Ululiki Wetu Ukuacisola wa tu Kapako

1. ULULIKI WETU O TUNDAISA EKUMBI

Omuenyo palo posi nda wa kala ndati nda ka kua kaile ekumbi? Ekumbi lieca ongusu oco oviti vime amẽla, olonẽleho, apako, olonendo kuenda ovikũla. Ci kuatisavo oviti oku upa ovava vongongo vocakati colombombo toke kamẽla kuenje noke a li sanduila vilu ndombundu.

2. ULULIKI WETU O LOKAISA OMBELA

Ombela ombanjaile yimue yiwa ya Suku yecelela okuti ongongo yima ovikulia oco tu vilie. Suku wa tu ĩha ombela, apako vovovo alio, okulia, loku yukisa ovitima vietu lesanju.

3. ULULIKI WETU O TU ĨHA OKULIA KUENDA UWALO

Olonjali vialua via siata oku sakalala calua omo lioku sandiliya okulia luwalo wepata liavo. Kũlĩhĩsa eci Ovisonehua vi popia: “Tali olonjila kilu, ovio ka vi limi, ka vi ungula kuenda ka vi kuete olosila, haimo lumue, Isiene kilu o vi tekola. Ene ka wa velelipo hẽ okuti ovio vi sule?”—Mateo 6:25, 26.

“Lilongisili kolonelẽho vio vusenge ndomo ovio vi kula . . . pole, ndu sapuili siti, ndaño [Soma] Salomone vulamba waye, ka la liposuisa ndovio. Nda Suku o walisa ndoco olonelẽho vio vusenge, okuti etaili vi kasiko hẽla vi imbiwa vofolono, ko walisi hẽ ca velapo?”—Mateo 6:28-30.

Omo okuti Suku o tu ĩha okulia kuenda uwalo, ocili okuti eye o pondolavo oku tu kuatisa oku sanga ovina vikuavo tu sukila komuenyo. Nda tua sandiliya oku linga ocipango ca Suku, eye o ka sumũlũisa a likolisilo etu oku sanda eteku, ale oku tu kuatisa oku sanga upange u tu ecelela oku landa ovina tu sukila. —Mateo 6:32, 33.

Ocili okuti, tu kuete asunga awa woku lekisa ocisola ku Suku, eci tu mola ekumbi, ombela, olonjila kuenda olonẽleho. Ocipama ci kuãimo ci ka lombolola ndomo ululiki wetu a siata oku sapela lomanu.