku lavulula loku pitisa kovaso upange woku kunda.—Va Hev. 10:38, 39.
3. Momo lie tu sukilila oku amamako oku vumba Yehova lesanju?
3 Oku Yolela Yehova: Eci Goge ya Magoge a ka lambalala afendeli va Yehova, ekolelo lietu li ka setekiwa. (Esek. 38:2, 10-12) Uyaki wa siata oku nena ohali yalua ndaño muẽle komanu vana va yula uyaki waco. Momo ku kala ekambo liokulia, olonjo vi tambuiwa lomanu vakuavo, kuenda ka va kuata elianjo. Nda kovaso yoloneke tua ka pita lovitangi viaco, nye tu sukila oku linga? Ndaño okuti, Havakuki wa laikele oku liyaka lovitangi, pole, wa nõlapo oku amamako oku kuata esanju poku vumba Yehova. (Hav. 3:16-19) “Esanju lia Yehova” olio li ka tu kuatisa oku pandikisa kovitangi tu lavoka.—Neh. 8:10; Va Hev. 12:2.
4. Esanju lipi tu kuete cilo kuenda esanju lipi tu ka kuata kovaso yoloneke?
4 Vana Yehova a ka teyuila keteke liaye liesombiso, va ka amamako oku pindisiwa lolonumbi viaye. (Hav. 2:14) Vana va ka pinduiwa, va ka longisiwa ovina viatiamẽla ku Yehova. Omo liaco, cilo tu sandi epuluvi lioku sapela lomanu ovina viatiamẽla ku Yehova kuenda kovopange aye a komõhisa!—Osa. 34:1; 71:17.