Anga hẽ Ondaka ya Sonehiwa ya Suku ya Pongoluiwa?

Omanu vamue va siata oku lipula nda ondaka ya sonehiwa ya Suku ya pongoluiwa. Uprofeto Isaya wa popele okuti Ondaka ya Suku “yi tumãla ño-o hũ.” (Isaya 40:8) Tu pondola oku kolela ndati okuti olohuminyo via Suku via teyuiwa muẽle lutate?

Suku o kuete unene woku teyuila ondaka yaye, loku tateka okuti oyo ka yi pengisiwa. Kosimbu eci kua enda oku sonehiwa olokopia viovisonehua, vakuakukopiala, va enda oku tenda ololetala viovisonehua vi kola, oco va kũlĩhĩse okuti lacimue ca vokiyiwako, ca pongoluiwa ale copiwapo. Ndaño lalikolisilo aco, omanu ka va lipuile kuenda vamue vakuakukopiala Embimbiliya va lueya olonepa vimue.

TU PONDOLA OKU KOLELA NDATI OKUTI OVISONEHUA VI KOLA VIOKOLONEKE VILO VI KUETE ESAPULO SUKU A TUMA OKU SONEHA TETE?

Kuli ovisonehua vialua viosimbu Viovisonehua vi Kola. Nda o kopia yimue yi kuete etepiso limue, oyo yi pondola oku sokisiwa lolokopia vikuavo oco ku limbukiwe apa va pengisa. Oco o lilongise ovina vikuavo, tanga ocipama losapi hati, “Embimbiliya Lia Pongoluiwa?” vo jw.org.

Kũlĩhĩsa ndeci, ovicapa viosimbu vi tukuiwa hati, Ociña Cokalunga ka ka Kuete Akimba, via sangiwa la bedouins valeva a kala ocipepi Lokalunga ka ka Kuete Akimba kunyamo 1947. Oviña viaco viosimbu vi kuete olonepa Viovisonehua vi Kola okuti, tunde eci via sonehiwa pa pita ale olohulukãi vivali vianyamo. Vakuakukonomuisa va sokisa ovisonehua viaco viosimbu lovisonehua vi kola tu kuete koloneke vilo. Nye ovo va sanga?

Olonoño vimue via limbuka okuti ulandu Wondaka ya Suku tu kuete koloneke vilo, wa lisoka lowu wa sonehiwa tete.a Ekonomuiso lia lingiwa vovisonehua viosimbu Viembimbiliya, lieca uvangi wokuti ovina tu tanga Vovisonehua vi Kola esapulo litunda ku Suku. Kuenje, tu pondola oku kolela okuti Suku wa teyuila lutate Ovisonehua vi Kola tu kuete koloneke vilo.

Omo liaco, tu pondola oku tanga Ondaka ya Suku lekolelo liocili kuenda oku kuata elomboloko lia suapo. Lonjila eyi, tu konomuisa eci tu lilongisa catiamẽla ku Suku pocakati covaprofeto vaye.