Longisa Ocili

Oku upisa kosãi Yenyenye Linene, Vekalo Lietu Tuakristão Kuenda Oku Kunda, mu ka kongela ocindekaise cokaliye losapi hati: “Longisa Ocili.” Ocimãho cetu oku sapela eci catiamẽla kocili Cembimbiliya, poku linga epulilo limue kuenda oku tanga ocisonehua cimue.

Nda tua limbuka okuti omunu wa lekisa onjongole, tu pondola oku sanda epuluvi lioku linga epasu poku sia elivulu limue ale oku u lekisa ovideo yimue yi sangiwa vo jw.org. Tu sukila oku tiukila lonjanga oku ka linga epasu oco tu amameko lombangulo yetu. Ovindekaise viokaliye kuenda ovipama via siata oku lingiwa la vamanji, vi ka kunamẽla kolonepa vi sangiwa kesulilo liovipama vielivulu Embimbiliya li Pondola Oku tu Longisa Nye? Tu pondola oku sangamo apulilo akuavo kuenda ovisonehua vi tu kuatisa oku linga apasu ale oku linga elilongiso limue poku kuama lika Embimbiliya.

Kuli lika onjila yimosi yi tuala komuenyo ko pui. (Mat 7:13, 14) Omo okuti tua siata oku sapela lomanu vakuatavo alua, lovituwa via litepa, tu sukilla oku va kundila ocili Cembimbiliya lonjila yimue yi vetiya. (1 Tim 2:4) Osimbu tu amamako oku kũlĩha ciwa atosi a litepa Embimbiliya loku mioñolola uluño wetu woku “talavaya ciwa londaka yocili,” esanju lietu li livokiya, kuenje tu kuata onima poku longisa ocili komanu vakuavo.​—2 Tim 2:15.